الس ءِ کھد کتر تکانرے، پولیس ءِ داسکان سما اف کہ گوہنگوک آک برمتہ مسنو یا بے گوا؟ چیف جسٹس

کوئٹہ (آن لائن) سپریم کورٹ کوئٹہ پولیس ءِ گوہنگوک آتے پٹسا ارا ہفتہ ٹی رپورٹ ءِ پیش کننگ نا پرمان تس۔ تدوک آ دے سپریم کورٹ آف پاکستان نا چیف جسٹس جناب جسٹس گلزار احمد نا کماشی ٹی جسٹس اعجاز الاحسن و جسٹس فیصل عرب استا مسہ باسکی بینچ سپریم کورٹ کوئٹہ رجسٹری ٹی 5 بندغ نا گم مننگ نا بابت کیس انا سماعت ءِ کرے، ہراٹی ایڈیشنل چیف سیکرٹری حافظ عبدلباسط، صوبائی اسمبلی نا باسک قادر علی نائل و ایس ایس پی آپریشن پیش مسر، سماعت اٹی پولیس نا کنڈآن جمع کروک آ رپورٹ ءِ غیر تسلی بخش پن کرے وخت اس کہ بیدس پولیس نا وردی آن عدالت اٹ پیش مننگ آ ایس ایس پی انوسٹیگیشن کرائم برانچ آ چڑسا چیف جسٹس ریمارکس تس کہ مخلوق بندغ آتیکن مقدمہ درج کرفنگ کن وارث آک پولیس نا پد آن نرہنگ اٹی ءُ، پولیس ءِ کیس آتا جاست و پاست بفک، 2017 آن 2018ء اسکان بندغ آک گوہنگوک ءُ، پولیس انت اس کننگ اٹی ءِ چیف جسٹس پارینے کہ پولیس نا کنڈآن گم مننگ نا مقدمہ ءِ درج کروئی ئس ہراکہ کروک اف، ہراڑا ایس ایس پی آپریشن کوئٹہ پارے کہ دا بابت اٹ محکمہ ایکسائز و سی بی آر ریکارڈ کن مراسلہ نوشتہ کننگانے ہراڑا چیف جسٹس اُست ہسونی نا درشانی ءِ کرسا پارے کہ پولیس نا کاریم مراسلہ جاری کننگ اف وخت اس کہ موقع غا ہنسا جاست و پاست و پٹ و پول کننگ ءِ پولیس مراسلہ غاتیان آخا وخت اس عملی کاریم کروئی مریک انتئے بھلو افسر جوڑ مننگ آن پد پولیس نا کاریم بفک نے، چیف جسٹس پارینے کہ انت نم اُلس ءِ کچرہ تکانرے، رپورٹ داوڑ مرے تو اودے ہنداڑے معطل کننگے، پولیس زو اس کل گم انگا بندغ آتے یلہ کرفنگے، ہراڑا ایس ایس پی آپریشن پارینے کہ دا وخت اسکان معلوم متنے کہ دا گم مسنو یا برمتہ کننگانو ہراڑا جسٹس اعجاز الاحسن پارے کہ پولیس تون گاڈی و ایلو شاہدیک بسر ولدا ہم ہننگ اٹی ءِ۔