رخشان ادبی کاروان نا مشاعرہ

 

رخشان ادبی کاروان پنجگور نا سنگت آتا مشاعرہ اس کاروان نا وٹس ایپ گروپ اٹی ساجد زیب دہوار نا کماشی ٹی اڈ تننگا ہرانا خاص انگا مہمان براہوئی زبان نا پر فکر و پر خیال آ ورناغا شاعر حبیب اللہ حبیبو ئس۔ مشاعرہ نا شونکار کریم اسیر سمالانی نا بشخ اٹی بس۔

مشاعرہ کلام اللہ شریف نا تلاوت آن بنا مس و دا بختاوری ءِ حافظ عابد ملک دوئی کرے, تلاوت آن پد کریم اسیر سنگت آتے اسٹ اسٹ بٹنگا کہ بریر و تینا خیال آتے شعری دروشم اٹی پارسا کیر دا آن لائن مشاعرہ ٹی پنجگور آن پیشن نا سنگت آک ہم بشخ ہلکر و تینا گچین انگا خیال آتا درشانی ءِ کریر۔ مشاعرہ ٹی شعر پاروک آ سنگت آک بھاز جوان ءُ خیال پیش کریر و گروپ نا باسک آتیان داد ہلکر۔

صدام رضا

شاخ آک بڑ بڑارہ پھل آک کچتورہ

کشتیک ڈب ہلوسر دریاک کچتورہ

۔۔۔۔۔

دیر و خاخر اوار تمانو

شار اٹی ہُر نہار تمانو

کریم اسیر پنجگوری

کاغذی پھل آن گند پٹانن

دیر انا زی آ رند پٹانن

۔۔۔۔۔

پدین آ دیگر آک ہرادو

پر کروک آ جمبر اک ہرادو

وہاب صدیقی

نئے کہ روزگا ہنر نئے کہ تعلیم کرین

رند اٹی بس نما سہب ءِ پیشیم کرین

۔۔۔۔۔

نے آن پد یا کہ نن روبرو لکھنہ

نے کن لکھن غزل باوضو لکھنہ

عابد ملک سورابی

نن نے آ برینک گلی ءِ تفینو

نی مجبور اس نا با دوی ءِ تفینو

ساجد زیب پنجگوری

دا کسر نن کن سراب ءِ پہہ مرک

دشمنی تینا خراب ءِ پہہ مرک

۔۔۔۔۔

موسم ءِ جمبری نا کمی ہوغفک

خن تا نا پالن آ با دوی ہوغفک

بابل باقر

مِش تے شاغے نا خن تیٹی نے ولے ارمان افک

کسکنو کل زندہ ایدے دڑد انا درمان افک

۔۔۔۔

شراب آ او کہ دا شور خواپک

چاسہ نی کہ محبت زور خواپک

ولی ساسولی

زندہ اُٹ یا کسکنٹ نی سوج ءِ کپیسہ کنا

بارن اُٹ یا خرن اُٹ نی سوج ءِ کپیسہ کنا

۔۔۔۔۔۔

عشق بس یار اسے نا باہوٹ ءِ

دڑد غم خوار اسے نا باہوٹ ءِ

سکندر بلوچ

کتابی چہرہ گلاب اسے نا

کنے کرینس حساب اسے نا

غفار آفتاب مینگل

نما بس ننے آ خیال اس مرے

ننا زند اٹی ہم افال اس مرے

۔۔۔۔۔۔

مدامی عشق دُن برجا سلیپک

چڑہ وا مہر انا کسہ سلیپک

غفار عاطف

براہوئی زبان ءِ بلوچی زبان ءِ

بہ زیبا ننا ہُر دا زیبا گدان ءِ

انور زیب پنجگوری

مون سیاہی ءُ خیسن ءُ شعر ءُ

کاغذی پھل ءُ ایہن ءُ شعر ءُ

۔۔۔۔

خوش مریو ای تینا نی تینا جاگہ غا

پین اسے ای تخانٹ تو نا جاگہ غا

صدف بلوچستانی

کسک شمع زند انا دا زند ہنا تہار مس

نئے سیلس نن کن ہتم نئے نن کن شار شار مس

۔۔۔۔۔

پدی مسلمان جہان ءِ تخ نی

است اَٹ خدا و قرآن ءِ تخ نی

سعید فیض

دید اسے کن نا است مچانے

خاخر تے ٹی نی پا رپّانے

اطہر حسین صدیقی

انت اکن نی خرین ءُ گپ کیسہ

است ءِ شرسہ ٹھپ ٹھپ کیسہ

قمبر انجم

مہر نے تون کنا دلربا متکن ءِ

است ئسک امر داسہ ہم ہندن ءِ

حبیب اللہ حبیبو

دنیاس ایسنٹ ای پروردگار بڈ آ

ای آسمان انا اُٹ زی آ ڈغار بڈ آ

۔۔۔۔۔

زباد و پھل پر و جمبر ہتم چمن ہچڑا

اگہ کہ ساہ بدن اَٹ مف تو اَف بدن ہچڑا

مشاعرہ نا خاص انگا حبیب اللہ حبیبو گڈسر اٹی تران کرسا پارے کہ براہوئی ادب اینو ورنا تا قربانی تا سوب آن بھاز مستی ہنانے ولے انگہ گرج ہندا گڑا نا ءِ کہ ورناک براہوئی زبان ءِ خوانر براہوئی ادیب آتے مطالعہ کیر تاکہ اوفتا خیال اٹی پین ودکی مرے۔ او پارے کہ رخشان ادبی کاروان نا سنگت آک ستا کڑزرہ کہ اوفک مکران اٹی بلوچ آتا بھلا و اولیکو بولی براہوئی زبان ءِ زندہ تخانو و براہوئی زبان نا شاعر آتے اسہ پیج اسے آ اوار کرینو.

اخیر اٹی رخشان ادبی کاروان نا سرپرست اعلیٰ ساجد زیب پنجگوری ہرا کہ دا مشاعرہ نا کماشی ءِ کننگ ئس سنگت آتتون گپ و تران کرسا پارے کہ

اینو نا مشاعرہ ٹی کل شاعر آک تینا خیال آتا درشانی ءِ اسہ زیباءُ وڑ و ڈول اسے ٹی رخشان ادبی کاروان نا باسک آتا مون آ تخار کل سنگت آتا خیال، شاعری بے کچ گچین ئسر ای بحیثیت سرپرست اعلیٰ و اینو نا پروگرام نا صدر تینا مہمان خاص ملک حبیب حبیبو صاحب و کریم اسیر پنجگوری صاحب و ایلو کل سنگت آتا منت ءِ ہرفوہ کہ اوفک ننا توار آ تینے ساڑی کریر و تینا پر فکر انگا خیال آتا درشانی ءِ کریر، پین ننا بھاز سنگت آک کہ اینو نا مشاعرہ ٹی بشخ ہلنگ کتوس اوفتا ہم منتوار ان کہ سنگت آتے خف توریر و اوفتا حوصلہ افزائی ءِ کریر اومیت کینہ کہ بروک آ مشاعرہ ٹی کل سنگت آک ہمرادری کرور اسہ وار اس پدا نما ایلم ساجد زیب نما منت ءِ ہرفوہ۔ ہراڑے اریرے اللہ پاک نمے شادکام کے، خوشی نا جمبر آک نمے دائمی سیخا کیر، اللہ نما حامی و ناصر ہندا ہیت آتے کرسا مشاعرہ نا کماش مشاعرہ نا ختم مننگ نا پڑوءِ کرے۔

ہفتئی تلار
تاک: 38
15-09 اکتوبر 2021ء
پنہ: 02