بلوچستان نا حالیت آک بے مٹ افس، بھاز خراب ہم پاننگ کپنہ تا، وزیراعلیٰ میر سرفراز بگٹی

وزیراعلیٰ بلوچستان میر سرفراز بگٹی پارینے کہ بلوچستان نا حالیت آتے نئے تو پورو وڑ اٹ دروری گوندنگ مریک ولے نئے ہمو ہیت راست ءِ کہ ہرا منہ تپہ ناکنڈآن بلوچستان آن پیشن پیش کننگک۔ راستکی دادے کہ دا ہڑتوم آ انتہا تا نیام اٹی ءِ‘ وخت اس کہ منفی زہم و اسہ کنڈ آ تالان بیانیہ نئے بیرہ صوبہ بلکن ریاست پاکستان و حکومتی گام گیج آتے ہم نسخان رسیفنگ اٹی ءِ‘۔دا خیال آتا درشانی ءِ اسہ ٹی وی پروگرام اسے ٹی ہیت وگپ کرسا کرے۔ وزیراعلیٰ میر سرفراز بگٹی پارے کہ قومی میڈیا ٹی بلوچستان ءِ گیشتری بیرہ ہمو وخت یات کننگک ہراتم بے چیٹی نا واقعہ اس پیش برے، وخت اس کہ صوبہ ٹی مروک آ مثبت پیش رفت، شونداری ڈٹ و اصلاحات آتیا جوان چکار کننگپک۔ او پارے کہ ورنا تا فلاح و آسودہی نا کیہی پروگرام آک برجا ءُ، سرکاری ہسپتال آتا کاریم تے تی نمان جوانی بسنے، صوبہ نا کل سرکاری اسکول آک فعال مسنو و 17 ہزار استاد آتا بھرتی پورو شفافیت و میرٹ نا بنداو آ کننگانے، ولے ارمان دادے کہ دا سرسہبی تے قومی میڈیا ٹی ہمو ہند ملپک ہرانا اوفک حقدار ءُ۔ وزیراعلیٰ پارے کہ بلوچستان ءِ اونا جغرافیائی راستکی تا رد اٹ پہہ مننگ نا گرج ءِ‘ او پارے کہ مستین اٹی منہ ڈویژن و ضلع غاتا رقبہ ہنداخس مر ئس کہ بھرمی انتظامی چاروکی مننگ کتوکہ‘ ہندا گرج نا رِد اٹ پوسکن آ ڈویژن و ضلع غاک جوڑ کننگ انگ ءُ تانکہ الس اسکان ریاست نا رسینگ گیگ جوان مرے، انتظامی پنجر ءِ سوگو کننگ مرے و مُر انگا پدتموک علاقہ غاتا الس ءِ سرکاری خذمت آک اوفتا درگہ غا فراوان کننگ مریر۔ او پارے کہ چنکو نتظامی یونٹ جوڑ کننگ نا مسخت گورننس ءِ بھرمی جوڑ کننگ، السی ویل آتا دمدستی ایسری ءِ پک کننگ و پدتموک علاقہ غاتے قومی شونداری نا دنگ اٹی اوار کننگ ءِ اوپیدوار کرے کہ دا گام السی خذمت، انتظامی آسراتی و ریاستی ادارہ غاتا بھرمی ساڑی گری ءِ پک کننگ کن کننگ انگ ءِ۔ میر سرفراز بگٹی پارے کہ دنیا نا بھلا واکدار آک و جہانی برادری پاکستان نا ریاست تون سلوک ءُ، نہ کہ دہشت گرد تنظیم آتتون۔ او پارے کہ اوغانستان نا ڈغار آن پاکستان دشمن دہشت گرد آتے آسراتی و کاٹم خواجہی رسینگ انگ ءِ، حالانکہ جہانی برادری تون کروک قول تا رد اٹ اوغان ڈغار پین اسہ ملک اسے نا برخلاف کاریم اٹ اتنگ مفک۔ او پارے کہ دہشت گرد تنظیم آتا جتا جتا ٹولی تا پدپشت کمکار‘ مالی کمکار و ہیلکاری فراوان کروک آک اسہ انڈین نیٹ ورک “را” تون گنڈوک ءُ و ہندا کل انا بھلا آئی ءِ۔ بلوچستان نا جغرافیائی حالیت، مُر انگا سیم‘ سخت انگا مشی آ علاقہ و چٹ ہلوک دہشت گردی نا برخلاف کارروائی تے پین ول ویچڑ کیک۔ ولے ہ، سیکورٹی فورس آک پورو زمواری اٹ کانود نا دنگ اٹی مرسا کارروائی کننگ اٹی ءُ۔