اقتصادی اولیت آتا رد اٹ امریکہ تون مذاکرات اہم ءِ،سینیٹر محمد اورنگزیب

بنجائی وزیر خزانہ و بنگ سینیٹر محمد اورنگزیب تون امریکہ نا واپاری نمائندہ (یو ایس ٹریڈ) سفیر جیمیسن گریئر ورچوئل اوڑدہی کرے، ہراٹی پاکستان و امریکہ نا نیام اٹ ہڑتوم آ کنڈآتا واپار و اقتصادی کمکاری ءِ پین سوگو کننگ کن برجا مذاکرات اٹی مروک آ پیشرفت نا جاچ ءِ ہلنگا۔ وزیر خزانہ واشنگٹن ڈی سی ٹی مروک آ ساڑی اوڑدہی تا حوالہ ءِ ترسا مذاکراتی ٹیم تا کنڈآن دوئی مروک پیشرفت نا ستاءِ کرے و مذاکرات اٹی ہڑتوم آ فریق آتا مثبت و گچین کمکاری نا ستاءِ کرے۔ ہڑتوم آ کنڈآن دا ہیت آ است جمی نا درشانی ءِ کننگا کہ سلاہ ئی واپاری فریم ورک نا بابت مذاکرات اٹی پیدوار پیشرفت مسنے، دا عزم انا درشانی ءِ کننگا کہ معاہدہ ءِ زوت آن زوت گڈیکو دروشم تننگک۔ وزیر خزانہ پاکستان نا اقتصادی اولیت آتا رد اٹ مذاکرات نا رفتار ءِ برجا تخنگ نا اہمیت آ زور شاغا۔ او پارے کہ امریکہ تون واپار و زرکاری آ تالان سوگو شریداری پاکستان نا برآمد آتیا تالان زرگزرانی سج پام ءِ سوگو کیک‘ زرگزران ءِ پین سوگو کننگ اٹ کمکار مریک و ہڑتوم آ ملک آتا کاروباری ادارہ غاتیکن پوسکن واپاری و زرکاری نا وارخواہی ودی کیک۔ او امریکہ نا ایکسپورٹ امپورٹ بینک (ایگزم بینک) اتون ہڑتوم آ کنڈآتا واپار و زرکاری نا مون آ دننگ کن پدریسہ کمکاری نا اہمیت آ ہم ہیت کرے۔ سفیر جیمیسن گریئر مذاکراتی عمل اٹی پاکستان نا پدریسہ و مثبت اواری نا ستاءِ کرسا خواری کش آتا حق و ریگولیٹری اصلاحات، خاص وڑ اٹ زوراکی‘ زور اٹ کاریم کرفنگ نا توننگ نا بابت گام گیج آتیٹی مروک پیشرفت نا ستاءِ کرے۔ او دا عزم انا درشانی ءِ کرے کہ امریکہ ہڑتوم آ کنڈآتا واپاری مذاکرات نا مثبت پیشرفت ءِ برجا تخنگ کن سنبرینگوک ءِ واومیت درشان کرے کہ ایلو سلوک باندات آتے ہم تکنیکی کہول آ پدریسہ رابطہ غاتا کمک اٹ زوت پک کننگک۔ وزیر خزانہ پیشرفت ءِ پین مون آ دننگ کن خڑک رابطہ غاتے برجاتخنگ و تکنیکی کہول آ مذاکرات اٹی پین زوت کننگ نا گرج آ زور شاغا۔ فریق آک داتم اسکان مروک آ پیشرفت آ است جمی نا درشانی ءِ کرسا دا ہیت آ امنا کریر کہ سلاہ ئی واپاری فریم ورک نا ایلو سلوک ٹک آتے زوت گڈیکو دروشم تننگ کن باقاعدہ رابطہ غاتے برجا تخنگک تانکہ پاکستان و امریکہ نا نیام اٹ متکن اقتصادی شریداری ءِ پین سوگو کننگ مرے۔ اوڑدہی ٹی بنجائی سیکرٹری واپار جاوید پال و امریکی واپاری نمائندہ (یو ایس ٹی آر) نا دفتر نا سینئر کمامدارآک ہم بشخ ہلکر۔