پاکستان بھارتی نا کانود آن چَپ کشمیر آ کوزہ نا برخلاف کڑد ادا کرسا کیک،صدر مملکت آصف علی زرداری

صدر مملکت آصف علی زرداری پارینے کہ پاکستان بھارتی کانود آن چَپ مقبوضہ جموں و کشمیر نا الس نا اخلاقی، سیاسی و سفارتی مخ تفی ءِ برجا تخک۔ نن ہر جہانی فورم آ تینا توار ءِ چست کرسا کینہ‘ تانکہ جموں و کشمیر نا جھیڑہ اقوامِ متحدہ نا سلامتی کونسل نا تعلقدار قرارداد آتا و کشمیری الس نا است خواہی تا رِد اٹ ایسر مف۔ یومِ استحصالِ کشمیر آ کلہو اٹی صدر آصف علی زرداری پارے کہ اینو نن یومِ استحصالِ کشمیر آ بھارتی کانود آن چَپ مقبوضہ جموں و کشمیر نا الس تون تینا نزور مفروک یکجہتی نا عزم ءِ کینہ۔ نن اوفتا بہادری، استقامت و چٹپروک وتواجہی نا حق انا دوئی کننگ کن اوفتا انصاف اٹ جہد ءِ خراجِ تحسین پیش کینہ۔ اینو بھارت نا 5 اگست 2019 نا ہمو کانود آن چَپ و تینا خودآن کروک گام آتے ہفت سال پورو مسنے، ہرافتا کمک اٹ او جہانی کانود و اقوامِ متحدہ نا سلامتی کونسل نا تعلقدار قرارداد آتا خلاف ورزی کرسا جموں و کشمیر نا جہانی وڑ اٹ امنائی جھیڑہ ئی حیثیت ءِ بدل کننگ نا کوشست کرے۔ دا گام آک نئے تو دا جھیڑہ نا کانودی حیثیت ءِ بدل کننگ کیرہ و نئے کشمیری الس نا عزم ءِ نزور کننگ کیرہ۔ صدر پارے کہ تدوک آ ہفت سال آتیان لکھ آ کشمیریک بھاز پابندی تون زند گدریفنگ اٹی ءُ، ہرا اوفتا ہڑدے ئی زند انا ہر پہلو ءِ زہمی کرینے۔ خاہوت آک بے باوری نا حالیت نا گواچی ءُ، ورنا تیکن وارخواہیک کچ اٹی ءُ و راج ءِ اسہ بھلو جھیڑہ و بے سوگوی نا مون تروک ءِ‘ دا کل خواری تیان پد ہم جموں و کشمیر نا الس انصاف نا دوئی و تینا آخبت نا فیصلہ ءِ تینٹ کننگ نا روا انگا حق کن استقامت اٹ سلوک ءُ۔ صدر پارے کہ پاکستان بھارتی کانود آن چَپ مقبوضہ جموں و کشمیر نا الس نا اخلاقی، سیاسی و سفارتی مخ تفیءِ برجا تخک۔ نن ہر جہانی فورم آ تینا توار ءِ ہمو وخت اسکان چست کرسا کینہ‘ تانکہ جموں و کشمیر نا جھیڑہ اقوامِ متحدہ نا سلامتی کونسل نا تعلقدار قرارداد آتا و کشمیری الس نا استخواہی تا رِد اٹ ایسر مف۔ صدر پارے کہ سویلی ایشیا ٹی مدامگی و انصاف آ تالان امن کن جموں و کشمیر نا جھیڑہ نا پرامن ایسری تون گنڈوک ءِ۔ ای جہانی برادری، خاص وڑ اٹ اقوامِ متحدہ غا زور شاغوہ کہ او بھارتی کانود آن چَپ مقبوضہ جموں و کشمیر اٹی انسانی حق انا خراب حالیت نا نوٹس ہلے و دا متکن آ جھیڑہ نا انصاف اٹ ایسری کن تینا بھرمی کڑد ءِ ادا کے۔