پہلا آل شہید مسعود جان ٹورنامنٹ 2026،شہید یاسر جان مینگل کرکٹ کلب فائنل اٹی بلوچ کلب چاغی ءِ کٹا
ٹورنامنٹ نا فائنل میچ متکن آ کرکٹ گراؤنڈ آ مس، شہید یاسر جان کلب بیٹنگ کرسا 229 رنز کرے
Get real time updates directly on you device, subscribe now.
شہید یاسر جان مینگل کلب اولیکو آل شہید مسعود جان کرکٹ ٹورنامنٹ 2026 نا فائنل اٹی بلوچ کلب چاغی ءِ کٹسا ٹائٹل ءِ تینا پن آکرے۔ سرجم حوال آتا رِد اٹ اولیکو آل شہید مسعود جان کرکٹ ٹورنامنٹ نا فائنل میچ متکن آ کرکٹ گراؤنڈ آ شہید یاسر جان کلب و بلوچ کلب نا نیام اٹی گوازی کننگا۔ ٹاس ءِ کٹسا شہید یاسر جان کلب اول بیٹنگ کرسا پک کروک 12 اوور اٹی اسہ وکٹ اسے نا نسخان آ 229 رنز جوڑ کننگ اٹی سرسہب مس ہراٹی سردار فیصل مینگل جوان گوازی کرسا 36 گیند آتیا 122 رنز کرے، وخت اس کہ خادم شاہ 35 گیند آ 89 رنز نا گچین اننگز گوازی کرے۔ بلوچ کلب نا سدیس کشانی اسہ وکٹ اس ہلک۔ ورندی ٹی گوازی کرسا بلوچ کلب 4 وکٹ نا نسخان آ 175 رنز جوڑ کرے ہراٹی محمد حسنین نا 76 رنز و اشفاق نا 26 رنز اوار ئسر۔ شہید یاسر جان کلب نا نوشیرواں 2 وکٹ ہلنگ اٹی سرسہب مس۔ دا وڑ دا میچ ءِ شہید یاسر جان کلب چاغی 56 رنز اٹ کٹسا چمپین مننگ نا شرف دوئی کرے۔ سردار فیصل ءِ جوان بیٹنگ آ میچ انا گچین آ گوازی گر گوندنگا۔ ٹورنامنٹ نا گچین آ بیٹسمین سردار فیصل و گچین آ باؤلر ناظم علی گوندنگا۔ دا شانی فائنل میچ انا خاص انگا مہمان سیف اللہ بڑیچ ئسکہ و اوڑتون محبوب عالم درانی، فرقان بڑیچ، خلیل خادم، عبدالرحمن بڑیچ و حاجی گل اوار ئسر ہرافک عبدالقدیر و اونا کمیٹی ءِ جوان ٹورنامنٹ نا بست و بند آ مبارکبادی تسر۔ اخیر اٹ خاص انگا مہمان سیف اللہ بڑیچ ٹورنامنٹ کمیٹی کن بیست ہزار روپئی تننگ نا پڑو کرے۔ ایمپائرنگ نا زمواری تے اسامہ لیفٹی و حکمت اللہ سر تسر وخت اس کہ اسکورنگ نا ڈیوٹی ءِ محمد یونس و فائنل میچ انا لائیو شو احمد آفریدی کرے۔ چاغی (نامہ نگار)