رنگ ریز

متکن آ پیٹی ٹی چارتل کروک آ پیہن آ گُد غٹ ءِ پچ آتا نیام اٹی تخوک ئس۔ او ہر مسہ چار نوک آن گڈ پیٹی نا کل ءِ پچ آتے پیشن کشاکہ، پیٹی ءِ چنڈسا تینا منت آ سفا کریکہ۔ پدا اسہ جتا ءُ ناز و لاڈ اسے ٹی غٹ ءِ پچ آتے پیٹی ٹی تخاکہ۔ ایلوپچ آتا ہند بدل مرسا ہناکہ، ولے پیہن آ گُد انا ہند مدام ہمو ئسکہ، ہراڑے کہ اودے اولیکو وار خوندی کرسا تخاسس۔ پچ انا ہر جوڑہ تون اونا اسہ یات اس گنڈوک ئس، او ہرا وخت کہ پیٹی آن پچ آتے کشاکہ، یات آک اودے اسہ پین دنیا سے ٹی دریرہ، او پچ انا ہر جوڑہ ءِ ہرفسا، ہُرسا اسہ سوچ اسے ٹی ڈُب ہلککہ، تین تون تینت ہیت کریکہ۔

دا ہفت رنگ ءِ آئی تینا دو اٹ لگفیسس، دا گلابی آ جوڑہ ءِ ادی گراں ناز کنا سانگ آ ٹیکی کریسس، دا شیشہ چانپ ءِ تاتہ نا مسڑ گل بی بی بھاز خواری اٹ تیار کریسس۔ دا پوسکن آ جوڑہ غا سیاہ دوچ نا کشیدہ ءِ آئی ننا ہمسائے بلی ناز بی بی آن کرفیسس۔ دا گونکی آ جوڑہ ءِ ای تینٹ اخہ خواری اٹ موسم نا کشیدہ کریسٹ۔ دا نسواری آ جوڑہ ءِ کن کن ایلم نا اُرائی پڑیوار کریسس۔ دا نیلی آ جوڑہ نا تُوف آتے ماما نا مسڑ نور بی بی تخاسس، اونا پچ آتا ہر جوڑہ اسہ جتا ءُ کشیدہ اس ئسکہ۔ جوَک، زیبا دل پسند، دوسوتی، خامک، زیبا بختیار، لہڑی کشیدہ، موسم تڑو، بگٹی تڑو، آن بیدس اونا جوڑہ غاک پین کشیدہ ہم ئسرہ…… ہندن او ہر جوڑہ ءِ پیٹی ٹی تخنگ آن مست بھاز تہکیر اٹ ہرسا تدوک آ ساہت آتے است آ ایسکہ، اونا خنک خڑینکی مسرہ۔و لدا ہمو ساہت اٹی اونا جوڑ تیا چنکو بشخندہ اس تالان مرسا اونا مونجا غا زند اٹی خوشی تا چنکو ساہت اس ایسکہ۔ ولے بسٹ ارٹمیکو ساہت اودے ہنداخہ مونجا کریکہ کہ دا مونجائی بروک آ کیہی دے تسکان اونا زیبا غا دروشم نا بشخ اس جوڑ مسکہ۔ اونا خن تیٹی مونجائی نا عکس مونجائی تے پین تالان کریکہ۔ ولے اسہ ہیت اس اودے تینٹ ہم حیران و ہبکہ کریکہ کہ پیہن آ گد ءِ ہرفنگ تون اونا خن تا خڑینک آک ہندن بارسرہ دن کہ ڈکال نا دے تیٹی ٹاک نیم روچ نا وخت آ ریکستان نا بارن آ ریک آک مریر۔ 

اودے دا پیہن آ گد تینا ساہ آن ہم زیات دوست ئسکہ۔ او دا پیہن آ گد انا ہنداخہ خیالداری ءِ تخاکہ کہ دن چا اونا ساہ ہندا پیہن آ گد انا پلو اسے آ تفوک ئس۔ ہندا سوب ئس کہ پنچ سال گدرینگ انگ آن پد ہم پیہن آ گد آ ہچ ءُ کرنچ اس اَلوکہ۔

نورل ماہ گنج نا اِلہ نا مار ئس۔ اوفک اسہ خاہوت اٹی چنک بھلن مسوسر۔ خاہوت نا اسٹی اوفتے اسہ ایلو آن پین خڑک کریسس۔ او اسہ ایلوڑکن چنکی آن مسرہ۔ و اسہ ایلوڑکن بھلو مہر اس تخارہ۔ چنک آن بھلن مرسا اوفتا مہر ہم ودسا ہناکہ۔ دیک تدینگسا ہنار، نورل میٹرک نا امتحان ءِ پاس کرے تو اودے تینا تعلیم نا رد اٹ شار آ ہنوئی تما۔ نورل تینا و ماہ گنج نا آخبت کن گچین ءُ تغ اس خناسس۔ دا تغ ءِ حقی ءُ دروشم اس تننگ کن بھاز خواری اٹ خواننگ نا بناءِ کرے۔ او ہر تُو آ خلق آ بسکہ، اونا بننگ تون ماہ گنج نا مونجائی گلانی اسے ٹی بدل مسکہ۔ دا مونجائی و گلانی ءِ خاہوت نا چنا بھلا کل سرپند مسرہ۔ نورل نا شار آ ہننگ نا یک و نیم سال آن گڈ اسہ جار اس نورل اُرا غا بس تو اونا لمہ باوہ ماہ گنج نا باوہ غا اوڑکن رسال ہنار، اسہ اُرا نا ہیت ئسکہ، ماہ گنج نا باوہ اوفتے اؤ تس، بروک آ تو اٹی اوفتا سانگ انا دود ہم سر تننگا۔ نورل و ماہ گنج انا است انا مراد پورو مس۔ نورل دوانزدہ جماعت نا امتحان ءِ تننگ آن گڈ خلق آ بس تو تینا است پسند اٹ ماہ گنج کن اسہ پیہن ءُ گد اس ٹیکی ایس۔ او دا گد ءِ ماہ گنج ءِ ترسا پارے ”ماہ گنج دا گد ءِ گندار آنبار ہفت رنگ ترفس، کنے گندا نا رنگ آک بھاز دوست ءُ۔ کنا است خواہک کہ گندار نا رنگ آک مدام کنا مون آ مریر۔ نا زیبا غا دروشم و گندار نا رنگ آک اسہ ایلوڑتون زیبا خننگرہ۔“

نورل دوانزدہ جماعت ءِ پاس کننگ آن گڈ یونیورسٹی نا فائن آرٹس نا ڈیپارٹمنٹ اٹی داخلہ ہلک، اودے رنگ آتا اوڑدہی تون مہر ئسکہ۔ او اسہ بھلو مصور اس جوڑ مننگ خواہسکہ۔ یونیورسٹی ٹی اسہ دے اس جلسہ اس اڈ تننگا۔ دا جلسہ غان نورل ہم تران کرے۔ نورل نا لائخی مچ آ یونیورسٹی ٹی پنی مسوسس۔ ایلو سال آ اودے خوانوک آتا سرکڑدہ نا عہدہ ءِ تننگا۔ داسہ نورل اسہ آرٹسٹ اسے تون اوار اوار خوانوک آتا سیاسی راہشون ہم ئسکہ۔ او خوانوک آتا حق آتے کن جہد ءِ ترند کرے، ہندا جہد اٹی اودے کیہی وار زندان ہم کننگا۔ ولے او تینا سفا غا است اتون خوانوک آتا راہشونی نا حق ءِ ادا کرسا ہناکہ۔ 

اسہ دے اس او تینا خلق آ بننگ ئس اونا سنگت آک اودے موکل کریر، ولے او تینا اُرا غا رسینگتو…… اونا لمہ باوہ اونا بے گواہی نا دڑد آن است ترخ مرسا دا دنیا ءِ اِلار

پنچ سال تدینگا۔ ماہ گنج نیم گنوک مسوسس۔ ولے اینو ہم اونا خنک بھلا درگہ ٹی خلوک ئسرہ، او داسکان نورل نا چاری ئسکہ۔

مسہ دے مست خلق آن دہ میل ایپار اسہ لاش اس خننگا، نورل نا اِلہ تینا ایلم نا مار ءِ درست کرے۔ اونا میت ءِ خلق آ ایسر، کفن دفن کریر، و کونٹ کریر توسر۔

اینو پیٹی ٹی تخوک آ پچ آتا ہر جوڑہ نا رنگ اوڑکن پیہن ہڑسینگاسس۔ کل رنگ آک اوڑکن تینا زیبائی، معنہ و مسخت ءِ گوہاسر، وار وار اس پیہن آ رنگ ہم اودے مون نظر بسکہ۔

مسٹمیکو دے نورل نا کونٹ ءِ چنڈار…… دا مسہ دے اوڑکن قیامت نا دے ئسرہ…… دا قیامت ساندہ کن اونا زند انا بشخ جوڑ مسوسس…… دے درست او تینا کوٹھو نا کنج اسے آ بالشت اسے آ پچ آنبار تموک ئسکہ…… دیگر نا وخت آ او کوٹھی آن پیش تما، خرن آ آسمان آ شینک آک تالان ئسرہ۔ شینک آتیان شیف رنگ رنگ انا گڈیک بال کریرہ۔ رنگ آک اودے بھیم زدہ کریر۔ اونا است انا توار اونا سینہ ٹی ماتنی ءُ زیمل اسے آنبار مونجائی ءِ ہنداخہ تالان کرے کہ اونا سینہ ٹی دڑد اس شیموش کرسا اونا است آن ایپار مس۔ او اسہ چیہانٹ اسے تون یلہ مس، و ڈغار آ تما۔ کل خاہوت اونا خڑک آ مچ مس، ولے او دا دنیا ءِ اِلاسس۔

خلق انا قبرستان اٹی نورل نا قبر نا خڑک آ اسہ پین قبر اس ودّا، ہراڑا مسہ خل تخوک ئسرہ۔ خل تیٹی اڑیفوک آ پیہن آ ریڑ ءِ تہو بھاز ناز و لاڈ اٹ سرفیکہ، ولے ناز و لاڈ اتون اوار اوار تہو انا مودہ ہم برجا ئس۔

ہفتئی تلار

تاک: 36

19-25 September 2020

پنہ، 5