بورہ اسکینڈل نا جاست پاست ءُ نیب کیک

0

Get real time updates directly on you device, subscribe now.

اسلام آباد: وزیراعظم نا خصوصی کمکار شہزاد اکبر پارینے کہ وزیر اعظم عمران خان شوگر کمیشن نا سلاہ سوج آتے مون آ تخسا بورہ اسکینڈل نا زموار بندغ آتا برخلاف سلاہ سوج و سزا تا منظوری ءُ ترسا کاروائی نا پارت کرینے، 9 شوگرمل آتیان پد ایلو مل آتا بابت ہم جاست پاست کننگک۔ تدوک آ دور تیٹی تننگوک 29 ارب روپئی نا سبسڈی نا باندات ءُ نیب آ راہی کننگ انگ ءُ۔ وزیراعظم 7 اہم و بھلو سلاہ سوج آتا منظوری ءُ تسنے، برآمد و وام تے بشخفنگ نا جاست پاست ءُ اسٹیٹ بینک آف پاکستان نا دوٹی تننگانے۔ یک شنبے نا دے اسلام آباد اٹی پریس کانفرنس کرسا وزیراعظم نا خصوصی پرسجوئی کمکار شہزاد اکبر نا پاننگ ئس کہ عمران خان قول کریسس کہ بورہ تنکی نا جاست پاست ءُ کرفک، وزیر اعظم فیصلہ کرینے کہ اسُل ہرکس کہ اخس زوراک مرے، اودے ورندی تروئی تمک۔ وزیراعظم بورہ کمیشن نا سلاہ سوج آتا منظوری ءُ تس۔ سلاہ سوج آتیٹی پاننگانے کہ مخلوق آن بایدے ریکوری مرے۔ وزیراعظم 7 اہم و بھلا سلاہ سوج انا منظوری تسنے۔ شوگر مل آتے رسینگوک سبسڈی نا جاست پاست ءُ نیب انا دوٹی تننگانے۔ انکم ٹیکس، سیلز ٹیکس فراڈ و بے پن ہل تس آتا جاست پاست ءُ ایف بی آر کیک۔ مسابقتی کمیشن، کارٹیلائزیشن نا جاست پاست ءُ کیک، برآمد و وام بشخفوک آتا بابت جاست پاست ءُ اسٹیٹ بینک آف پاکستان نا دوٹی تننگانے۔ کارپوریٹ فراڈ نا جاست پاست ءُ ایف آئی اے، سیکیورٹیز اینڈ ایکسچینج کمیشن کیرہ۔ پاننگوک جعلی برآمد و منی لانڈرنگ نا جاست پاست ءُ ایف آئی اے ءُ تننگانے۔ صوبائی کانود آتا خلاف ورزی نا جاست پاست ءُ انسدادِ بدعنوانی نا صوبائی محکمہ غاتے تننگانے۔ شہزاد اکبر نا پاننگ ئس کہ شوگر نا نہاد ءُ کنٹرول کننگ نا بابت ہم سلاہ سوج تننگانے۔ حماد اظہار نا کماشی ٹی کمیٹی اس بورہ نا نہاد آتے کم کننگ کن گام گیج کیک۔ 20 ، 25 سال انا سبسڈی نا جاست پاست کن ریفرنس اس دائر کننگ نا فیصلہ کننگانے۔ 29 ارب روپئی نا سبسڈی نا باندات ءُ نیب آ راہی کننگ انگ ءُ۔ بورہ تنکی نا خراج نا بابت باندات آتے ایف بی آر ہُرک۔ خصوصی پرسجوئی کمکار پارے کہ 1985ءآن ہرافک دُزی کرینو، نیب ہموفتے ہم ہُرے، و ایف بی آر ریکوری کے، و 90 دے ٹی بنجا ءُ رپورٹ پیش کے، وخت اس کہ کمیشن نا رپورٹ پاہک کہ شوگرانڈسٹری نا بندغ آک تینا منشا اٹ بیدادی کرسا ہنانو، بورہ تنکی ٹی سایسی بندغ آک مخلوق ءُ فائدہ ترفنگ نا وڑ اٹ زموار اریر، شوگرکمیشن نا رپورٹ اٹی شاہدی رسینگانے کہ بورہ اوغانستان آ ایکسپورٹ کننگا، ہرا بورہ غاک اوغانستان آ ہنار، و ہرا ایڑے سر مسر، اوفتیٹی پرخ ارے۔ 15، 20 ٹن والا ٹرک آ 80 ٹن نا رسید کاٹنگا، کہ بورہ اوغانستان آ ہننگ ءُ۔ داٹی منی لانڈرنگ ہم مسنے، بلیک منی ءُ وائٹ کننگا، بورہ اوغانستان آ ایکسپورٹ نا باندات جاست پاست ہم ایف آئی اے کیک، ایف آئی اے 90 دے اٹی کیس آتے عدالت اٹی جمع کرفک۔ شوگر مل آک بیدس موکل آک ودکی بورہ جوڑ کرسا فراڈ کریر۔ ودکی بروہ جوڑ کننگ نا باندات ءُ صوبہ غاتا اینٹی کرپشن ہُرک۔

( آن لائن)

Get real time updates directly on you device, subscribe now.

Leave A Reply

Your email address will not be published.