کشمیر گچین کاری،قائم مقام صدر کشمیر چوہدری لطیف آ جلہو، پی پی نا کارندہ اسے نا خون

قائم مقام صدر آزاد جموں و کشمیر چوہدری لطیف اکبر آ جلہو کننگا وخت اس کہ پیپلز پارٹی الیکشن کمیشن ءِ ہلہلہ ئی غاو کرسا دمدستی کارروائی و دوبہ دار آتے دزگیر کننگ نا خواست کرے۔ پیپلز پارٹی نا رِد اٹ پولنگ نا دے گچینی کاری تا وخت آ قائم مقام صدر آزاد کشمیر و پارٹی اومیتدار چوہدری لطیف اکبر آ جلہو کننگا، ہرا نئے بیرہ گچین کاری عمل بلکن ریاست نا آئینی وقار آ ہم جلہو اسے۔ پیپلز پارٹی نا رِد اٹ یاسر شاہ، احمد شاہ و فواد شاہ چوہدری لطیف اکبر آ جلہو کریر۔ پارٹی پارینے کہ قائم مقام صدر آ جلہو بیرہ اسہ گچین کاری بے ضابطگی اسے اف بلکن ریاست نا آئینی منصب و ریاستی نظم آ جلہو ءِ۔ پیپلز پارٹی نا رِد اٹ پندار دوبہ دار آتا برخلاف ایف آئی آر درج کننگ انگ ءِ و اوفتا دزگیری کن کارروائی برجا ءِ۔ پارٹی خواست کرے کہ الیکشن کمیشن جلہو نا دمدستی و بڑزکو کہولی نوٹس ہلے و پولیس و ضلعی انتظامیہ تون حوال کرسا یاسر شاہ، احمد شاہ و فواد شاہ نا برخلاف مقدمہ درج کننگے۔ ایلو کنڈ آ صدر ریاست آزاد جموں و کشمیر چوہدری لطیف اکبر آ جلہو آن پد اونا گچین کاری حلقہ ایل اے 31 اٹی پیپلز پارٹی کارندہ مشتاق شاہ ءِ خونی جلہو اٹی شہید کننگا۔ پیپلز پارٹی نا چیئرمین بلاول بھٹو زرداری ایل اے 31 اٹی پیپلز پارٹی کارندہ مشتاق شاہ نا خون نا مذمت ءِ کرسا شہید کارندہ نا پدخاہوت تون است ہسونی نا درشانی کرے۔ بلاول بھٹو زرداری پارے کہ اول صدر ریاست آزاد جموں و کشمیر چوہدری لطیف اکبر آ جلہو و ولدا اونا گچین کاری حلقہ ٹی کارندہ مشتاق شاہ نا شہادت آن مسلم لیگ (ن) نا نیت پاش مس۔ مسلم لیگ (ن) نا پن آزاد کشمیر اٹی کرینگ آنبار مریک۔ داڑے دھاندلی کرسا مسلم لیگ (ن) نا سرسہب مننگ الس نا ریاست آ پت ءِ چٹفک۔ چیئرمین پیپلز پارٹی پارے کہ سم، لٹ و زور و بیدادی اٹ مسلم لیگ (ن) آزاد کشمیر نا الس نا وونٹ آ داڑیلی کننگ اٹی ءِ۔ وزیراعظم آزاد جموں و کشمیر فیصل ممتاز راٹھور صدر ریاست آزاد جموں و کشمیر چوہدری لطیف اکبر آ جلہو نا نوٹس ہلک۔