بے چیٹ حالیت آتیان پد ہم شونداری ڈٹ آتے برجا تخنگ ستا کڑزک،صوبائی وزیر مواصلات

کوئٹہ، صوبائی وزیر مواصلات و تعمیرات میر سلیم احمد کھوسہ نا کماشی ٹی صوبہ ٹی برجا بنجائی ڈٹ آتیا پیشرفت نا جاچ ءِ ہلنگ کن اسہ اہم ءُ دیوان اس اڈ ہلک۔ دیوان اٹی سیکرٹری مواصلات و تعمیرات بابر خان، چیف انجینئر فیڈرل پروجیکٹ ڈاکٹر سجاد بلوچ، چیف انجینئر خاران مکران زون، چیف انجینئر سیوی زون و جتا ڈٹ آتا پروجیکٹ ڈائریکٹر و ایلو تعلقدار کمامدار آک بشخ ہلکر۔ دیوان نا نیام اٹی چیف انجینئر فیڈرل پروجیکٹ ڈاکٹر سجاد بلوچ صوبہ ٹی برجا کل بنجائی شونداری ڈٹ آتیا مروک آ پیشرفت، ڈٹ آتا پوروی کن پک ٹائم فریم، مون بروک آ مالی و تکنیکی مشکل و ایلو تعلقدار باندات نا بابت جم بریفنگ تس۔ دا وخت آ سیکرٹری مواصلات و تعمیرات بابر خان پارے کہ صوبہ ٹی برجا بنجائی ڈٹ آک بھاز اہم ءُ ہرافتا پورو مننگ آن صوبہ نا بنداوی پنجر اٹی نمان گچینی بریک و شونداری نا عمل اٹی اسہ پوسکن ءُ رفتار اس ودی مریک او پارے کہ محکمہ مواصلات و تعمیرات نا کنڈ آن دا ڈٹ آتیا پیشرفت نا ریسہ اٹ جاچ ہلنگ انگ ءِ تاکہ شونداری ڈٹ آتا وخت آ پوروی ءِ پک کننگ مرے۔ سیکرٹری مواصلات و تعمیرات بابر خان مستی پارے کہ ڈٹ آتا کسر اٹی ساڑی مالی یا تکنیکی وڑ انا ویل آتے اولیتی بنداو آ ایسر کننگ کن ہر وڑ انا گام گیج کننگ انگ ءِ تاکہ شونداری کاریمک پک وخت اٹ پورو مریر و الس ءِ اوفتیان فائدہ مرے۔ دیوان آن تران کرسا صوبائی وزیر مواصلات و تعمیرات میر سلیم احمد کھوسہ پارے کہ خراب حالیت آتیان پد ہم شونداری ڈٹ آتے برجا تخنگ و اوفتے پوروی نا کنڈ آ دننگ ستا کڑزوک گام اسے۔ او تعلقدار کمامدار آتے پارت کرے کہ بنجائی ڈٹ آتیا کاریم نا ترندی ٹی پین ترندی اتنگے و حساس وڑ انا ڈٹ آتیا سیکورٹی نا رد اٹ ہم گام گیج کننگے۔ ڈٹ آتا وخت آ پورو مننگ اٹ ساڑی کل اڑاند آتے مر کننگ کن گام گیج کننگے۔ صوبائی وزیر پارے کہ دا ڈٹ آک صوبہ نا الس کن بھاز اہم ءُ ہرافتا پورو مننگ آن نئے بیرہ بنداوی پنجر اٹی گچینی بریک بلکہ الس ءِ سفری آسراتی تا رد اٹ مون تروک مشکل آتیٹی ہم نمان کمتی ودی مریک۔