رحیم زام (برج سنبلہ)

عبدالرحیم زام نا برج ”سنبلہ“(Virgo)، حاکم استار ”عطارد“ (Mercury)، شکل ”تولوک آ مسڑ“، تَب ”مشی“ (خاکی)، کلید وجود ”کاریم، حقیقت پسندی، ذہانت“، پیشن نا ہزوہ ”پھڈ“، تہہ انا ہزوہ ”روتینک“، ہجی حرف آک ”پ، غ“، منطقہ البروج ”6“، اسہ تَب انا برج آک ”ثور، جدی“، جتا تَب ”جوزا، قوس“، تعلق دار برج آک ”اسد، سرطان“ بے تعلق ”حمل، دلو“، ودی دے ئی عدد ”2“، لائف پاتھ عدد ”4“، مرکب عدد”30“، فطری گچین کاری ”جسمانی“ ءِ۔

عبدالرحیم زام ؔنا ودی دے (29 اگست 1992ء) ”سنبلہ“ ءِ۔ دا اسہ بدل مروک ءُ برج اسے۔ دا برج والاک دوستی، حقیقت پسندی، ہر وخت کاریم تیٹی مشغول وڑ انا صفت آتا خواجہ مریک۔ تینا کاریم تے منصوبہ بندی اٹ کیک۔ ہر کاریم ءِ سائنسی اصول آتا ردٹ کننگ ءِ پسند کیک۔ بے کا ر وخت ءِ زیان کننگ آن بد دیک۔ تینا ذہانت و تینا طاقت آ باور کیک۔ تینا کارو کڑد ءِ ایسر آ سر کننگ نا خواہنداری تخک۔ تینا صحت و جانجوڑی نا بارو اٹ خاص خیال تخک۔

فلکیات نا چاہندار آتا رد اٹ برج ”سنبلہ“ نا مالک ایلوفتے ریفنگ، مسخرہ مسخرہ ٹی ایلوفتا اُست ءِ پرغنگ نا ماہر مریک۔ تینا نظریہ ءِ ایلوفتیا زبردستی اٹ امپلیمنٹ کرفنگ نا خواہندار، زو خار اٹ بریک، صحت نا چُنکا خرابی سے آن بھاز فریشان مریک۔

فلکیات نا چاہندار آک دا ہم پارہ کہ برج ”سنبلہ“ نا خواجہ دوستی نا گچین کاری ٹی بھاز محتاط مریک۔ برج ”جدی“ و برج ”ثور“ برج ”سنبلہ کن جوان ءُ سنگت مننگ کیک۔ ”میزان، عقرب، اسد، سرطان“ ہم جوان ءُ سنگت مننگ کیرہ، ولے ”جدی“ و ”ثور“ انا مون اٹی کم۔ ”جوزا، قوس، حوت“ اوڑکن جوان ءُ سنگت مننگ کپسہ۔ نہ دافتیا برج ”سنبلہ“ نا اعتبار مننگ کیک۔ بلکہ اونا کسر اٹی اڑانگ ہم شاغنگ نا کوشست کیک۔

براہوئی زبان نا عالم و ادیب آتے ٹی نور احمد پرکانی (25 اگست 1967ء)، پروفیسر سوسن براہوئی (یکم ستمبر 1959ء)، صابر ندیم (4 ستمبر 1972ء) و میر طاہر خان مینگل (8ستمبر1972ء) اسک ہندا برج انا بندغ ءُ۔

رحیم زامؔ نا ودی دے ئی عدد (29 اگست 1992ء) ”2“ ءِ۔نومرالوجی نا چاہوک آک پارہ کہ ہرکس نا ودی دے ئی عدد”2“ مس تو دا بندغ مہربان، کمکار مریک۔ اونا لہجہ ٹی شائستگی مریک او تینا زمواری ءِ جوان چاہک، بے باور آ حالیت آتا نمائندگی ءِ کیک۔ برام آن پد تینا کارو کڑد اٹی پین گچینی اتنگ کیک۔ نومرالوجسٹ آک دا ہم پارہ کہ ودی دے ئی عدد ”2“ نا خواجہ برام آن مُست یا برام کپننگ آ رومانوی ویل آتا شکار مننگ کیک۔ مہر و محبت نا بابت بھلو ڈکھ خنک۔ 29 تاریخ آ ودی مروک آ بندغ خاص وڑ اٹ ہندن اِنگا معاملہ غاتے ٹی اختہ مننگ کیک۔ ولداہم مخالف جنس انا بندغ آک اودے یکہ اِلیپسہ بلکہ اوڑا ہندن بریرہ دُن کہ ہیڷ شہد آ برے۔ اردو نا بھلا ادیب مولوی عبدالحق، اردو نا پنی افسانہ نگار، سعادت حسین منٹو، اردو نا پنی آ ادیب احمد ندیم قاسمی و جنرل پرویز مشرف نا ودی دے ئی عدد ہم ”2“ ءِ۔

رحیم زامؔ نا مرکب عدد ”30“ ءِ۔

(Raheem Zam 2+1+5+5+5+4= 18-7+1+4=12+18=30)

دا اسہ موافق عدد اسے۔نومرالوجی نا چاہندار آتا رد اٹ مرکب عدد ”30“ والا بندغ انت کاریم اس کے تینا اُست انا ہُب اٹ محنت کیک تو اوٹی او سرسہبی المی دوئی کیک۔

رحیم زامؔ نا لائف پاتھ عدد ”4“ ءِ۔

(2+9+8+1+9+9+2= 40–4+0=4)

دا لائف پاتھ عدد”تعمیر“ (Builder) نا عدد اسے۔ دا عدد نا کلیدی لوز آک ”حقیقت پسندی و بھاز محنتی“ ءُ۔ تینا کاریم اٹی بھاز منظم مریک، کاریم ءِ ترتیب اٹ کیک۔ قابل اعتماد مریک۔ زندگانی نا اولیکو بشخ مشکل مریک ولے تینا محنت اٹ تینا زندگانی نا کسر ءِ بدل کیک۔

رحیم زامؔ انا ودی دے ٹی ”9“ انا تکرار ساڑی ءِ۔ دا عدد (9) ہرا بندغ نا ودی دے ٹی مُسہ یا چار وار برے اونا طب اٹی بے قراری ودی کیک۔ دا بندغ زندگانی ٹی پیدوارءُ کارو کڑد اس کننگ خواہک۔

رحیم زام انا فطری اثر جسمانی ءِ۔ دُن کہ نن اونا لوزآتے بشخ و بانٹ کینہ تو دا وڑ بشخ مریرہ۔ جسمانی اثر نا لوز آک ”E,E,M,M، ذہنی اثر نا حرف آک ”A,A، جذباتی اثر نا حرف آک ”R,Z“ وجدانی حرف افس۔ کل آن زیات حرف آک فطری گچین کاری نا جسمانی اثر نا کیرغ آن ءُ۔ ہنداکان ظاہر مریک کہ اونا فطری گچین کاری جسمانی ءِ۔ جسمانی گچین کاری نا خواجہ زیات سوچنگ نا جاگہ غا عمل نا گرج ءِ پیدوار کیک، مدام کاریم اٹی مشغولی نا پاشی ءِ کیک۔

ہفتئی تلار
تاک: 38
15-09 اکتوبر 2021ء
پنہ: 08