ایل پی جی و بورہ پین کبین، ریلوائی نا کرا ہم ودّا

اسلام آباد / کراچی ایل پی جی و بورہ پین کبین، ریلوائی نا کرا ہم ودّا۔ گیس انا ہم کاختی نا گمان، اکتوبر اٹی کبینی نا کل ریکارڈ آک پنار۔ سرجم حوال آتا ر داٹ ایل پی جی نا اُرائی سلینڈر نا نہاد اٹی 155 روپئی نا پین ودکی، اوگرا نا کنڈ آن نوٹیفکیشن جاری کننگانے۔ اوگر اعلامیہ ٹی پاننگانے کہ ایل پی جی نا نہاد اٹی ودکی دمدستی نافذالعمل مریک۔ نہاد اٹی ودکی آن پد ایل پی جی نا 11.8 کلو نا اُرائی سلینڈر 2559 روپئی 35 پیسہ غا مسنے۔ یات سلے کہ اکتوبر اٹی ایل پی جی نا اُرائی سلینڈر نا نہاد 2403 روپئی 55 پیسہ ئسکہ۔ ایلو کنڈ آ پاکستان اٹی بورہ نا نہاد ملکی تاریخ نا پوسکن ءُ بڑزی اسے آ سر مسنے، چیئرمین ہول سیلز گروسرز ایسوسی ایشن عبدالروف ابراہیم پارینے کہ بورہ نا ایکس مل نہاد 4 روپئی ودکی تون اوار 119 روپئی ءِ سر مسنے، وخت اس کہ ہول سیل اٹی بورہ نا نہاد 121 روپئی مسنے۔ عبدالروف ابراہیم پارینے کہ ٹریڈ کارپوریشن آف پاکستان (ٹی سی پی) نا بورہ یوٹیلٹی اسٹورز کن بٹنگ انگانے، و یوٹیلٹی اسٹورز نا نہاد ہول سیلز نہاد آ زہم شاپک۔ اونا پاننگ ئس کہ ریٹیل کہول آ فی کلو بورہ نا نہاد 125 آن 130 روپئی اسکان ءِ۔ حکومت رٹ قائم کے، آخا تو کرشنگ اسکان بورہ نا ریٹ پین ودک۔ دا ویل آتیان ہم مونی گیس انا بحران اسے نا گمان ہم درشان کننگ انگ ءِ، نومبر 19 آن پد گیس انا بھلو کاختی اس ودی مسنے، گنور و ای این آئی اِرا ایل این جی کارگو تا فراوانی آن پدی مسنو، ہرانا سیکرٹری پیٹرولیم نا کنڈ آن حوال ہم پک کننگانے۔ سرجم حوال آتا رد اٹ اسہ حیران کروک ءُ پیشرفت اسے ٹی اِرا ایل این جی واپاری کمپنی گنور و ای این آئی نومبر 2021ء نا تُو اکن جہانی اسپاٹ مارکیٹ اٹی 200 درسد اسکان بھلو کٹیا سے کن پاکستان ءِ اِرا ایل این جی کارگو فراوان کننگ نا تینا قول آن رزاک آ پدی مسنو، ہراڑان گیس انا بحران اس ودی مننگ نا گمان کاٹم ہرفینے۔ وخت اس کہ ریلوائی محکمہ ہم مسافر ٹرین تا کرا تیٹی اینو آن دہ درسد ودکی کرینے۔ چیف ایگزیکٹو آفیسر (سی ای او) ریلوائی نا پاننگ ءِ کہ 2019ء آن پد کرا تیٹی داسہ ودکی کننگانے۔ دا کل کبینی تیان پد نا حوال آتا ر داٹ اکتوبر اٹی کبینی دا سال انا کل آن بڑز انگا کہول آ سر مریک، وخت اس کہ دا سال داکان مست انا کل سال آتیان کبینی نا رد اٹ گو ءِ دروک آ سال ءِ۔ ملک اٹی اکتوبر نا تُو اٹی کبینی دا سال انا کل آن بڑز انگا دنگ آ سر مسنے، ادارہ شماریات نا رد اٹ اکتوبر 2021ء اٹی کبینی ان کچ 9.2 درسد ئس، ستمبر اٹی کبینی نا کچ 9 درسد مسوسس، رپورٹ نا رد اٹ ستمبر آن چَپ اکتوبر اٹی شار تیٹی ککڑ نا سُو 17.9 درسد، سوزی 15.2 درسد و خولم 7.2 درسد کبین مس۔ ادارہ شماریات کبینی نا تُوئی رپورٹ ءِ جاری کرینے، ہرانا رد اٹ اکتوبر اٹی کبینی نا کچ دا سال اٹی کل آن بڑز انگا کہول آ سر مس۔