ہیت آک خڑک تمانو، آبنائے ہرمز اینو نا دے پورو ملنگک،امریکی صدر ڈونلڈ ٹرمپ

امریکی صدر ڈونلڈ ٹرمپ پارینے کہ آبنائے ہرمز پگاہ پورو وڑ اٹ ملنگک۔ وائٹ ہاؤس اٹی میڈیا تون ہیت و گپ کرسا صدر ٹرمپ پارے کہ باندات زوت ایسر مریک‘ دا ہچ ءُ ول ویچڑ ءُ ہیت اس اف۔ آبنائے ہرمز نا ملنگ اولیکو ریسہ ءِ‘ ارٹمیکو ریسہ ٹی نیوکلیئر باندات آ ہیت مریک۔ ٹرمپ پارے کہ امریکہ دا ہیت آ پیدوار ءِ کہ ایران تون نیوکلیئر سلہہ مروئی اف۔ او پارے کہ آبنائے ہرمز اٹی ہچءُ فیس اس مفک اگہ پین کس اس چارج کرے تو امریکہ ہم چارج کیک‘ او دعویٰ کرے کہ امریکہ نا آبنائے ہرمز آ پورو کنٹرول ءِ‘ ایران تون دا گڈیکو وارخواہی ءِ کہ او دستاویز آ دستخط کے۔ دا بابت امریکی وزیر خارجہ مارکو روبیو پارے کہ آبنائے ہرمز ءِ ملنگ نا بابت ایران تون مروک آ مذاکرات اٹی پیش رفت مسنے، آبنائے ہرمز نا باندات آ بھاز زُت معاہدہ پک مریک‘۔ ایلو کنڈ آ امریکی وزیر خزانہ اسکاٹ بیسنٹ ایران تون پگہ ڈیل مننگ نا گمان درشان کرے۔ امریکی میڈیا ءِ انٹرویو ترسا امریکی وزیر خزانہ پارے کہ مننگ کیک ننا ایران تون آبنائے ہرمز نا باندات آ پگہ ڈیل مرے، او مستی پارے کہ دا ڈیل پگہ یا ا یلو دے ہم مننگ کیک۔ دا رد اٹ قطر نا وزارت خارجہ نا ترجمان ماجد الانصاری پارے کہ امریکہ و ایران نا نیام اٹی سفارتی ایسری کن کوشست کننگ انگ ءِ۔ ماجد الانصاری میڈیا تون ہیت وگپ کرسا پارے کہ ساڑی حالیت اٹی کل آن اہم انگا ہیت دادے کہ مذاکراتی ریسہ دوارہ بنا کننگے و ہڑتوم آ کنڈ آک ہیت و گپ انا میز آ پدی بریر۔ او پارے کہ قطر، پاکستان و عمان تون اوار خیرخواہی نا کڑد ادا کروک ملک آک امریکہ و ایران نا نیام اٹی مذاکرات ءِ مونی دننگ، رابطہ غاتے برجا تخنگ و مسودہ غاتا ہل وتس اٹ خڑک کمکاری کننگ اٹی ءُ تانکہ جھیڑہ نا پرامن و سفارتی ایسر اس کشنگ مرے۔