”اینو ہم خدا خوشے“ شاہین بارانزئی نا تنقید نا جاچ 7
نورپرکانی
Get real time updates directly on you device, subscribe now.
افسانہ ”آخریکو خط“ نا بارو اٹ کل آن بھلا کنفیوژن دادے کہ دا جائی افسانہ اسے یا مکتوب اسے… انتئے کہ داٹی لیکچرار گودی تینا خن تا مون نا واقعہ غاتے چٹھی سے نا وڑ اٹ اسہ سردار اسے کن نوشتہ کرینے… اول اٹی گودی تینا برام کن قبائلی رواج و ننا کلچر ءِ تعلیم آن آخا بلکہ پیسہ غان نسخان مرسا نشان تسنے.. ولدا تینٹ ہمو غاوی آ سرداری جاگیرداری کلچر آن انصاف نا توقع ٹی سردار اسے چٹھی نوشتہ کننگے… داسہ اسٹ تو اسہ سردار اس اسُل بش مفک ایلو سردار نا فیصلہ ءِ پرغپک… ولدا اسہ بے پن ءُ بے تعارف آن اسہ نیاڑی سینا خط ءِ خوانسا ہچ ءُ سردار اس دن سٹی بش مفک… ای حیران مریوہ کہ دا نیاڑی نا ارے رحیمہ نا ارے وکیل تون سنگت ہم ارے… ولدا او علاقہ نا پیسہ ئی جاگیردار اس ہم ارے… دا کاریم ءِ او تینا ارے آن ہم ہلنگ کریکہ… اسہ وکیل اس داخہ کانود سرپند مننگ آن پد ہم اسہ سردار اسے آن امر کمک ہلیک… اگہ نن دا ہیت آتے کل ءِ منن ہم کہ نیاڑی نا چٹھی اسہ سردار اسیکن روا ہم ئس.. ولے داٹی افسانوی رنگ ہراکان اتین… رحیمہ نا دڑد آتا بیان اٹ تو افسانہ جوڑ مفک نئے افسانہ جوڑ مریک… انتئے کہ اصل کڑدار تو چٹھی آن پد سردار نا بش مننگ و رحیمہ ءِ انصاف تننگ نا ئسکہ.. داڑکن افسانہ نا کلائمکس ءِ پٹوئی ئسکہ و جوان ءُ ایسر اسے نا گرج ئسکہ…… ولے چٹھی نا پورو و بے نتیجہ ختم مریک… دا تو بیرہ خبر اس مس کہ رحیمہ تون داوڑ ظلم مس… نتیجہ نا ہچ خبر اف کہ رحیمہ ءِ دا چٹھی آ انصاف ملا یا پین خوار مس.. شاہین بارانزئی جاگہ جاگہ تینا تنقید اٹی نتیجہ و کلہو نا ہرا ہیت ءِ کرینے دن انگا کپ لپ آ افسانہ غاتیان اونا تجزیہ درست خننگک… ولدا دا افسانہ نا ٹائٹل ہم عجیب ءِ… آخریکو خط… دا سرحال اسہ بدر ءُ نیاڑی سینا اسہ بدر ءُ سردار اسے کن چٹھی نا مننگ کپک…… دا سرحال اسہ ورنا اسے کن اسہ شیتل اسے نا مننگ کیک… کہ اولی ارٹمی کیہی چٹھی تیان پد دا آخریکو چٹھی پاننگے… دا افسانہ ٹی افسانہ نگار تینا گرپ ءِ توننگ کتنے……
افسانہ ”بیغیرت“ گچین ءُ افسانہ اسے.. داٹی پلاٹ، کڑدار، کِسہ کلائمکس، ایسر بھاز زبردست اتنگانو… مکالمہ غاتے ٹی لوز آک چنڈ چنڈ اتنگانو…… جزیات نگاری ایکسپریشن آک بھاز زیبائی ٹی بیان کننگانو…… عاقب تینا سنگت اصغر نا مکاری تان گونجک مس… اصغر صائمہ نا کاکا مار جاسم ءِ تینا پیسہ نا زور و لالچ اٹ تینا مرید جوڑ کرے… دا افسانہ ٹی نیاڑی ذات نا نازرکی و نرینہ نا گمان ءِ غیرت بڑزا مننگ یا فیصلہ پرغنگ ءِ نشان تننگانے… ایسر اٹی ہرا مکالمہ غاتے ہر مسٹ آ کڑدار آک اسہ ایلو غا چغل ایترہ گچین ءُ ایسر اس تفینو…… کہ نے آنبار ءُ بے غیرت ءُ سنگت خدا کس ءِ تف… ایلو پاہک نے آنبار ءُ سیال خدا کافر ءِ تف…… فریق نا دا افسانہ کتاب نا آخریکو بشخ یا اوور اٹی اسہ چھکا سے آن کم اف……
ہفتئی تلار
15-21 August 2020
تاک: 32
پنہ :7