براہوئی ادیب حوال(6)۔

منہ دے مُست یکپاسی ٹرسٹ مستونگ نا نیمہ غان اسہ دعوت نامہ اس رسینگا کہ ہراٹی یکپاسی کانفرنس کہ داٹی سید علی محمد شاہ نا کتاب ”نعت انا سفر“ نا مون پاشی و مشاعرہ اسے نا پڑو ئس۔ دا مُچی ٹی ہِننگ کِن سنگت آک سلاہ سوج کرین و گڑاس سنگت سہب انا پیش تمار و گڑاس نیمروچ تون مستونگ آ تینے سر کریر۔ کن تون اوار ”تلار“ اخبار نا ایڈیٹر عبدالرازق ابابکی تُد ئس۔ نن دوانزدہ بجہ غا مستونگ آ سر مسن۔ دا مُچی یکپاسی ہاؤس محلہ سادات اٹ اڈ تننگاسُس۔ ننے آن مُست مستونگ و ایب و کیب انا ادیب و شاعر آک مُچ ئسر۔ اوفک ننے بخیر کریر۔ زرہ سے آن گُڈ براہوئی منقبتی مشاعرہ نا بِنا مس، ہرانا مہماندار پنی آ شاعر حاجی شاہ بیگ شیدا ئس۔ دا مشاعرہ نا کماشی ءِ یکپاسی ٹرسٹ نا کماش سید علی محمد شاہ ہاشمی کرے و مہمان خاص مسکوہی سینیٹر و سفیر میر حسین بخش بنگُلزئی ئس۔ دا مشاعرہ ٹی پنی آ بزرگ شاعر رحیم ناز، سید غریب شاہ انجم، صابر ندیم، مولوی محمود احمد، حسن ناصر، بشیر شاہ، حاجی حیات منصور، قیوم بیدار، شاہ بیگ شیدا، فتح محمد شاد، فیض بولانی، منیر فردوس، مولوی محمد احمد، عطاء انجم، بشیر شاد، حیدر آتش، ہدایت فدا، عطا انجم، نذیر حسرت، رحیم ویدن، سرور مہر، فرمان نسیم و ایلوفک کلام بنفیر۔ 

مشاعرہ غان پد ننا ایلو سنگت آک کہ اوفتے ٹی افضل مراد، وحید زہیر، اختر چنال و اے ڈی بلوچ اوار ئسر، کوئٹہ غان سر مسر۔ دا نیام اٹ میر حسین بخش بنگُلزئی و سید محمد علی شاہ تون اسہ جوان ءُ کچاری اس مس۔ میر حسین بخش بنگُلزئی نا تعلقداری قلات آن ءِ، و اختر چنال و وحید زہیر ہم قلات آن تعلق تخرہ۔ ہندا خاطر آن قلات نا تاریخی، ادبی، ربیدگی حوالہ غاتیٹ گچین ءُ ہیت و گپ مس، خاص وڑ اٹ قلات نا مخلوق نا ملنڈ و مسخرہ و بوگ شوگ نا بارو اٹ سرجمی اٹ ہیت کننگا۔ نیمروچ نا اِرغ آن گُڈ سَے بجہ غا پروگرام نا ارٹمیکو بشخ بنا کرے۔ دا بشخ اٹی سید محمد علی شاہ نا کتاب ”نعت انا سفر“ نا مون پاشی کننگا۔ 

براہوئی زبان اٹی نعت انا تاریخ نا بارو اٹ اولیکو وار اسہ گچین ءُ کتاب اس ”نعت انا سفر“ نا پِن اٹ مستونگ نا پنی آ عالم سید علی محمد شاہ ہاشمی پٹ و پول کرسا اسہ گچین ءُ کتاب اس مون آ ایس، ہرا کم و ود 470 پنہ غا تالان ءِ۔ دا کتاب یکپاسی ٹرسٹ مستونگ نا پارہ غان شینک مسنے۔ کتاب نا مون پاشی نا دود 6 ستمبر 2020ء آ مستونگ اٹی اڈ تننگا۔ ہرانا کماشی ءِ اسلام آباد آن بروک آ پنی آ سکالر، چندی کتاب آتا مصنف، پروفیسر سید احمد سعید ہمدانی کرے۔ خاص انگا مہمان مسکوہی سینیٹر سفیر و صوبائی وزیر میر حسین بخش بنگُلزئی ئس، وخت اس کہ مہمان تے ٹی اکادمی ادبیات نا ریجنل ڈائریکٹر افضل مراد، براہوئی ادبی سوسائٹی نا چیئرمین عبدالقیوم بیدار، پنی آ شاعر و کالم نگار وحید زہیر اوار ئسر۔ و اسٹیج سیکرٹری حسن ناصر ئسکہ۔ تران کروک آک پاریر کہ براہوئی ٹی پٹ و پول نا رد اٹ اسہ گچین ءُ کتاب اسے کہ ہراٹی عربی، اردو، پنجابی، سندھی، سرائیکی، پشتو، بلوچی و براہوئی زبان تیٹی نعت گوئی نا بارو اٹ سرجمی اٹ پٹ و پول کننگانے و شاعر آتا پِن و نعتیہ کلام نا نمونہ غاک تننگانو ہراکہ براہوئی ادب اٹی اسہ بھاز گچین ءُ گیشتری اسے، دا کتاب آن براہوئی زبان آن بیدس ایلو زبان تا اسکالر آک ہم فائدہ ہرفِنگ کیرہ۔ دا سرحال آ ہر زبان نا اسکالر آک ایم فِل و پی ایچ ڈی کننگ کیرہ۔ تران کروک آک پاریر کہ سید علی محمد شاہ ہاشمی اسکالر آتے کِن راہشونی اس کرسا اوفتے اسہ گچین ءُ سرحال اسے نا نیمہ غا خیالداری کرفے۔ اوفک پاریر کہ دا اسہ آسان ءُ کاریم اس اف۔ حاجی شاہ بیگ شیداؔ کتاب نا بارو اٹ پارے کہ ”نعت انا سفر“ اٹی خواجہ سید علی محمد شاہ نعت انا پورو آ تاریخ آ نظر شاغسا بھاز خواری اٹ عہد رسالت آن مُست و عہد رسالت، صحابہ کرام، تابعین وتب تابعین و اوڑان پد اینو اسکان خواجہ دو عالمؐ نا شان اٹی ہرا کہ عربی، فارسی، اردو، سندھی، سرائیکی، بلوچی، پشتو و براہوئی ٹی نعت گوئی مسنے، اونا تاریخ ءِ کتاب آتا حوالہ اٹ ”نعت انا سفر“ اٹی ایسنے ہرا چار سد آن زیات پنّہ غاتیا تالان ءِ۔ اینو پگہ تحقیق اٹی ایم فِل و پی ایچ ڈی کروک آ طالب علم آک داخہ بھلو تحقیق مون آ اتنگ کپسہ، ہرادے شاہ صاحب مون آ ایسنے۔

گُڈ سر اٹی سید محمد علی شاہ پارے، ”نعت انا صنف بھاز ہُرے نا ءِ و قدیم ءِ۔ نعت انا ہم اسہ تاریخ اسے کہ بنا غان دا وخت اِسکان تین تون گنڈوک، تفوک و گوفوک ءِ۔ نعت انا کل نمونہ و طریقہ غاک شان و شرف والا ہستی نا شان و شرف ءِ بیان کیرہ۔ نعت انا بنا صحابہ کرام آن مریک۔ و تابعین و تب تابعین آن مرسا نسل در نسل دنیا نا ہر کُنج اٹی تالان مس۔ دا وخت اسکا ہر زبان اٹی نعت انا بھلو کوڑی اس ساڑی ءِ۔ صحابہ کرام آتیان مُست اولیکو قصیدہ ءِ جناب رسول اللہؐ نا اِلّہ جناب حضرت ابو طالب پارینے کہ اونا وسیلہ اٹ پِر اکِن دُعا خواہسنے۔

ہفتئی تلار

تاک: 36

19-25 September 2020

پنہ، 4