صحافت بناوردوم 21
حفیظ ساحل
توئی ”گل چیں“ خیر آباد لکھنؤ:۔
محمد عسکری وسیم خیر آباد لکھنؤ آن اردو علم و ادب نا شینکاری و ترقی کن جنوری 1891ء اٹی توئی گل چیں نا بنا ءِ کرے، بیرہ اسہ سال اسے آن گڈ دادے لکھنؤ آن گورکھ پور آ بدل کننگا، دانا سوب آن ادارتی امور آتے محمد عسکری نا جاگہ غا ریاض خیر آبادی سر تسکہ۔ تینا شینکاری و زیبائی نا سوب آن اردو ادبی حلقہ غاتیٹی بھلو پن اس کٹا، ہمو دور انا گچین و پنی آ شاعر آتا شاعریک داٹی شینک کننگارہ۔
ہفتئی ”روہیل کھنڈ“ بریلی:۔
1881ء اٹی منشی عبدالعزیز مراد آباد آن 8 پنہ غاتیا تالان ہفت روزہ ”روہیل کھنڈ“ انا بریلی آن بنا ءِ کرے، ”روہیل کھنڈ“ اٹ زرگزرانی و راجی نوشت آتے بھاز گچینی اٹ جاگہ تننگاکہ، الس نا احساس و جوزہ غاتے بھاز جوانی اٹ پیش کننگاکہ، پرچہ ٹی حوال و اشتہار آتے شینک کننگاکہ۔
ہفت روزہ ”سیول و ملٹری نیوز“ لدھیانہ:۔
ماسٹر غلام محی الدین مئی 1893ء اٹی لدھیانہ غان ہفت روزہ ”سیول اینڈ ملٹری نیوز“ نا بنا ءِ کرے، 12 پنہ غاتیا جوڑ دا پرچہ ٹی الس آن بیدس فوجی تا خبر آک ہم شینک کننگارہ، راج انا اصلاح کن راجی خبرآک و مضمونک ہم شینک کننگارہ۔
توئی ”محمڈن اینگلو اورینٹل کالج میگزین“ علی گڑھ:۔
1894ء اٹی توئی ”محمڈن اینگلو اورینٹل کالج میگزین“ نا بنا مس۔ داڑان مست دا علی گڑھ انسٹی ٹیوٹ گزٹ نا ضمیمہ نا وڑ اٹ شینک مسکہ۔ دا رد اٹ دانا اردو بشخ انا ایڈیٹر مولانا شبلی نعمان جوڑ مس۔ و انگلش بشخ ءِ تھیوڈور بیک انا دوٹی تننگا۔ دا پرچہ ٹی نوشتہ کروک آتیٹی مولانا الطاف حُسین حالی، نواب محسن الملک، مولوی نذیر احمد، وحید الدین سلیم، مولانا حسرت موہانی و منشی ذکاء اللہ کون آ پنی آ بندغ آک اوار ئسُر۔ ”محمڈن اینگلو اورینٹل کالج میگزین“ نا بنداوی مسخت دے ٹکی علم انا شون تننگ و شینکاری تون اوار پوسکن آ علم آتتون اوار اوفتتون تعلقداری ءِ گنڈنگ ئس۔ تاکہ متکن و پوسکن نا اواری اٹ مسلمان تیٹی علمی شعور ودی کننگے۔
ہفتئی تلار
22-28 August 2020
تاک: 33
پنہ : 3