صحافت نا بناوردوم 18

رسالہ ”انجمن“ قصور۔

انجمن ”مفید عام“ نا کنڈ آن ”رسالہ انجمن قصور“ مرزا فتح محمد بیگ نا نگرانی ٹی بنا مس، داٹی دن تو انجمن نا بھاز انگا دیوان تا کاروائی شینک مسکہ، داکان بیدس تعلیم نا نا زی آ ہم مضمونک شینک کننگارہ۔ داڑان بیدس انگریزی کتاب آتا مٹ و بدل ہم شینک مسکہ۔ انگریز حکومت نا بابت ہچ ءُ تنقید اس دوآن درفتوسہ، دانا اسہ پیدوار ءُ شاہدی اس 1885ءانا تاک اسیٹی داوڑ ئس:

”ولایت اٹ کشت و کشار نا اسہ امتحان اٹ ہندوستان نا جوان انگا قسمت نا اسہ دیسی ءُ صاحب اس و اسہ انگریز صاحب اس پاس مسر، دیسی صاحب ہرا مسلمان اس ئسکہ، او درجہ اول اٹ پاس مس، و انگریز درجہ دوئم اٹ پاس مس۔ ہنداڑتون بمبئی سرکل اٹ کشت و کشار نا ڈائریکٹر نا عہدہ خالی مس، داسہ بایدے دن مروسس کہ دا جاگہ درجہ اول نا پاس مروک آ ءِ ملوسس، ولے دن متو دادے ہمو انگریز ءِ تننگا۔ مسلمان اگہ خوانندہ مف تو جاہل پاننگک اگہ خونندہ مرے تو حق ملپک تے۔“

”مسٹر اوزین گڑاس صیغہ ٹی امتحان ترسا درجہ اول نا سند ءِ دوئی کرسا 1800 سد روپئی نا تنخواہ ٹی ڈائریکٹر لگا، و مولوی محمد حسین 13صیغہ ٹی امتحان ترسا درجہ اول نا سند ءِ دوئی کرسا 250 امنائی تنخواہ ٹی ایکسٹرا اسسٹنٹ کمیشنری کرے، دانا سوب دا ئس کہ مسٹر اوزین گورنمنٹ نا اہم انگا قوم یورپین اس ئس، و بیوس آ مولوی صاحب ہندوستانی اس ئسکہ۔ دنیا ٹی لکھ آ کلین مشینک ایجاد مسنو، ولے دن ءُ مشین اس ایجاد متو کہ اوڑان بے وس آ ہندوستانیک دا حق ءِ ہلنگ کیر۔“

داڑان کساس مریک کہ انگریز امر مسلمان تا حق ءِ خلسا تینے جاگہی کرے۔ و مسلمان تتون امر پیش بسکہ۔

ہفتئی تلار

تاک: 29

25-31 July 2020

پنہ: 07