پولیس نا شہید آک قوم انا عظیم میرات، پاکستان نا پیشانی نا بینہ ءُ،وزیراعلیٰ میر سرفراز بگٹی

وزیراعلیٰ بلوچستان میر سرفراز بگٹی یومِ شہداءِ پولیس نا وخت آ تینا خصوصی کلہو اٹی پارینے کہ پولیس نا شہید آک قوم انا عظیم میرات و پاکستان نا پیشانی نا بینہ ءُ ہرافک وطن نا امن، کانود نا بالادستی و الس نا جان و مال انا رکھ اکن تینا جان تے ندر کرسا وفا، بہادری و فرض شناسی نا کیہی داستان تے پک کریر۔ او پارے کہ شہید آتا قربانیک ننا قومی تاریخ نا روشنا باب ءُ و قوم دا عظیم آ قربانی تے مدام شرف و احترام اٹ یات تخک۔ وزیراعلیٰ بلوچستان پارے کہ بلوچستان پولیس تدوک آ کیہی سال آتیان دہشت گردی، انتہا پسندی و ڈوہ تا برخلاف اولیکو صف اٹ جنگ کننگ اٹی ءِ۔ پولیس نا بہادر افسر و ورناک تینا جان تا پرواہ ءِ کپرسا امن نا برجائی‘ ریاست نا رٹ انا سوگوی و شاری تا رکھ اکن بے مٹ قربانی تسنو۔ ہندا قربانی تا سوب آن اینو صوبہ ٹی امن و ایمنی نا حالیت آک جوان مسنو و دہشت گرد آتا ارادہ غاتے بے سہب کننگ انگ ءِ‘ میر سرفراز بگٹی خاص وڑ اٹ زیارت نا شہداءِ پولیس ءِ خراجِ عقیدت پیش کرسا پارے کہ دا عظیم آ ورناک دہشت گرد آتا برخلاف جنگ کرسا تینا جان تے ندر کریر و جیرت‘ استقامت و حب الوطنی نا ہندن ءُ درور اس جوڑ کریر ہرا مدام یات تخنگک۔ او پارے کہ زیارت نا شہید آتا قربانیک مچ آ قوم اکن گمر نا سوب ءُ و حکومت بلوچستان اوفتا پدخاہوت نا قربانی و سگ ءِ سلام پیش کیک۔ وزیراعلیٰ پارے کہ حکومت بلوچستان شہید آتا وارث آتا شرف، فلاح و آسودہی و مالی کمک ءِ ریاستی زمواری سرپند مرسا کیہی عملی گام گیج آتے کرینے و دا ریسہ مستی ہم گچین وڑ اٹ برجا تخنگک۔