پنی آ فکشن نگار، گل بنگلزئی

براہوئی زبان نا پنی آ ناول و افسانہ نگار، ادیب گل بنگلزئی نا اصل پن میر محمد گل ءِ، اونا باوہ شرفمند نا پن محمد سلیمان، قلمی پن گل بنگلزئی، قبیلہ بنگلزئی، جہی ہند تحصیل و ضلع کوئٹہ ءِ۔

گل بنگلزئی مارچ 1935ء اٹی خلق نوحصار کوئٹہ ٹی ودی مسنے۔ او تینا دینی تعلیم آن بیدس پرائمری اسکان تعلیم ءِ خلق نوحصار کوئٹہ نا پرائمری اسکول اٹی دوئی کرینے۔ اوکان پد او 1955ء اٹی لاہور بورڈ آن میٹرک نا امتحان ءِ پاس کرے، داکان پد گورنمنٹ سائنس کالج کوئٹہ غان بی اے کرے، و اوکان پد 1958ء اٹی کشت و کشاری محکمہ ٹی کلرک بھرتی مس۔

ہندن 1961ء اٹی ولیج ایڈ بی آر او لگا۔ 1963ء اٹی اونا پوسٹنگ ژوب اٹی مس۔ ہندا دے تیٹی اونا باوہ بزرگوار کزیت کرے۔ اوکان پد او منہ تو اکن ڈی پی آر محکمہ تعلقات عامہ ہم لگا۔

او پنچ سال بورڈ آف انٹرمیڈیٹ اینڈ سیکنڈری ایجوکیشن بلوچستان نا کنٹرولر نا منصب آ ہم تینا سرکاری زمواری تے سر تسنے۔

گل بنگلزئی بلوچستان یونیورسٹی کوئٹہ نا شعبہ امتحان نا ڈپٹی کنٹرولر و اوکان پد کنٹرولر نا منصب آ ہم بھاز جوانی اٹ تینا زمواری تے سر تس۔

گل بنگلزئی نا خدا نا فضل و کرم اٹ پنچ مار، و پنچ مسڑ ءُ۔ اونا مار و مسنک ہم بڑزکو کہولی تعلیم دوئی کرینو۔ گل بنگلزئی نا بھلا مار پروفیسر نصیر احمد طب انا بشخ اٹی خلق خدا نا گچین وڑ اٹ خذمت ءِ کننگ ءِ۔ ہندن اونا ایلو مار محمد حنیف پائلٹ نا کورس کرینے۔ ایلو اولیاد آک تے ہم زند انا جتا جتا بشخ آتیٹی بھلا منصب آتیا تینا زمواری تے سر تننگ ءُ۔

گل بنگلزئی زبان و ادب نا زیات ادبی خذمت سر تروک ءُ اسہ بے مٹ و گچین ءُ ادیب اسے۔ او اسہ خیر خواہ ءُ ادیب قلم کار اسے نا حیثیت اٹ ہرا ادبی کڑد ءِ ادا کرینے، اوفک لکھ ستا کڑزرہ۔

او افسانہ و ناول آن بیدس پٹ و پول، نا پڑ آ ہم کاریم کرینے، و اونا بھلا کاریم ایلو زبان تیان تینا زبان اٹی مواد آتا مَٹ و بدل ءِ۔ گل بنگلزئی ءِ دا شرف ہم دوئی ارے کہ او براہوئی زبان نا اولیکو ناول نگار ءِ۔ اونا ناول ”دریہو“ براہوئی ادب نا پڑ آ بھلو پذیرائی اس دوئی کرینے۔

گل بنگلزئی براہوئی زبان اٹی داتم اسکان بیست و ہفت آن زیات کتاب نوشتہ کرینے، اونا دا نوشتہ کروک آ کتاب آک براہوئی ادب نا پڑ آ بے مٹ ءُ مڈی اس اریر۔ ہندن براہوئی زبان و ادب ءِ زندہ تخنگ و براہوئی زبان ءِ ایلو شون ہلوک آ زبان تتون ہمسر کننگ نا جوان ءُ کوشست اس پاننگ مریرہ۔

اونا نوشت اٹی روانی، سچائی ءِ بیان کننگ، راجی ویل آتا ایسری آ چکار، ادبی چاگڑد نا سوگوی، رواداری، و براہوئی ادب نا دنیا ءِ شاداب کننگ نا ہم گچین ءُ جوزہ اس خننگک۔ اونا نوشتہ کروک آ کتاب آتا ہر اسہ شاعر و ادیب و ادب تون شوق تخوک آ خواجہ بھاز شوق اٹ خوانک۔ و علمی و ادبی چاہنداری دوئی کیک۔

گل بنگلزئی نا شخصیت اٹی مہر و سیوت، ایلم دوستی، دین دوستی، ادبی شونداری نا جوزہ، راج انا شونداری نا دڑد، براہوئی زبان ءِ زیات شون تننگ نا جوزہ ہم خننگک۔

گل بنگلزئی براہوئی ادب نا تالانی، ورنا شاعر ادیب آتا است بڈی، براہوئی ادب نا شونداری کن کاریم کروک آ ادبی ادارہ غاتتون کمک کاری نا ہم اسہ بھلو جوزہ اس تخک۔ اونا خیال و فکر سوچ انا دائرہ بھاز کشادہ ہم ارے۔ او سدائی براہوئی زبان و ادب نا تالانی و راج انا راہشونی نا گڑتی ٹی است خواہی تخک۔

دا ہیت راست ءِ کہ شاعر ادیب دانشور تینا راج انا مسٹمیکو خن پاننگک۔ گل بنگلزئی کون ءُ مہروان، زیات خواری کروک، براہوئی زبان و ادب نا دڑد ءِ است اٹی تخوک ءُ شخصیت راج اٹی بھاز کم ودی مریک۔ ہرافک کہ تینا زند انا بھلا بشخ ءِ تینا زبان و ادب نا شونداری کن وقف کرینو۔

گل بنگلزئی کوئٹہ غان بیدس بلوچستان نا یلو علاقہ غاتیٹی ہم ادبی کچاری و ادبی سیمینار آتیٹی بشخ ہلسا ادب نا شونداری و ورنا شاعر ادیب آتا است بڈی نا گچین آ کڑد ءِ ادا کرسا کرینے۔ اونا ہر اسہ خیال ہر اسہ ہیت براہوئی زبان و ادب نا شونداری نا کنڈ آ کاہک۔

دعا کینہ کہ خدا تعالیٰ گل بنگلزئی نا زبان و قلم اٹی برکت شاغے، او ہندا وڑ اٹ براہوئی زبان و ادب نا پڑ آ تینا ادبی خذمت آتے برجا تخسا کے۔ آمین۔

ہفتئی تلار
تاک: 38
15-09 اکتوبر 2021ء
پنہ: 04