سلامتی کونسل بھارت نا کانود آن چَپ کشمیر آ کوزہ و انسانی حق آتا خلاف ورزی نا نوٹس ءِ ہلے،نائب وزیراعظم و وزیر خارجہ

پاکستان اقوام متحدہ نا سلامتی کونسل آن خواست کرینے کہ او بھارت نا کوزہ ٹی جموں و کشمیر اٹ انسانی حق آتا خلاف ورزی و آبادی نا کچ اٹ بدلی نا گام گیج آتا نوٹس ءِ ہلے و بھارت آ زور شاغے کہ او 5 اگست 2019 نا تینا خود آن کروک گام گیج آتے پدی ہلے۔ نائب وزیراعظم و وزیر خارجہ اسحاق ڈار سلامتی کونسل نا ساڑی صدر و ڈنمارک نا آخبتی مندوب سفیر کرسٹینا مارکس لاسن نا پن آ اسہ چٹھی اس مون تس، ہرا اقوام متحدہ ٹی پاکستان نا آخبتی مندوب سفیر عاصم افتخار احمد کونسل نا صدر نا دوٹی تننگا۔ نائب وزیراعظم نا چٹھی ٹی کونسل نا چکار ءِ ڈومیسائل کانود، ڈغارنا ملکیت نا ضابطہ، گچین کاری انتظام، و انتظامی پنجراٹی بدلی تا کمک اٹ بھارت نا کوزہ ٹی جموں و کشمیر نا آبادیاتی، سیاسی و دود و ربیدہ کڑد ءِ بدل کننگ نا ہندوستان نا پدریسہ کوشست آتا کنڈ آ کرفنگانے، ہراٹی کم و ود 3.4 ملین پیشن نا بندغ آتے ڈومیسائل سرٹیفکیٹ جاری کننگ ہم اوار ءِ۔ چٹھی ٹی بھارت نا کانود آن چَپ کوزہ ٹی جموں و کشمیر اٹ انسانی حق آتا پدریسہ خراب مروک آ حالیت آتیا گڑتی درشان کننگانے، ہراٹی دزگیری‘ عدالت آن ایڑتر خون، زوراکی بے گواہی، بیدادی، آجو سلاہ درشانی آ رکھ و پرامن مچی تا سخت کانود پبلک سیفٹی ایکٹ، سلہہ بند فوج آتا ایکٹ (پی ایس اے) و اسپیشل پاور ایکٹ، توننگ ایکٹ (یو اے پی اے) نا کنڈ آ اشارہ کننگانے۔ چٹھی ٹی کشمیری سیاسی راہشون شبیر احمد شاہ، یاسین ملک، و آسیہ اندرابی تون اوار اوار صحافی، وکیل، انسانی حق آتا رکھوک و سول سوسائٹی نا کارندہ غاتا پدریسہ نظربندی و ظلم و بیدادی نا کنڈ آ ہم چکار کرفنگانے۔ اوٹی کشمیری الس نا است خواہی تا نمائندگی ءِ کروک آ شانزدہ سیاسی تنظیم آتیا پدریسہ پابندی تے نوٹ کننگانے۔ چٹھی ٹی بھارت نا کانود آن چَپ کوزہ ٹی جموں و کشمیر اٹ مذہبی آجوئی آ کھ انا بابت ہم بھلو گڑتی اسے نا درشانی کننگانے ہراٹی سری نگر نا تاریخی جامع مسجد اٹ باجماعت نماز آ رکھ‘ مذہبی ادارہ غاتا چاروکی ٹی ودکی، مدرسہ غاتے بند کننگ و ضابطہ، کمیونٹی نا بست وبند 215 سکول آتیا کوزہ، و وقف ایکٹ انا نفاذ آن ودی مروک آ گڑتیک اوار ءُ۔ علاقائی امن و سلامتی کن بھارتی کارروائی نا زہم تے نوٹ کرسا، نائب وزیراعظم خبڑدارکرینے کہ بھارتی کوزہ ٹی جموں و کشمیر اٹ 7 آن 9 لکھ سیکورٹی کارندہ غاتا تعیناتی، سخت بیان و سندھ طاس معاہدہ ءِ معطل کننگ نا بھارتی فیصلہ سویلی ایشیا ٹی بے چیٹی و امن و سوگوی کن خطرہ غاتے ٹی ودکی کرینے، چٹھی ٹی اقوام متحدہ نا سلامتی کونسل آن خواست کننگانے کہ او جموں و کشمیر نا بابت تینا قرارداد آتیاعملدرآمد کننگ کن بھارت آ زور شاغے کہ او 5 اگست 2019 نا تینا خود آن کروک گام گیج آتے پدی ہلے، مقبوضہ علاقہ نا حیثیت و آبادیاتی ساخت ءِ بدل کننگ کن کل گام گیج آتے بند کے، کشمیری الس نا انسانی حق آتا شرف ءِ کے۔ اقوام متحدہ (اے پی پی)