قطب نا مسافر 2
منیر حنفی
Get real time updates directly on you device, subscribe now.
”کاٹم آتے دستار، زیباءُ بلوچی ءُ گِڈّی اس بینوک، ہرا کہ شیف آن بُڑز اسکان شیشہ خلوک ئس، مُخ آتے زغم اس تفوک ئس کس پاہے خواجہ یا تو جنگ اسے کن ہننگ ءِ یا جنگ اسے آن پوسکن بسُّنے۔“
ہندن گدان یا گدان نا تہٹی سروک آ بروک نا ندارہ کشی ءِ دُن کننگانے۔
”گدان ءِ بھاز زیبائی اٹ زیبدار کننگاسُس، گدان ءِ زیبدار کننگ کن کُچک و غُر خلکسُر۔ اوفتا نیام اٹی جاگہ جاگہ ڈلگ و خرن ءُ خوار ہم گیشتر خننگارہ، پژدرک لُڑونج، اسہ کنڈآ زیبا ءُ بھلو بروک اس سواروک ئس، ہرا کہ گدان نا چھت اسکان ئسکہ۔ بروک آ جل اس خامک ناکشیدہ ٹی خلُوک ئس، گدان نا چارما کنڈآن گڑد ءُ بالشت دُوسوتی اٹ کشیدہ ئسر۔“
”دو شش“ اسہ بیانیہ ءُ افسانہ اسے، فہم تخوک آ خوانوک دادے خواننگ تون گڑاس پیش بینی ٹی اختہ مریک، کہ داسہ انت مریک، ولے مزہ نا ہیت دادے کہ خوانوک سوچ خلیک کہ مسافر اُرا خواجہ غان ساہدار و مال گڑا تیان تین کن خواہسا کاہک، اسہ ساہت اسے ٹی ہندن لگک کہ داسہ ایسہ اونا مسڑ ءِ خواہک، ولے دُن مفک و ہندن افسانہ نا آخر ہم خوانوک نا گمان آن چَپ ایسر مریک، انتئے کہ خوانوک دا اندازہ ءِ خلیک کہ مسافر گدان خواجہ غاتا جوانی نا ایوز اٹی اوفتتون جوانی کرو، ولے دُن مفک، ہرا کہ خوانوک نا اندازہ ءِ غلط کیک یعنی افسانہ نگار، خوانوک نا گمان نا برخلاف افسانہ ءِ ایسر کیک، دا افسانہ نگار نا کمال ءِ کہ اگہ قاری نا گمان نا حساب اٹ افسانہ ایسر مروسُس شایدکہ افسانہ نا چس گار مسکہ۔ ”دوشش“ افسانہ ٹی گڑاس انسانی رویہ غاتیا گچین ءُ وڑ اسے ٹی ہیت کننگانے، اسہ پارہ غامسافر تون سنگت آتا درو و دغابازی ءِ نشان تننگانے، ہندن خلوص، پُر مہر آ سنگتی دوستی، رسم و رواج آتیا زند ءِ تیر کروک آتے آمخ نشان تننگانے۔ مسافر تون اول اٹ دھوکہ مریک پد آن او ایلوفتتون دھوکہ کیک، مسافر نا سنگت آک اوڑتون دھوکہ کیرہ مسافر ءِ مصیبت و مرگ انا با آن بچفوک آک تینا خلوص و نیت اٹ اونا مدت و کمک ءِ کیرہ، ہرادے مسافر تینا چالاکی سرپند مریک۔ زند اٹی ساڑی دا وڑ انا حالیت آتا گواچی بندغ آتا مہرو خلوص، سنگتی و دوستی ءِ آمخی پُہہ مروک آتا و تینے ہُشار و چالاک تکوک آتا ہچ کمی اف۔ ”دوشش“ دے اسے آ تالان ءُ افسانہ اسے۔
”شڑت“ افسانہ کسّہ ئی ءُ افسانہ اسے۔ دا فلیش بیک نا ٹیکنیک آن بنا کیک و بیانیہ تکنیک آ ایسر مریک، داٹی مکالمہ بازی ہم ارے۔ دا صیغہ واحد متکلم اٹی نوشتہ ءِ، دا افسانہ نا جوانی دادے کہ دا نیام اٹی داستان نا دورشم ءِ دوئی کیک، داستان آتا بارو اٹ دا پاننگک کہ دافتے ٹی کسّہ ءِ داخہ در چس تننگانے کہ بنوک آک دے تا دے داستان نا کسّہ نا ایسری نا گمان ءِ تخارہ، اسہ قدیم ءُ کِسہ اس بھاز پنی ءِ کہ ”قدیم مصر اٹی بادشاہ نا محل اٹی اسہ ملکہ اسے نا عزت نا بارو اٹ بھاز ہوکا مس، خلقت ہندا کِسہ نا بارو اٹ معلومداری کن محل نا درگہ غا ہڑدے مُچ مسکہ۔ بادشاہ تینا داستان گو اسے رمائشت کرے کہ اسہ ہندن ءُ کسّہ اس شا کہ مخلوق نا سوچ و گمان محل اٹی مروک آ دا کِسہ غان چَپ مرے۔ گواچنی ہندن مس کہ کسّہ گو ہندن ءُ کسّہ اس خلقت ءِ بنفسا ہنا کہ منہ دے اسکان دا فیصلہ متوکہ۔ اسہ بندغ اس دا کسّہ ٹی داخہ در چس ہلک کہ دادے شام انا تغ بتو، او نن نیمہ غا کسّہ گو نا اُرا غا ہنا بش کرفے تے۔ بھلو انعام اس تس تے، کہ مونی کن کن کسّہ ءِ پورو کر۔ عامر فیاض نا دا افسانہ نا نیام اٹی ہم مرکزی کردار و اونا زئیفہ نا نیام اٹی ہندن ءُ کیفیت اس ودی مریک۔ ”شڑت“ افسانہ غا آب بیتی نا ہم گمان مریک، دا افسانہ ٹی کہانی پن یا کسّہ بھاز خننگک۔ خوانوک دا افسانہ نا کسہ غان چس ہلیک۔
”ننا لیڈر“ پنی آ افسانہ ٹی عامر فیاض سیاسی سروک و اوفتا مون نا بندغ آتیا ملنڈ و ٹوک ٹکار کرسا گڑاس حقیقت آتے ہم پاش کرینے، دا رپورتاژ نا تکنیک اٹی نوشتہ ءِ، جاگہ جاگہ ساڑی حالیت اٹی گدرینگوک آ وخت انا ہیت و گپ آتے فلیش بیک نا ٹیکنیک آن کاریم ہلسا بیان کننگانے۔ دا اسہ پلاٹ نا افسانہ اسے، و دانا تاثر اسہ دے نا ءِ۔
ہفتئی تلار
15-21 August 2020
تاک: 32
پنہ : 2