بنجائی کابینہ نا دیوان، جشن آزادی ءِ شان و شرف اٹ اڈ تننگ نا فیصلہ

اسلام آباد(آن لائن ) بنجائی کابینہ نا دیوان اٹ جشن آزادی ءِ شان و شرف اٹ اڈ تننگ نا فیصلہ کرینے۔ وزیر اعظم نا کنڈآن پارت کننگانے کہ جشن آزادی آ کورونا نا سوب آن دود آتیٹی رکھوک گام گیج آتے مون آ تخنگے، کابینہ کارندہ غاک نیب نا آفس نا مون آ ن لیگی کارندہ غاتا کنڈآن ہڑدُڑ نا مذمت ءِ کرسا پارینے کہ ہڑ دُڑ کروک و خل اتوک آتا برخلاف کانودی کارروائی بایدے مرے۔ وزیراعظم عمران خان نا کماشی ٹی بنجائی کابینہ نا دیوان تدوک آ دے اڈ ہلک۔ کابینہ دیوان اٹ ملکی سیاسی، معاشی حالیت آتا جاچ ءِ ہلنگا۔ کابینہ اقتصادی رابطہ کمیٹی نا فیصلہ غاتا توثیق ءِ کرے۔ کابینہ ءِ جشن آزادی نا تیاری تیا بریفنگ تننگا۔ او وخت آ وزیر اعظم پارت کرے کہ جشن آزادی ءِ شان و شرف اٹ اڈ تننگے۔ جشن آزادی آ کورونا نا سوب آن دود آتیٹی رکھوک گام گیج آتیا خیال ءِ تخنگے۔ وزیراعظم نا پاننگ ئس کہ یوم آزادی ننا نشانی ءِ۔ جشن آزادی نا وخت آ جہد ءِ آزادی آن پُوسکن آ چین ءِ درستی راستی کرفنگے۔ حوال نا رداٹ دیوان اٹ چیئرمین سی ڈی اے مارگلہ روڈ آ تجاوزات آتا برخلاف آپریشن نا بابت بریفنگ تس۔کابینہ مارگلہ روڈ آ ساڑی تجاوز آتے چٹفنگ نا پارت تسوسُس۔ اسلام آباد نا ایب و کیب اٹ کوزہ مافیا نا برخلاف گام گیج آتیا آئی جی اسلام آباد کابینہ ءِ بریفنگ تس۔ حوال نا رداٹ کابینہ باسک آتا کنڈآن نیب نا آفس نا مون آ ن لیگ نا کارندہ غاتا کنڈآن ہڑ دُڑ نا مذمت ءِ کننگا۔ کابینہ باسک آک پارینو کہ نیب ءِ ہراساں کننگ نا کوشست کننگا۔ ہڑ دُڑ کروک و خلکاری کروک آتا برخلاف کانودی کارروائی کننگے۔