سینئر سٹیزن تے ننا قومی روایت آتیٹی بھلو شرف اس دوئی ءِ،گورنر جعفرخان مندوخیل

گورنر بلوچستان جعفرخان مندوخیل پارینے کہ اسہ مہذب و شونداری ہلوک راج انا پجار دادے کہ او تینا بزرگ آتے باریم آخا بلکن تینا کل آن نہادی آ میرات و فکری راہشونی نا چکل گوندے۔ سینئر سٹیزن تے ننا کانود و قومی اقدار و روایت آتیٹی بھلو شرف اس دوئی ءِ‘ بزرگ شاریک ننا راج انا جم پامداری‘ آزموندہ و تاریخ نا امانتدار ءُ ہرافک تینا مچ آ زند ءِ قوم انا خذمت و پوسکن آ نسل نا ہیلکاری کن خڑچ کرینو۔ دا خیال آتا درشانی ءِ او گورنر ہاؤس کوئٹہ ٹی مسکوہی سینیٹر روشن خورشید بروچہ نا کماشی ٹی سینئر سٹیزن آ تالان ڈل اتون ہیت وگپ کرسا کرے۔ دا وخت آ گورنر بلوچستان جعفرخان مندوخیل پارے کہ ننا استخواہی و کوشست دادے کہ پیر انگا شاریک ریٹائرمنٹ آن پد ہچ ءُ وڑ اسے نا مالی بے رکھی، جانجوڑی نا ویل یا راجی بے چکاری نا گواچی مفس۔ اوفتا وقار، آب اٹ طبی آسراتی، راجی رکھ و بنداوی خذمت آتسکان بریبر رسینگ گیگ ءِ پک کننگ حکومت، راج و ہر بندغ نا زمواری ءِ۔ گورنر مندوخیل پارے کہ رعایتی نہاد آتیا دارو تا فراوانی، سفری آسراتی ٹی خصوصی رعایت، عمر دوست السی ہند و ایلو المی آسراتی تا فراوانی بزرگ شاری تا بنداوی حق آتیٹی اوار ءِ۔ ہندا وڑ خاہوتی کہول آ ہم اوفتا شرف، مہر، خذمت و پبی چکار ننا اخلاقی زمواری ءِ‘ او ورنا تیا زور شاغا کہ پوسکن آ نسل تینا بزرگ آتا علم، بصیرت و آزموندہ غاتیان فائدہ ہرفنگ کیک۔ تعلیمی ادارہ غاتا کہول آ راہشونی نا پروگرام، کمیونٹی کونسل و غیررسمی نشست آتا کمک اٹ اوفتا نہادی آ آزموندہ و مچ آ زند انا جم پامداری ءِ بروک آ نسل آتسکان گدریفنگ مریک۔