فوج آئینی دنگ اٹ سلسا جمہوری حکومت تون سلوک ءِ، اپوزیشن نا تحریک آن ہچ ءُ خلیس اس اف، عمران خان

اسلام آباد(آن لائن) وزیراعظم عمران خان پارینے کہ فوج آئینی حد اٹ سلسا جمہوری حکومت تون اوار ءِ و اپوزیشن نا تحریک آن ہچ ءُ خطرہ اس اف۔ وزیراعظم عمران خان نا کماشی ٹی پارٹی کماش و ترجمان تا دیوان ایسر مس۔ دیوان اٹ ملک انا ساڑی سیاسی حالیت آ حکومتی حکمت طے کننگا و اپوزیشن نا پڑو کروک آ حکومت مخالف تحریک آ ہم سلاہ مس وخت اس کہ اپوزیشن نا برانز و جلسہ غاتا جوابی حکمت عملی آ سجفنگا۔ بشخندار آتے مسلم لیگ (ن) نا کماش نواز شریف نا وطن واپسی نا بابت حکومتی گام گیج آتیا بریفنگ تس وخت اس کہ حکومتی ترجمان آتے پاور سیکٹر اٹ اصلاحات آتیا بریفنگ تس، وزیراعظم عمران خان حکومتی سلاہ غا ترجمان تے اہم ءُ پارت کرے۔ او وخت آ وزیراعظم عمران خان پارینے کہ قوم ادارہ غاتون سلوک ءِ، سول ملٹری تعلقداری ٹی ہچ ءُ خرینی اس اف، فوج آئینی حد اٹ سلسا جمہوری حکومت تون اوار ءِ، اپوزیشن نا تحریک آن ہچ ءُ خلیس اس اف، اپوزیشن ءِ فوج تون ہندا سوب آن ویل ارے کہ او اوفتا وڈی خوری ءِ ہلیک۔ وزیراعظم ترجمان و پارٹی راہشون اپوزیشن ءِ ایکسپوز کننگ و بنجائی وزیر تے متحرک مننگ نا پارت کرسا پارینے کہ مچ آ قوم اسٹ مرسا بھارتی سازش ءِ بے سہب کیرہ۔ فوج نا دشمن پاکستان نا دشمن ءِ، حکومت تینا ادارہ غاتا رکھ ءِ کیک۔