ہر ہیت کننگ و پاننگ نا اف

نفسیات نا علم چندی قوم آتا زند اٹی پیش مروک آ و بروک آ ہڑ و جنجال آتیان اوفتے رکھنگ نا کاریم ءِ کرسا اوفتے ٹی زند ءِ پہہ مننگ نا کمال ودی کرینے۔ نفسیات نا رد اٹ ہر ہیت کننگ و پاننگ نا مفک۔ نن اودے دن پہہ مرین کہ ہراتم اِرا بندغ اِرا خاہوت اٹی گڑا سے نا جھیڑہ اس مریک، تو میڑھ مرکہ نا وخت آ فیصلہ ٹی سیانڑاک پارہ ”دا ہیت کننگ نا اَلو۔ ہراڑان دا خاخر بش مس۔“ اوفتا ہیت ءِ بنوک و کروک آ ہڑتوم آک شکی خننگرہ۔ ہیت ءِ کروک آ تینا آمخی آ و بنوک آ تینا کم عقلی آ شکی خننگک۔ دا وخت آ کورونا وائرس نا دے پہ دے آ تالان مننگ بندغ آتے سابت کیدنگ نا ہیت مننگ اٹی ءِ۔ سوشل میڈیا چٹ بندغ آتے گنوک کرینے۔ ہرافتے ٹی تولوک آ بندغ آک موبائل آتتون لچوک ءُ۔ کس مشغولی ٹی دروغ راست نوشتہ کننگ اٹی ءِ۔ کس متکن آ فلم آتے داسہ نا حالیت آتتون گنڈنگ اٹی ءِ۔ کس پوسکن ءُ اپڈیٹ کروک ءُ فلم اس راہی کرسا گمراہی نا کسر ودی کننگ اٹی ءِ۔ ہرافتتون ٹیکنالوجی نا علم اف، او دافتیان چندی تے راست خیال کننگ اٹی ءُ۔ چندیک راست ءِ دروغ تکنگ اٹی ءُ۔ ظلم دا کہ تینا معصوم آ، کودک و بے علم آ خاہوت نا بندغ آتے ہندا ہیت و فلم آتیان معلومداری تننگ ءِ ہم وخت تیری تکنگ اٹی ءُ۔ دا ہیت انا دن انگا بندغ آتے سما اف کہ ایلو بندغ آ نفسیاتی اثر آک اخہ در زیات مرور۔ دا ہیت آتیان امر ءُ شک ودی مننگ اٹی ءُ۔ دا ہیت آتیان اگہ کورونا نہار اس اف تو نہار اس جوڑ مسنے، و اگہ نہار اس ارے ہم تو بولو اس پاش مننگ اٹی ءِ۔ دا وخت آ گرج دا گڑا نا ءِ کہ بندغ اٹی داخہ چاہنداری بایدے مرے کہ ہرا ہیت ءِ مستی دروئی ءِ ہرا ہیت ءِ چپی اٹ کٹفوئی ءِ۔

اینو نا دا حالیت اٹی دا ہیت مون آ بسنے کہ گڑاتا بارو اٹ یا ٹیکنالوجی نا بارو اٹ علم اخہ در المی ءِ۔ دنیا ٹی دا ہیت پاش مس کہ ہرا ملک آک تینا ایٹم بمب آتیا بلنگارہ، اوفتے سما تما کہ داڑان ہم بھلو واکداری ارے۔ ہرافتے تینا پزور آ دُو تیا ناز ئس، کہ او گڑا تے بڑزا کریرہ ڈغار اٹی خلکرہ۔ اوفتے ہم سما تما کہ زمان اٹی اوڑدہ تموک آ وائرس تون سلہہ و دُو انا واکداری اٹ جنگ تننگ مفک۔ گڑا مگہ بندغ ءِ سما ئس کہ اودے دن ءُ بے سما ءُ واکداری اس تین پہ تین دُو ہلنگ آن تورو ءِ۔ دروت آ رکھ خلو ءِ۔ لمہ باوہ چنا تے تینا ’نادرست‘ نا خلیس آن خمب کننگ آن سلور۔ دنیا نا دوسَد آن زیات ملک انا مخلوق اسہ چنکو وائرس اسے تون دن جنگ ترو ءِ۔ یا اونا مون آ بے وسی اٹ ہُرو ءِ؟ سائنس حیران ئس کہ بروک آ گلوبل وارمنگ ءِ امر توننگے، کہ اوڑان بروک آ وخت اٹی بھسکاری مریک۔ ولے قدرت گلوبل وارمنگ آن اونا جان ءِ خلاسی کننگ کن کورونا ءِ راہی کرے۔ کارخانہ غاک بند مسر، موٹر آک اُرا و سڑک نا پاناد آتیا سلیسر۔ چٹ آسمان چاگڑدی کچٹی آن سلیس۔ گلوبل وارمنگ پد سلیس۔ دنیا ٹی تینے خدا تکوک آک، خدا نا مون آ دُو تفوک سلوک ءُ۔ مذہب نا روح ءِ پہہ مننگ نا جاگہ غا مذہب ءِ بہا کروک آتا حالیت ہم ہُننگ کڑزک۔ ظلم کروک آئے سما تمانے کہ اوڑان ہم بھلو واکداری اس ارے، ہرا اونا ظلم ءِ توننگ کن مست پشہ راہی کرینے، اینو وائرس اس راہی کرے۔ مزغ ءِ قدرت اونا کچ اٹ فراخی تسنے، دادے پوکنا غانبار پدام تننگ نا پد ترخنگ ءِ۔ دنیا نا چاہنداری آ ہرافک تینا زند ءِ کنگر، او بندغ آتے بد و جوان انا فرق ءِ پاریر، نن اوفتا جہد و کوشست آن گڈ نوشتہ کروک آ علم آن خن تے چپ کرون تو نن تون ہندن مرو ءِ۔ بایدے نن نفسیات تون اوار ہر وڑ انا علم انا واکداری ءِ پہہ مرین تاکہ زند و مرک آسان مرے۔ ہر بندغ دا گمر آن پیش تما کہ مرک حقی ءِ۔ کل ءِ کہوئی ءِ۔ مرک پڑدہ و ایمان نا مرے تو او آسرات ءُ زند اس خنو ءِ۔ ایلو اگہ بندغ ہراتم اسکان تینے ٹی گٹ ءِ، اودے آسراتی نصیب مفرو ءِ۔ زند انا مسخت ءِ پہہ مننگ کن قدرت نا تروک آ اصول آتتون سنگتی المی ءِ۔ پٹ و پول و علم انا گمر ہم بندغ نا کاٹم ءِ کنیک۔ ہرانا سبخ ءِ اینو کورونا وائرس نا حقی و سازشی آ وجود ننے تننگ اٹی ءِ۔ داڑان گڈ علم آن چَپ ہنوئی اف۔ بندغ نا بندغ نا مون آ گمر جوان اف۔ زند انا وخت و پاس آتے ساڑی آ مہر ءِ یلہ کروئی اف۔ آدم نا اولیاد آک اسٹ ءُ۔ اوفتے ٹی مَون و پیہن نا فرق اف۔ مُر و خڑکی نا فرق اف۔ دنیا کس انا اف۔ نئے کس اکن جتا جوڑ مسنے۔ نئے کس تینے کس آن جتا تکّے۔ دا ہیت ءِ کورونا پاش کرے۔ سلیس ہیت بے انصافی کروک آتا تو اوفتے اوفتا گمر کننگ اٹی ءِ۔ اسٹ ایلو نا حق آتے خلوک آتے ہم سما تمانے کہ اوفتا ہچ ءُ گڑاسے آ حق اف۔ داسہ بندغ دا ہم سوچو ءِ، بیزار ءِ ایکڑ آتا ڈغار آن، وخ کہ اِرا گز ڈغار کھڈ مننگ کن نصیب مرے۔

ہفتئی تلار

تاک: 21

P# 01

30 May- 05 June 2020