کریم سرپرہ نا جتائی (براہوئی ادبی حوال)۔

عبدالقیوم بیدارؔ

0

Get real time updates directly on you device, subscribe now.

٭ براہوئی آرٹس اکیڈمی، صحافت، خبر خواننگ

٭ ”غلام نبی راہی ایوارڈ“ و ایلو گچین آ گام تا خالق

1978ء اٹی براہوئی ادبی سوسائٹی نا بنداو تخنگا۔ سوسائٹی نا اولیکو چیئرمین پروفیسر خداداد گُل ئسکہ، وائس چیئرمین عبدالوہاب ہمدم، جنرل سیکرٹری محمد ایوب عالم، جوائنٹ سیکرٹری محمد قائم بنگلزئی و خزانچی عبدالقیوم بیدار ؔکچین مسر۔ اولیکو وار براہوئی ادبی سوسائٹی نا سنگت آک اسٹیج ڈرامہ نا بنداو ءِ تخار۔ پنی آ ڈرامہ نوشتکار، ادیب، افسانہ نگار غلام نبی راہی نا نوشتہ کروک آ خاکہ غاک اسٹیج آ پیش کننگار ہرافک مخلوق ءِ بھاز دوست بسر۔ ایکان پد ورنا تا بھلو کچ اس سوسائٹی نا باسک جوڑ مس ہرافتے ٹی محمد کریم سرپرہ ہم اوار ئس۔

محمد کریم سرپرہ انفارمیشن ڈیپارٹمنٹ اٹ کاریم کریکہ ہراڑے عبدالوہاب ہمدم و گڑاس پین ورنا ہم ئسر۔ سال اسے آن پد دا ورنا تا نیام اٹی تڑا وڑا تمّا و اسہ وار ولدا گچین کاریک اڈ تننگار۔ دا گچین کاری تیٹی چیئرمین عبدالرزاق صابرؔ، وائس چیئرمین خداداد گُل، جنرل سیکرٹری عارف ضیاؔء، خزانچی عبدالقیوم بیدار گچین کننگار۔ ورنا تا ہرا ٹولی براہوئی ادبی سوسائٹی آن جتا مس اوفتے ٹی محمد کریم سرپرہ، عبدالوہاب ہمدمؔ و عبدالجبار یارؔ اوار ئسر۔ اوفک تین کن اسہ پین تنظیم اس ”براہوئی آرٹس اکیڈمی“ نا پِن اٹ جوڑ کریر ہرانا چیئرمین عبدالجبار یار ؔ گچین کننگا۔

براہوئی ادبی سوسائٹی و براہوئی آرٹس اکیڈمی نا نیام اٹی 1980ء آن اسہ ایلو آن مونی گو تفنگ نا بنا مس۔ دا زمانہ ٹی ادب نا میدان اٹی بھاز کاریم مس۔ تنظیمی اختلاف آتیان پدہم دا ورناک ادبی مقابلہ کریر، ذاتی وڑ اٹ گچین ءُ سنگت ئسر۔ ہڑدوسر آ تنظیم آتا نیام اٹ مروک آ پروگرام آتیٹی کُل اسہ ہند آ اوار مسرہ۔ سوسائٹی اگہ اسہ پروگرام اس کریکہ تو منہ دے آن پد براہوئی آرٹس اکیڈمی مشاعرہ اس اڈ تسکہ۔ ہندن ڈرامہ، مذاکرہ، و مشاعرہ غاتا اسہ گچین ءُ چرجوئی اسے نا بِنا مس۔ براہوئی ادبی سوسائٹی مُسہ تُوئی ”دے ٹک“ ءِ کشا و براہوئی آرٹس اکیڈمی والاک ”تلار“ ءِ مون آ ایسُر۔ منہ وخت آن پد براہوئی آرٹس اکیڈمی ٹی ہم تڑا وڑا تما و براہوئی آرٹس اکیڈمی ارا بشخ مس۔ اسٹ نا چیئرمین محمد کریم سرپرہ و ایلو براہوئی ادبی تنظیم نا چیئرمین محمد یوسف موج گچین کننگا، و عبدالجبار یار پدی براہوئی ادبی سوسائٹی آبس و مُسہ تُوئی دے ٹک نا کاریم ءِ سنبھالا، داڑتون اوار اوار جنگ اخبار اٹی براہوئی حوال ءِ نوشتہ کننگ نا بِنا ءِ کرے۔

گدرینگوک آ وخت انا دا شیفی بڑزی تے بیان کننگ نا مطلب دا کہ نن کریم سرپرہ ءِ یات کین کہ او منہ دے مست ناجوڑی اسے نا سوب آن دا دنیا ءِ الا۔ کریم سرپرہ اسہ ادیب اسے آن بیدس اسہ گچین ءُ حوالکار اس ہم ئس۔ او تقدیر نا پن اٹ میگزین اس کشا و لیاقت بازار اٹی اونا میگزین نا دفتر ئس۔ پوسکن لکھوک آ ورناک اونا میگزین اٹی کاریم کن ہنارہ او کس ءِ نا اومیت کتوکہ۔

کریم سرپرہ نا اسہ گام اس کہ او وخت اس ہم گیرام مفروءِ، او داکہ ”غلام نبی راہی ا یوارڈ“ نا بناءِ کرے و ہر سال بے ناغہ جناح رو ڈ آ آرٹس کونسل نا ہال اٹی اسہ گچین ءُ دود اسے نا بست و بند ءِ کریکہ۔ و براہوئی زبان نا ادیب، شاعر، نوشتکار، فنکار، حوالکار، براڈ کاسٹر و زند انا ہر بشخ اتون تعلقداری تخوک آ ہمو بندغ آتے ایوارڈ تننگاکہ کہ اوفک تینا بشخ اٹی گچین ءُ کڑد اسے نا درشانی ءِ کریسر، ہراڑان اوفتا اُست بڈی ہم مسکہ۔ و ورناتیکن مون مُستی کاریم کننگ نا شوق ودی مسکہ۔ ہمو وخت آتیٹی پین دن ءُ بھلو مچی و مشغولی متوکہ ہندا خاطر آن مخلوق ”غلام نبی راہی ایوارڈ“ نا دود انا مچ آ سال انتظار ءِ کریکہ۔ و ہمو دے مخلوق نا بھلو کچ اس آرٹس کونسل ناہال اٹی سر مسکہ۔

کریم سرپرہ صحافت و نظامت تعلقات عامہ نا ملازمت آن بیدس ریڈیو و ٹی وی نا اسہ گچین ءُ پن اس ہم ئس۔ او ریڈیو و ٹی وی ٹی خبر خواناکہ و بھلو وخت اس اسکان دا چرجوئی برجا سلیس۔ اونا خبر خواننگ نا انداز بھاز گچین ئس ہرا مخلوق ءِ بھاز دوست بسکہ۔ اینو کریم سرپرہ ننا نیام اٹی اف ولے اونا کروک آکاریمک وخت اس ہم گیرام مفسہ۔ اینو ہم براہوئی ادبی ادارہ غاک اونا وڑ غلام نبی راہی ایوارڈ یا ایلو پنی آ ادیب آتا پن آ ہندن ءُ ایوارڈ تننگ نا دود آتا بست و بند آتے کیر تاکہ پوسکن آ نوشتکار آتے لکھنگ و خواننگ نا شوق ودی مرے و اوفک مونی بریر۔

Get real time updates directly on you device, subscribe now.

Leave A Reply

Your email address will not be published.