خلکاری، بے چیٹی، مریم نواز پیشی منسوخ

لاہور (آن لائن) مسکوہی وزیراعظم نواز شریف نا مسڑ مریم نواز نا نیب آفس آ بننگ تون نیب آفس نا پیشن نا بشخ جنگ انا پِڑ اس جوڑ مس۔ نیب آفس نا پیشن آ تعینات پولیس و پاکستان مسلم لیگ ن نا کارندہ غاتا نیام اٹ جھیڑہ غان مریم نواز نا گاڈی تون اوار ن لیگی کیہی راہشون تا گاڈی تے ہم نسخان رسینگا، ن لیگی کارندہ غاتا پولیس آ خلکاری و پولیس نا کارندہ غاتیا جوابی خلکاری نا نتیجہ ٹی ن لیگی باسک پنجاب اسمبلی چوہدری ارشد، مسکوہی لارڈ میئر لاہور کرنل (ر) مبشر جاوید تون اوار پاکستان مسلم لیگ ن نا کیہی کارندہ غاتون اوار اوڑے ساڑی عام انگا شاریک ہم ٹھپی مسر، پولیس کیہی ن لیگی کارندہ غاتے اسہ کنڈ کننگ کن آنسو گیس و واٹر کین تون اوار لٹکاری ہم کاریم اٹ ایس۔ نیب آفس نا مون آ خراب انگا حالیت آ پاکستان مسلم لیگ ن نا نیاری راہشون مریم نواز پیشی آن بیدس پدی ہنا۔ نیب آفس نا مون آ پاکستان مسلم لیگ ن نا کارندہ و پولیس نا نیام اٹ جھیڑہ نا حالیت ہموتم ودی مس ہراتم ن لیگی کارندہ غاک تینا کماش مریم نواز تون اوار نیب آفس نا تہٹی ہننگ نا کوشست کریر۔ ہراڑا اوڑے ساڑی اینٹی رائڈ فورس نا کارندہ غاک ن لیگی کارندہ غاتے اسہ کنڈ کننگ کن خیسُن ءُ مرچی والا اسپرے کاریم اٹ ایسر۔ او وخت آ نیب مسکوہی وزیر اعظم نا مسڑ مریم نواز نا پیشی ءِ کینسل کرسا نیب دفتر آ خلکاری و کمامدار آتا ٹھپی مننگ آ مقدمہ درج کرفنگ نا پڑو کرینے۔ ایلو کنڈ آ راہشون مسلم لیگ (ن) مریم نواز پارینے کہ پارٹی نا اسہ بیانیہ اسے ووٹ ءِ عزت تننگے، نواز شریف نا بیانیہ نا بہا ءِ چار سال آن ءِ ادا کننگانے، نیب نا کڑد بھاز پراگندہ ءِ، او بیر ہلوک کارروائی تیان پد نیب تینٹ نرّوک ءُ ادارہ اس جوڑ مسنے، کنکن ہیت کننگ آسان ءِ او چُپ مننگ سخت ءِ۔ وخت اس کہ نن ہیت کرسا اوفتے ایکسپوزکرین و وخت اس کہ نن چُپ تولسا اوفتے ایکسپوز کرین، عمران خان ءِ مالو بننگ نا شونق ئس داسہ ہننگ نا خلیس ءِ، جعلی کیس جوڑ کرسا مالو ہچ اس دوئی متو او نہ داسہ گڑاس دوئی مریک۔ دا خیال آتا درشانی ءِ او (نیب) دفتر نا مون آ مسلم لیگ (ن) و پولیس نا نیام اٹ ہڑدُڑ نا سوب آن پیشی نا کینسل مننگ آن پد ماڈل ٹاون اٹ مسلم لیگ (ن) نا راہشون تتون پریس کانفرنس اٹ کرے۔ پریس کانفرنس اٹ اوڑتون اوار مسکوہی وزیراعظم شاہد خاقان عباسی، رانا ثنااللہ خان، مریم اورنگزیب،پرویز رشید، دانیال عزیز، طلال چوہدری، شائستہ پرویز ملک، محمد زبیر، ملک پرویز، خواجہ عمران نذیر، چوہدری شہباز، غزالی سلیم بٹ، فیصل کھوکھر، ثانیہ عاشق، سلمیٰ بٹ و شیزہ خواجہ ہم ساڑی ئس۔ او پارینے کہ ہراوڑ پرامن و کودک آ کارندہ غاتیا خلکاری کننگا، اسپرے کننگاآنسو گیس خسنگا داڑان کیہی کارندہ غاک ٹھپی مسنو ای اوفتا مذمت ءِ کیوہ او مسلم لیگ(ن) نا ہرا کارندہ غاک کنا اُست خواہی کن بیدادی نا مون آ اوڑے سلیسر اوفتے سلام پیش کیوہ۔