حکومت پر و نوکاپ آن زہمی تا بحالی کن گام گیج کننگ اٹی ءِ، میرجام کمال

 ہرنائی (آ ن لائن) وزیراعلیٰ بلوچستان میرجام کمال خان پارینے کہ صوبائی حکومت پر و نوکاپ آن زہمی ضلع غاتا اُلس نا نسخان تا پوروی کن او رابطہ سڑک آتا بحالی کن کل وسیلہ غاتیان کاریم ہلنگ اٹی ءِ۔ہرنائی سروتی حفاظتی بند ، کلی مرزا،کلی لعل حان رکھوک بندات نا جوڑی ایمرجنسی بنداو آ زوت اس جوڑ کننگے، ہرنائی نوکاپ آن زہمی پل و ہرنائی پنجاب قومی شاہراہ جل تیا اِرا پُوسکن ءُ پل انا جوڑ کننگ نا پڑو کیوہ وخت اس کہ نوکاپ آنم زہمی مروک آ زہمی تا نسخان تا پوروی کن پی ڈی ایم اے ءِ زوت اس ڈپٹی کمشنر ءِ فنڈریلز کننگ نا پارت کرے، دا خیال آتا درشانی ءِ او ہرنائی نا گونڈ انگا دورہ ءِ کننگ نا وخت آ ایف سی پبلک سکول اٹ اڈ ہلوک دود آن تران کرسا کرے، وزیراعلیٰ بلوچستان نا ہرنائی آ بننگ آ بی اے پی نا نیاڑی باسک صوبائی اسمبلی گودی لیلیٰ ترین، ڈپٹی کمشنر ہرنائی عظیم جان دمڑ ، بی اے پی نا بنجائی راہشون ملک مہراللہ خان ترین ، بی اے پی ضلع ہرنائی نا فوکل پرسن عبدالناصر ترین ایڈوکیٹ ، جنرل سیکرٹری شیربازخان ترین،بی اے پی نا ضلعی آرگنائزر سیکرٹری حاجی معتبرخان ترین ،ایس پی ہرنائی محمد حسن کاکڑ اوفتے بخیر کرے، صوبائی وزیر حاجی نورمحمد خان دمڑ, سردار یارمحمد رند,ضیاءلانگو, سلیم کھوسہ,محمد خان لہڑی و ڈی جی پی ڈی ایم اے عمران زرکون وزیر اعلی بلوچستان تون اوار ئس، وزیراعلی بلوچستان صوبائی وزیر تتون اوار ہیلی کاپٹر نا کمک اٹ ہرنائی ءِ سر مس ڈپٹی کمشنر ہرنائی عظیم جان دمڑ،ایکسین ایرگیشن وزیراعلی ءِ پر و نوکاپ آن ضلع ہرنائی ٹی مروک آ نسخان تیان جوان وڑ اٹ بریفنگ تس وخت اس کہ بی اے پی نا فوکل پرسن ضلع ہرنائی عبدالناصر ترین ایڈوکیٹ سپاسنامہ پیش کرے وزیراعلیٰ بلوچستان تینا کچ اٹ انگا تران اٹ پارے کہ صوبہ نا جتا جتا ضلع غاتے ٹی مروک پر و نوکاپ آن بھلو کچ اسے ٹی اُلس و سرکار نا نسخان مسنے۔ حکومت بلوچستان ، پاک فوج و ایف سی و ایلو فورس آتا کنڈآن زہمی علاقہ غاتے ٹی ہڑدڑی بنداو آ اُلسی ریلیف تننگ کن گام گیج کننگ اٹی ءِ، اُلس ءِ سخت انگا وخت اٹ تنیا ہلیپنہ۔ وخت اس کہ حکومت اُلس تون اوار سلوک ءِ۔ وزیراعلیٰ بلوچستان میرجام کمال خان پارینے کہ حکومت ضلع ہرنائی تون اوار صوبہ نا کل ضلع غاتے شون تننگ کن ہر وڑ نا کوشست کننگ اٹی ءِ۔ ہرنائی ٹی نوکاپ آن ہرا نسخانک مسنو حکومت زہمی تا نسخان تا پوروی ءِ کیک وخت اس کہ ڈی جی پی ڈی ایم اے عمران زرکون ءِ ہرنائی نا نوکاپ زہمی تا بحالی کن زوت اس فنڈ ریلز کننگ نا پارت کرے۔