العزیز جل جلالہ

اسم العزیزجل جلالہٗ، نا بارواٹ عالم آتا چندی قول آک ءُ

.iعلامہ ابن جریرؒ فرمائفک کہ ”العزیزجل جلالہٗ“ ہمو ذات ءِ پارہ ہرا تینا دشمن تیان بدلہ ہلنگ اٹ کل آن سخت مرے، و ہرا وخت کس اسے سزا تننگ نا ارادہ ءِ کے تو ہچ ءُ طاقت اس اودے توننگ کپ۔

.iiعلامہ ابن کثیر ؒاسم ”العزیزجل جلالہٗ“ نا تعریف ءِ دا وڑ کرینے: ”العزیزجل جلالہٗ“ ہمو ہستی ءِ پارہ ہرانا ذات ہر گڑا غا زوراک مرے، کل گڑاک اونا جلال و عظمت نا مون آ مغلوب مریر و اونا غلبہ و عظمت و بھلنی نا سوب آن اسٹ اس ہم اونا کچ آ بننگ کپ۔

.iiiامام قطبیؒ نوشتہ کرینے ”العزیزجل جلالہٗ“ ہمو ذات ءِ ہرانا غلبہ و شان و شوکت و طاقت ہر ہر گڑا غا ہندن زوراک مرے کہ ہچ ءُ گڑاس اودے بیوس کننگ کپ و ہچ ءُ گڑاس اونا طاقت و قدرت آن پیشن مننگ کپ۔

.iv علامہ طیبیؒ پاہک ”العزیزجل جلالہٗ“ ہمو وریٰ الوریٰ غا ذات ءِ، ہرانا شان و عظمت اٹ انسان نا عقل گم مرے، و اونا جلال نا پورو تعریف آن و جمال نا تے سِفت ءِ بیان کننگ آن دویک عاجز مریر و عقل والا تا عقل آک حیران مریر، دن انگا ہستی ءِ ”العزیز“ پارہ۔

.v علامہ ابن قیمؒ تینا ”قصیدہ نونیہ“ اٹ شعر اٹ ذکر کرینے، اونا مطابق ”العزیزجل جلالہٗ“ دا سِفت والا ذات ءِ پارہ:

(I)تینٹ محفوظ و طاقت والا مرے، اونا حفاظت آ کس اس سلنگ کپ و اونا مقابلہ غا کس اس سلنگ کپ۔

(II)کل آ زوراک مرے، اوڑا کس اس زور مف۔

دا اسم قرآن پاک اٹ 92 وار بسنے۔

از:ابن الحسن ابابکی

ہفتئی تلار

تاک: 29

25-31 July 2020

پنہ: 01