گدان ادبی دیوان نا عئید مجلس

گدرینگوک آ دے گدان ادبی دیوان نا کنڈ آن اسہ مشاعرہ و عئید مجلس اس اڈ ہلک۔ ہرانا بنا تلاوت کلام پاک آن مس، تلاوت کلام پاک نا بختاوری ءِ گدان ادبی دیوان نا فنانس سیکرٹری حاجی فرید فراق مہر دوئی کرے۔ شونکاری نا دود آتے گدان ادبی دیوان نا جنرل سیکرٹری ادیب دانشور عنایت ساغر سر تس۔

مجلس نا کماشی ءِ گدان ادبی دیوان نا چیئرمین سلام الفت بلوچ کرے وخت اس کہ مجلس نا خاص انگا مہمان رخشان ادبی دیوان پنجگور نا باسک کریم اسیر ئس و اعزازی مہمانک حاجی فرید فراق مہر و سوراب نا پنی آ شاعر و ہر جائی کتاب نا خالق اسماعیل خنجری ئسک ئسر۔ مہمان تتون سنگتی کن گدان ادبی دیوان نا بانی و سرخیل ادیب دانشور گچین آ شاعر عاقب شکیل بلوچ اسٹیج آ ساڑی ئس۔

مجلس اٹی ساڑی گدان ادبی دیوان نا مجلسِ عاملہ نا باسک ادیب دانشور شفیق حسرت بلوچ مجلس آن تران کرسا پارے کہ گدان ادبی دیوان مدام علمی فکری تربیتی نشست آتے برجا تخسا بسنے شاعر ادیب راج انا خن پن مریرہ۔ راجی ظلم زوراکی تے پیدوار کرسا راہشونی کیرہ۔ اینو نا شاعر و ادیب راجی ویل آتا ایسری کن قلم نا کوپہ مرسا کڑد اس ادا کے۔مجلس اٹی غلام غمخوار، استاد جان علی، سعید سوز، صدف بلوچستانی، شعیب رئیسانی، شاہد رئیسانی، صابر ارشاد، مراد مجروح، امین صابر و ایلو ادب دوست آ سنگت آک ساڑی ئسر۔

ہفتئی تلار
تاک: 27
23-17 جولائی 2021ء
پنہ: 07