زند مچٹ اس سدھ خواہک
وحید زہیر
بندغ پین ہچ کپ، بیرہ تینا خڑک و مر اٹی اسہ بندغ اس کہ ہرا عمر انا 80 میکو یا نودمیکو وئی اٹی ءِ۔ مچٹ اس اونا زند انا جاچ ءِ ہلے، ہُرے کہ دا بندغ دا وئی اسکان زند ءِ امر گدریفینے، اگہ او آسرات ءِ تو اونا آسراتی نا سوب انت ءِ؟ و اگہ او خوار ءُ زند اس گدریفینے تو اونا سوب آک انت ءُ؟ و ہرافتے دن ءُ وئی نصیب متو، تو اوفتتون انت مس یا اوفک تین تون انت کریر؟ مننگ کیک کہ جاگہ اس عمر ءِ جوان ءُ زند اسے تون تعلقداری مف، مطلب دا کہ بھاز انگاک کم سنی ٹی ہمو کاریم تے کرینو، کہ سد سال عمر تخوک آک ہم ہمو کاریم ءِ کتنو۔ ولے دا ہم مننگ کیک اسہ بندغ اسے ہمو کاریم کن سد سال بکار مسنے۔ نن تینا دامون ایمون ہُرن تو ننے ہڑتوم آ رد اٹ کم بندغ دن ءُ ملرہ کہ ہرافک کم سنی یا بھلن وئی ٹی غزہ اس کرینو۔ زیات تینا آمخی اٹ زند ءِ گدریفینو۔ دا رد اٹ ہُرس تو کشت و خون آتا کچ زیات ءِ۔ اسہ کشت و خون نا کسر اس ہمودے ہرادے بندغ تینٹ ہلیک، اسٹ اس ہمودے ہراٹی بندغ ءِ گرنگک۔ اسہ زند اس ہمودے ہرا بیرہ کننگ خاچنگ اٹ گدرینگک، اسٹ ہمودے ہرا قربانی نا کسر اٹ کاہک۔ رند و لاشار جنگ آنبار ہُرن تو دن ءُ اخہ در تین پہ تین نا جنگ ءُ ہرافتیٹی ورناک پیر انگاک مرک انا گواچی مسنو۔ اخہ در نیام اٹی زند ءِ نسخان اٹ گدریفینو۔ بیرہ جان انا آخا تعلیم و مال انا نسخان مسنے۔ وخت انا بربادی جتا ءُ نسخان اسے، ہرانا پورواری مننگ کپک۔ بس زند ءِ تینا دامون ایمون ءِ پہہ مننگ کن مچٹ اس بندغ آن سدھ خواہک، اینو قومک ہمو پوسکن آ وخت انا ڈکھ آتا مقابلہ ءِ کننگ اٹی ءُ، یا زند ئ، شرف تننگ اٹی ءُ، ہرافک بندغ آتا وئی آ نظر تخارہ، اوفتا سرسہبی و بے سہبی نا جاچ ءِ ہلکرہ۔ مگہ نن دن ءُ کاریم اس کننگ اٹی اُن۔ بے مٹ آ بندغ آک ہڑدے ودی مفسہ، نئے قوم تیٹی بیدس مثال اسے آن پین چندی مثال آک جوڑ مریرہ۔ مثال آتے مچ کننگ، مثال آتے خوندی تخنگ کن اسہ قومی ءُ جوزہ اس بکار مریک۔ ہرا ڈغار آ قومی آ جوزہ غاک مسن تموک مریرہ، اوڑے قومی ءُ مثال ودی مریر ہم اوفتا چاہنداری مفک، افسوز مریک ہراتم اسہ بھلو بندغ اسے نا سال دے ءِ اونا خاہوت نا منہ بندغ یا منہ سنگت اڈ ایترہ۔ مگہ دن ءُ جوزہ اس نن وخت اس بیدار کرینن، کہ بے مٹ آ بندغ کل انا ساہ انا بند جوڑ مرے۔ ہرافتے نن ساہ انا بند جوڑ کننگ کتنن، اوفتے ولائت نا ایلو بندغ آک امر تینا ساہ انا بند جوڑ کرور۔ بس مچٹ اس سدھ خواہک کہ اخر انتئے دن مننگ اٹی ءِ۔ دا تو مننگ کپک کہ قوم آتے ٹی جوان ءُ بندغ مرے، اونا ہَد و اویل اٹی مف، اگہ ارے گڑا اوفتا پاش مننگ و پاش کننگ اٹی دیر نزوری نشان تننگ اٹی ءِ۔ سیاستدان، عالم، دانشور، ادیب، طالب علم، ادارہ غاتا ہیت ءِ دا سوب آن کپرہ کہ ادارہ غاتے بندغ آک چلیفرہ۔ و اوفتے ٹی (بڑز ہلوک آ پنک اوفتا بج آ تولوک آ بندغ آک) اوار ءُ۔ بس مچٹ اس سدھ خواہک کہ نن کتاب آتے خوانن، تینا دامون ایمون بندغ آتا سرسہبی و بے سہبی نا جاچ ءِ ہلین، اوٹی عمر انا وئی ءِ مون آ تخن، ہراڑان گڈ قدرت نا مہروانی، بندغ نا خواری تون اوار، بخت و خواری تون یار مفننگ نا سوب آتیا ٹک خلین، کورونا ننے اسہ وارخواہی اس دن ءُ ہم تسنے کہ نن تنیا تولن، ڈکھ و ویل آتتون اوار بندغ آتا رکھ، مستی بروک آ زند انا کمبوتی تے مر کننگ کن بند و کلف آ کسر تا ملنگ ءِ پک کین، زند انا سلوک آ وام تے پدی ایتن۔
ہفتئی تلار
تاک: 28
18-24 July 2020
پنہ: 01