اصطلاحات نثر 33

غفور جان ساسولی

0

Get real time updates directly on you device, subscribe now.

پیپر:۔ (Paper)

پیپر انگریزی لوز اسے، ہرانا لغوی معنہ کاغد نا ءِ۔

پیپر علمی و ادبی اصطلاح ٹی ہمو تحقیقی آ مقالہ ءِ پارہ ہرا اسہ خاص اڈ تروک ءُ پروگرام، سیمینار، ورکشاپ، سمپوزیم، ادبی ءُ مجلس اسے ٹی خواننگک۔

پیپر ایم ایس سی، ایم فل و پی ایچ ڈی کننگ کن ہم نوشتہ کننگک۔

پیپر اسہ سرحال اسے نا زی آ اسہ سرجم ءُ مضمون یا مقالہ اسے نا وڑ اٹ مریک۔

جامد:۔ (Static)

جامد عربی نا لوز اسے ہرانا معنہ سلوک ءِ۔

جامد اصطلاح نا رد اٹ ہمو ادب، فن، نظریہ، سوچ، کڑدار یا ہمو صنف سخن ءِ پارہ، ہراٹی بدل مروک آ حالیت، برجا ساڑی وخت انا گرج آتا رد اٹ پوسکن آ خیال و پوسکن آ فکری رجحان آتے اوڑدہ کننگ یا ہلنگ نا سگ مف، یا کہ او تینے ٹی سگ تخپک۔ جامد ہچ ءُ اثر اس ہلپک، و او اسیجا سلوک غیر متحرک خننگک۔ داٹی پوسکن آ آزموندہ غاتا گنجائشت ہم مفک۔

ادبی اصطلاح ٹی دا نظریہ ٹی عمل نا انداز، کڑدار، فن، زبان، ادب نا غیر ادبی صنف ءِ جامد پاننگک۔ ہراٹی بدلینگوک آ حالیت و چاگڑد نا رد اٹ بدل مننگ نا لائخی مف۔

پی ایچ ڈی:۔ (Ph.D)

پی ایچ ڈی لاطینی لوز اسے، ہرانا Philosophiae Doctor (فلسفیا ڈاکٹر) آن ہلنگانے، و دانا ایلو بشخ یعنی فلسفہ (Philosophy) یونانی لوز اسے، ہرانا معنہ (Love of wisdom) ”عقل انا مہر“ ءِ۔

متکن آ فرانسیسی زبان اٹی ڈاکٹر نا معنہ Father of Church ”چرچ انا باوہ“ لاطینی ٹی Religious Teacher (مذہبی استاد) پاننگانے۔ لس وڑ اٹ پی ایچ ڈی، ایم فل Master of Philosophy کننگ آن پد کننگک۔ ہرا اسہ خاص ءُ سجفوک ءُ سرحال یا مضمون اسے نا زی آ مریک۔ پی ایچ ڈی ٹی مدام تحقیقی اسلوب اٹ مقالہ اس نوشتہ کرسا ڈگری ہلنگک۔ پی ایچ ڈی نوشتوک نا مقالہ کن اسہ سپروائزر اس پک کننگک، ہرا ہندا سرحال یا مضمون نا جوان ءُ چاہندار اس مریک۔

پی ایچ ڈی نا ڈگری یونیورسٹی نا کل آن بھلا سند مریک۔ و دا بھلا سند ءِ ہمو بندغ کہ ہرا اسہ فیکلٹی اسے نا غٹ ڈگری تا امتحان تے پاس کرینے، و ہندن اوڑتون اوار اوفتے ہندا مضمون تے جوان وڑ خوانفنگ نا لائخی یا واکداری ارے، تننگک۔

ہفتئی تلار 

تاک: 37

26 Sep-02 Oct, 2020

پنہ: 05

Get real time updates directly on you device, subscribe now.

Leave A Reply

Your email address will not be published.