ننا زِند اٹ سیرتِ مصطفی ؐ نا گرج و اہمیت

کنے بھاز خوشی مس ہراتم کہ ننا پی پی ایل لائبریری قلات اٹی خوانوک آ سنگت آک جمعہ (4ستمبر) نا دے سیرتِ مصطفیؐ نا زی آ اسہ مجلس اس اڈ تسر، و دا سوچار کہ نن محمدالرسول اللہؐ نا کڑدار ءِ امر تینا زند اٹ ودی کین، ہرانا ہر عمل انسان کن سرسہبی نا اسہ کلہو اسے، کہ اگہ نن تینا ہر ویل، فریشانی یا ناٹہنداری تا ایسر ءِ پٹنگ خوانہ، تو خواجہ دو عالم محمدالرسول اللہؐ نا زند نن کن بھاز بھلو سبخ اسے۔ 

دا نشست و کچاری ٹی ننا شرفمند آ استاد عتیق شاہ صاحب ہم بشخ ہلک، و سیرت نا زی آ بھاز گچین وڑ اٹ گپ و تران کرے۔ پین ہم کیہی سنگت آک ئسر و ہر بندغ نا تینا اسہ بھاز بھلو کڑدار اس مس کہ کل بنوک آک دا کچاری آن ہیل کرین، دا کچاری ٹی حضرت محمد مصطفیؐ نا زند انا بارو اٹ سنگت آک ہیت کرسا دا ہم پاریر کہ اگہ اونا وڑ و ڈول نا زند اس نن گدریفن تو ہچ ءُ شک اس اف کہ نن ہم عظمت نا بڑزی تیا رسینگون۔ سنگت آک ہیت کرسا پاریر کہ محمدالرسول للہؐ نا زند تو بھاز بھلو بے پایان ءُ سرحال اسے، ہراڑکن دن ءُ ہزار کچاری اڈ ایتس ہم پورو مفک کہ اونا زند انا ہچ ءُ کنڈ اس حکمت آن خورک اف کہ اوڑا ہیت مف۔ ولے نن اونا زند ءِ مسہ (3) جاگہ غا بشخنہ کہ ننے پہہ مننگ و پاننگ اٹ آسانی مرے۔

اول تو دا کہ خواجہ نا زند عبادت آتا رد اٹ، کس اگہ خواہک کہ تینا زند ءِ ہندن عبادت اٹ تدیفِو کہ عبادت نا کل آب آک پورو مریر گڑا او بندغ کن لازمی ءِ کہ رسول اللہؐ نا عبادت کننگ نا وڑ ءِ خوانے و اونا زی آ عمل کے، گڑا اونا عبادت آک پورو مرور۔ اوفتے ٹی ڈکوک آ حکمت آک انسان ءِ مِلور۔ دن کہ حدیث اٹی بریک کہ نماز بے حیائی آن تورک، گڑا نن اسہ وار سوچن کہ نن نماز ہم خواننہ و ایلو کنڈ آن غلط انگا کاریم تیٹی ہم ننا بھاز بھلو بشخ اس ارے، دانا سوب انت مرو؟ دا ننا کل انا ایمان ءِ کہ دانا سوب یخین اٹ نماز اٹ ننا ہوش مفننگ و نماز نا تہٹی خشوع و خضوع نا مفننگ ءِ۔ گڑا نن تینا نماز نا وڑ انگا عبادت ءِ انتئے اللہ نا نبی نا نماز نا وڑ اٹ خوانپن کہ نن دنیا و جہان نا کل گناہ و غلط انگا کسر تیان نماز نا سوب آ بچِن۔ تنیا نماز آخا کہ کل عبادت آتے ٹی اونا پیروی ءِ کننگے تو شاید ہچ ءُ عمل اس انسان نا پوک مف۔ اونا وضو، نماز، حج، روچہ و دعا کننگ اسکان کل قرآن نا پاروک آ ہیت آتیانبار ئسر۔

ارٹمیکو دا کہ خواجہ محمد مصطفیؐ نا ذاتی زند، نن اگہ سیرتِ مصطفیؐ ءِ خوانن و پہہ مرین و تینا زند اٹ ہمو عادت آتے ودی کین کہ او امر ءُ ہنین ءُ زند اس گدریفے، اونا تول/ بش، کُنِنگ، بینِنگ، خاچنگ و ہر ہر عمل تے ہندن گچین ئس کہ اونا جانی دشمنک ہم اودے منار، اودے صادق امین پاریر، اینو ہم دنیا نا بھلا بھلا بخال و کافر آک اونا عظمت و بھلنی ءِ منرہ۔ و ”ماہیکل ایچ ہارٹ“ دنیا نا سد عظیم انگا بندغ آتا پن تے لکھنگ نا وخت ننا نبیؐ نا پن ءِ کل پن تیان بڑز اٹ لکھا کہ اوڑان ودیک ءُ عظمت دا دنیا ٹی کس اتون ودی متو، اونا سگ سینہ ہراکان اتیسہ؟ اونا وڑ اٹ مہر مریبت امر کیسہ؟ او ہم ہموفتتون کہ ہرافتا ظلم کچ آن گدرینگوک مرے۔ ہندا سوب آن تو قیامت اسکان اوڑانبار ءُ انسان نئے ودی مسنے نئے مریک۔

تینا ہیت ءِ مونی پارسا سنگت آک خواجہِ عالم صلی اللہ علیہ وسلم نا زند انا مسٹمیکو بشخ آ گپ کریر کہ اونا زند ءِ خواننگ آن خنک دن ہم ملنگرہ کہ اونا تعلقداریک مخلوق تون امر ئسر، اسہ چنکو چنا سے آن ہلیس، اسہ اولیاد، مار، ورنا، استاد، باوہ، سنگت و کل آن ودیک اسہ دشمن اسے نا وڑ اٹ اونا زند آ غور کین تو حیران مرون کہ او دشمن تتون ہم مہر مریبت اٹ پیش بسکہ، بلکن تینا ذات اکن کس اتون دشمنی کتو اگہ کس اونا دشمن پاننگاکہ ہم تو رب انا خاطر آن، اللہ نا دشمن محمدؐ نا دشمن ئس۔ ولے محمدؐ نا دشمن، دشمن اس الو بلکن ہندہ (ابو سفیان نا زئیفہ) و وحشی (ہرا کہ خضور نا الہ جان ءِ شہید کریر و اونا ہوجری ءِ خلاسار) کون انگا انسان تے ہم بشخا۔ اینو ننا سیال و سیالداری تیٹی تلخی و پسات ودی مسنے، پیسہ نا رند اٹ ہر بندغ دو ءِ کاٹم اٹی خلوک چرینگک، ہر بندغ حرام و حلال اوار سوار کیک کنیک ولے کس ءِ دا یات بفک کہ ننا نبیؐ ہم فقیری ءِ دوست تورے، اونا سوب نن کہ اسہ کلہو اس ئسک کہ اگہ حضور صلی اللہ علیہ وسلم کائنات نا مالک مرے ولے پِڈ آ تینا خل تفے گڑا نن دیر اُن کہ غریبی ٹی سود، دزی، حرام ءِ اوار کین کنین تینا رب ءِ تینے آن ناراض کین۔

پاننگ نا مسخت دادے کہ محمدؐ رسول اللہ نا زند انا ہر پہلو ءِ اگہ ہرن تو نن بھاز ہنین، زیبا ءُ زند اس خنون، گڑا دیر بد بخت او سیرت ءِ تینا زند اٹ ودی کننگ آن نمن مرو۔ دیر خواپک کہ کنا زند سکون و مریبت نا اسہ سوردریاب اس جوڑ مرے۔ نن اینو بھاز گِڑا خواننہ، بھاز انگا گِڑا تے کن وخت کشنہ ولے تینا ہنین آ نبیؐ نا کڑدار ءِ خوانپنہ، تینا زیبا انگا قرآن ءِ خوانپنہ و قرآن نا زندہ انگا دروشم یعنی نبیؐ نا سیرت آ غور و فکر کپنہ وا پدا گلہ ہم کینہ کہ مسلمان اینو زوال نا گواچی ءِ۔ مسلمان تتون کمک کروک اف۔ یا مسلمان بے سکون و فریشان ءِ۔ دا کل گلہ شونیک ہمو وخت اسکان کاریم تفسہ تانکہ نن محمد رسول اللہؐ نا وڑ اٹ، قرآن نا وڑ اٹ یا اللہ امر خواہک ہمون ءُ سیرت اس تینا جوڑ کتنن، یات تخنگے کہ اسلام بیرہ نماز و روچہ نا پن اف بلکن اللہ نا مخلوق تون تعلقداری، انصاف، صبر و ہر پلّو آ اللہ نا نبی صلی اللہ علیہ وسلم نا پیروی کننگ نا پن ءِ۔ دعاءِ کہ رب ننے قرآن کریم و سیرت مصطفی ءِ خواننگ و اوڑا عمل نا توفیق ایتے۔آمین

ہفتئی تلار 

تاک: 37

26 Sep-02 Oct, 2020

پنہ: 07