سیل و چکر….. زیبا غا مکران…..  (1)

کوئٹہ اسہ زیبدار، سفا ولے چنکو روایتی ءُ شار اسے۔ داڑے زیات آبادی کرن آتیان رہینگنگ اٹی ءِ۔شار انا مُست انا بندغ آک اسہ نہ اسہ وڑ اسیٹ اسٹ ایلو ءِ جوان درست کیرہ و پہہ مریرہ دافتا تین پہ تین تون سیالداری ہم ارے۔ ہراڑے داخس جوانی ءُ ہموڑے تعلیمی، دارو درمان نا گچین آ آسراتیک اف آن حساب ءُ۔داڑان بیدس سیل و سواد نا رد اٹ گڑاس جاگہ غاتیان بیدس ہچ اف۔ ہندا خاطر آن کوئٹہ نا مخلوق کوئٹہ نا ہر گلی کوچہ ءِ خنانے۔ اوفک مچ آ پاکستان اٹی سیل و سواد کننگ آ خننگرہ۔ اوفتا معلومداری گڑاس زیات ءِ۔

کوئٹہ ٹی داسہ اسہ رواج اس منہ سال چلینگنگ اٹی ءِ۔ شار انا مخلوق تینا چنکا چنکا مکان تیان تینا چناتتون پیش تمسا خڑک انا ہوٹل آتیا یا سیل و سوادی جاگہ غاتیا وخت تیر کیرہ۔ ولے سریاب و پیشن نا علاقہ غاتا مخلوق دا مشغولی تیان مچے مُر ءِ۔ خاص وڑ اٹ نیاڑیک۔ ولے اوفک تینا خواننگ و ملازمت کن اُرا غان ضرور پیش تمرہ۔

گڑاس ہزگار خاہوت آک اسکول آتا چھٹی تیٹی لاہور، اسلام آباد و اسلام آباد نا سیل و سواد نا جاگہ غاتیا مون ءِ کرسا سفر کیرہ۔ اوفتا بھازی یاتو تینا گاڈی تیٹی یا کوچ، ریل و پرائیویٹ گاڈی کرا کرسا تینا زند اٹی مچے شادکامی اتسا زند انا ہڑدے نا خرینی و بوریت ءِ مُر کیرہ۔

سیڷ انا دو نیم تُو انا چھٹی تیٹی ننا خاہوت نا بھاز آ بندغ آک کراچی آ ہِننگ خواہسرہ۔ و کم و بھاز سفری تیاریک ہم سرجم ئسرہ۔ کنے آن کنا اُراٹی ہم دا خواست کننگا کہ کراچی آ منہ وخت اسے کن کان۔ ولے کنے آ کراچی آ سفر نااِرا نسخان نظر اٹی ئسرہ۔ اسٹ دا کہ کراچی شار اٹی رَش انا سوب آن یا آباتی نا زیاتی آن سفائی نا ہچ ءُ خیالداری اس اف۔ و ارٹمیکو دا کہ خاہوت تون ہِننگ تون اوڑے بھلا بھلا مارکیٹ و بازار آتیٹی سوداگری نا بھلا بِل یا خڑچ انا خلیس۔ ہندا خاطر آن اُرا والا تے مکران آ ہِننگ کن تیار کریٹ۔ داڑے دا پاو کہ مکران ڈویژن اٹی ضلع غاتا ڈغاری سفر و جاگہ نا مَش و جبل، دشت و سد آ کلومیٹر آتا سفا انگا پتڑی (ساحلی) علاقہ و دا مچ آ ڈویژن اٹی حیران کروک آ جاگہ غاک، و کل آن بھلا تینا مخلوق۔

داکان بیدس کنے مکران ڈویژن اٹی گڑاس خیر انا کاریم ہم پٹوئی ئس۔ منہ ہندن ءُ کاریم کننگے کہ ہرافتیان مکران ڈویژن نا غریب مخلوق نا زند اٹی جوانی اس برے اوفک شرحال مریر۔ ہندا سوچ و خیال اٹی دے گدرینگا۔ و کراچی نا جاگہ غا مکران کن سفر کن تیاری مس۔

جنوری و فروری نا تُو تیٹی کوئٹہ سخت یخ مریک۔ مچ آ تعلیمی ادارہ غاک چھٹی مریرہ۔نن ہراتم دا سفر نا اُراٹی تیاری کننگ اٹی ئسن تو دا جنوری نا اسُل گڈیکو دیک ئسر۔ ولے ننا ہیت فروری نا بنا ٹی پکا مس۔کوئٹہ غان پیش تمنگ نا دے و وخت ہم مقرر مس۔ کنا تینا اُراٹی اُرائی و اِرا چناءُ ہندا خاطر آن سفر اٹی پین اِرا بندغ نا ضرورت ئس کہ یک تنیا سفر مزہ کپک۔ ہندا خاطر آن دا سوچنگ اٹی تمان کہ او دیر مرور کہ نن تون اوار مرور۔

دن تو دا حالیت اٹی کل آن بھلا فیصلہ سفر اٹی شریک ایلو بندغ آتا مریک ولے جوان انگا ہیت دا ئس کہ ننا مچ آ خاہوت ہندا دے تیٹی کراچی کن تیاری کریسس۔ہر کس ءِ مکران نا پاریٹہ ”نہ” اٹی کاٹم ءِ سرفیکہ۔ دا حال اٹی تینا اِرا ایڑھ انا اِرا مسن تتون ہیت کریٹ اوفک کنا عزت ءِ تخسا اؤ کریر۔ دا وڑ اٹ کنا چنکا گاڈی آلٹو وی ایکس آر 660سی سی انجن نا مچ آ مسافر آک تیار ئسر۔ہرادے آ سہب اتون وختی مکران نا ضلع پنجگور کن پیش تموئی ئس۔ ہندا دے آ باوہ جان خاہوت نا ایلو بندغ آتتون کراچی کن پیش تمنگ اٹی ئسُر۔ پرخ دا ئس کہ نن اسہ چنکو گاڈی اسیٹی اسہ نرینہ اس(ای) ئسٹ۔ وخت اس کہ ابا جان ناکماشی ٹی ارا بھلو گاڈی خاہوت نا ایلو باتی تتون تیار ئسر۔خیر ننا تیاری ہم جوان وڑ اٹ ئس۔ باوہ نا سخت آ طبیعت نا سوب آن ای کل ءِ دا پاریٹ کہ باوہ جان ءِ ہچ ءُ وڑ اسیٹ ننا مکران آ ہِننگ نا خبر مف۔ نہ تواو یک تنیا ننے سفر کن الیپرو۔ ابا نا فیصلہ غاک مچ آ اُراٹی کل اَکن پک فیصلہ مریرہ۔اونا منع کننگ نا مطلب نن تینا مکران نا سفر ءِ پد بِٹن۔

ہرادے کنے پیش تموئی ئس حکمت نا رد اٹ ای سہب اتون ہفت بجہ نا وخت ءِ تخاٹ تاکہ ننا گاڈی ایلوفتیان مُست سفر آ پیش تمے۔ ولے مس دا کہ ایلو گاڈیک ہم اسُل ہندا وخت آ کراچی کن پیش تمار۔ ابا جان ءِ جاگہ اسے آن ننا مکران آ ہِننگ نا خبر تماسُس۔ داسہ کل آن زیات خلیس دا ئس کہ داسہ اونا فون بریک و ننے آ چڑک۔ و تینا منشا اٹ حکم اس ایتک۔دا ہیتءِ ای خاطر آن پاننگ اٹی اُٹ کہ نن چنکی آن فوجی طب انا باوہ نا شیف آن زند گدریفینُن۔ نن ورنا مسن یونیورسٹی تسکان سر مسن۔ ولے وخت اس اِلہ، ماما، تاتہ یا پین سیال اسے نا اُراٹی نن گدریفنگ نا ہچ ءُ گیگ اس الو۔وخت وخت اس اگہ ننکان ہُرے آ اُرا غا بسنہ تو اُرا غا بننگ آ مُست کسر اٹی ابا نا خلیس آن اخس کہ قرآن نا آیت یات مسرہ اوفتے خوانانہ تینے آ چُف کرینہ۔

قلات شار اٹی قرطبہ اسکول نا اسہ گچین ءُ ماڑی اس 2018ء اٹی جوڑ کننگا۔ ہرادے گچین آ ایلم خواجہ شبیر مینگل صاحب چلیفنگ اٹی ءِ۔ اوڑتون ننا اسہ بھلو گچین ءُ تعلقداری اسے۔ اُرا نا باتی تیانبار ءِ۔ و مہر و خلوص نا سیالی ءِ۔ اونا اُرا قلات شار انا اسُل نیام ٹی ءِ۔ اودے تینا بننگ نا پاریسٹ۔ و سہب انا نہاری ءِ اوڑتون اوار کروئی ئس۔

قلات کوئٹہ غان 160 کلومیٹر مُری آٹے۔ سہب اتون ہفت بجہ غا پیش تموک آ بندغ آک 9:30 آ قلات آ سر مسن۔ اوڑے سر مننگ تون شبیر مینگل ءِ اطلاع کرین دہ منٹ اٹی نن اونا اُرا نا مون آ ئسن۔ الحمدللہ مچ آ بلوچستان اٹی نیاڑی و پیر انگا تا عزت ارے۔ اگہ وخت اس نے تون اُرا نا نیاڑی اس مرے تو واقف کار وسنگت آک مُر آ ن تینا کسر ءِ چپ کیرہ اگہ مون اٹ بریر ہم تو کاٹم ءِ شیف کیرہ۔ ای خیال کننگ اٹی ئسُٹ کہ شبیر مینگل پیشن بریک ولے او تینا کسر ءِ جتا کریسُس نن کن تینا چنکا مار ءِ مون تس۔ اُراٹی ہم تولنگ کن جتا جاگہ کننگاسس۔ و نن نرینہ غاک جتا بیٹھک اٹی توسُن۔ کنے ہر وخت شبیر تون ملنگ آن اسہ جتا ءُ خوشی اس مریک۔ چُپ ولے پہہ ءُ بندغ اسے۔ بھلا جوانی تے دادے کہ او بھاز مون انا سوچ ءِ تخک۔ اونا دا جوانی تا سوب آن وخت انا ہچ خبر تمتو۔ ہنداڑتون اسہ گچین ءُ نہاری اسینا بندوبست کننگاسس۔نہاری آن پد پین اسہ گچین ءُ نشست اس مس۔ و 11:30بجہ غا اوڑان موکل ہلکن۔ننا اولیکو مزل پنجگور ئس۔ہراکہ 400کلومیٹر پین مُر ئس۔حسب روایت شبیر صاحب بیٹھک نا تہہ آن موکل کرے۔کل آن مُست ای پیش تماٹ۔ گاڈی ءِ سدھا کریٹ تو ایلو مسافر آک ہم پیش تمار۔ و نن قلات آن پنجگور کن راہی مسن۔

(برجاءِ)

ہفتئی تلار
تاک: 38
15-09 اکتوبر 2021ء
پنہ: 05