نُت انا نہاد آتیٹی ودکی قومی ویل اسے، دا بیرہ کوئٹہ اسکان اف،مہراللہ بادینی

کوئٹہ، ڈپٹی کمشنر کوئٹہ مہراللہ بادینی پارینے کہ نُت انا نہاد آتیٹی ودکی اسہ قومی ءُ ویل اسے، ہرا بیرہ کوئٹہ اسکان اف بلکہ ملک انا کیہی علاقہ غاتیٹی ہم مون آ بننگ اٹی ءِ۔ ضلعی انتظامیہ کوئٹہ دا حالیت اٹی کوڑی کاری و منشائی کٹیا خوری نا توننگ کن گام گیج کرینے تاکہ اسہ بندغ اس ہم دا تنکی آن ناروا فائدہ ہرفنگ کَپ۔ غاو دیوان نا وخت آ میڈیا تون ہیت کرسا ڈپٹی کمشنر کوئٹہ پارے کہ فوڈ ڈیپارٹمنٹ و انڈسٹریز ڈیپارٹمنٹ نا اواری اٹ نُت انا نہاد آتے پک کننگ کن ہفتہ وار بنداو آ جاچ ہلنگ نا وڑ و ڈول تیار کننگانے، ہرانا رد اٹ نُت انا جوان نہاد پک کننگک۔ ضلعی انتظامیہ نا پرائس کنٹرول کمیٹیک تینا تعلقدار سب ڈویژن و تحصیل آتیٹی پک کروک نہاد آتیا عملدرآمد ءِ پک کیر۔ او پارے کہ پنڈنگ نا چٹفنگ نا کارروائیک ضلعی انتظامیہ نا تُوئی کارکڑد جاچ انا بشخ ءُ۔ شار اٹی پنڈنگ تون تعلقدار غاوک ملنگ آ تعلقدار اسسٹنٹ کمشنرز و سوشل ویلفیئر ڈیپارٹمنٹ نا کمک اٹ کارروائیک کننگرہ۔ تدوک آ ہفتہ ہم کارروائی ٹی 18 بندغ ءِ دزگیر کرسا جیل آ گدریفنگا۔ ڈپٹی کمشنر پارکنگ نا بابت ہیت کرسا پارے کہ میٹروپولیٹن کارپوریشن کوئٹہ (ایم سی کیو) نا رد اٹ مخصوص پارکنگ جاگہ غاتے لیز آ تننگک، ہراڑان حکومت ءِ کٹیا دوئی مریک۔ ولے کانود آن چَپ پارکنگ و بے موکل موٹر سائیکل اسٹینڈ آتا بابت غاو تیا انتظامی ٹیمک ہند انا جاچ ءِ ہلیرہ و کانود آن چَپ پارکنگ ءِ چٹفنگک۔ او پارے کہ اِرا دے مست امداد چوک آ موٹر سائیکل اسٹینڈ جوڑ مننگ نا غاو مس‘ انتظامی ٹیم ہند آ سر مرسا جاست پاست کرے تو اسٹینڈ کانود آن چَپ پک مس، ہرادے دمدستی وڑ اٹ چٹفنگا۔ ڈپٹی کمشنر مہر اللہ بادینی پیدوار کرے کہ ضلعی انتظامیہ السی غاو تا ایسری، المی کنوئی گڑا تا پک کروکنہاد آتیا فراوانی، کبینی و کوڑی کاری نا توننگ و شار اٹی کانود آن چَپ پارکنگ نا چٹفنگ کن تینا کارروائی تے برجا تخک۔