بلوچستان ءِ بند و بستی یونٹ، گچین بلدیاتی نظام و ودکی وسیلہ غاتا گرج ءِ،وزیراعلیٰ میر سرفراز بگٹی

اسلام آباد، کوئٹہ، وزیراعلیٰ بلوچستان میر سرفراز بگٹی پارینے کہ بلوچستان ءِ مون تروک گورننس نا چیلنج آتتون گچین وڑ اٹ مون تننگ‘ الس ءِ بنداوی آسراتی تا فراوانی ءِ گچین جوڑ کننگ و انتظامی باندات آتے الس نا درگہ اسکان رسیفنگ کن صوبہ ٹی پین انتظامی یونٹ، گچین بلدیاتی نظام و ودکی وسیلہ غاتا گرج ءِ۔ بلوچستان کون آ بھلا ڈغار آ تالان صوبہ ءِ بیرہ کوئٹہ ٹی تولسا بھرمی وڑ اٹ چلیفنگ اسہ بھلو انتظامی چیلنج اسے، دا سوب آن ملکی کہول آ انتظامی تنظیمِ نو، پوسکن آ صوبہ غاتا جوڑ کننگ و ساڑی گورننس ماڈل تا سنجیدہ جاچ ہلنگ نا گرج ءِ۔ او پارے کہ دا باندات آ قومی مکالمہ نا بنا ستاکڑزک‘ ولے المی ءِ کہ دا شرہ ءِ سیمینار و ہوٹل اسکان کچ اٹ تخنگ نا جاگہ غا پارلیمنٹ آ دیر و دا بابت بھلو کچ اسے ٹی سیاسی امنائی ودی کننگے۔ دا خیال آتا درشانی ءِ او صنوبر فاؤنڈیشن نا کنڈآن پاکستان نا انتظامی تنظیمِ نو و پوسکن آ صوبہ غاتا جوڑ کننگ تون تعلقدار قومی شرہ ٹی تینا خیال آتا درشانی ءِ کرسا کرے۔ وزیراعلیٰ پارے کہ تدوک آ کیہی تُو آن پاکستان اٹی گورننس نا ساڑی ماڈل ٹہیفنگ یا اوفتے برجا تخنگ نا بابت شرہ برجا ءِ، ہرا اسہ مثبت ءُ پیشرفت اسے۔ دا قومی مکالمہ ٹی دا جاچ ہلنگ المی ءِ کہ ویسٹ منسٹر جمہوریت وڑ ہراڑ اسکان الس ءِ درکار بھرم فراوان کننگ اٹی ءِ و مگہ انتظامی بشخ و پانٹ و رقبہ نا ساڑی ترتیب ہم السی خذمت آتا بھرمی فراوانی ٹی اڑاند جوڑ مننگ اٹی ءِ۔ ننے دا ہروئی مریک کہ انتظامی اکائی تا ساڑی بشخ و پانٹ دا وڑ انا مشکل آتا سوب تو مفننگ اٹی ءِ ہرافتا سوب آن اسہ نظام اسے بے سہب تکنگ انگ ءِ۔ میر سرفراز بگٹی بلوچستان و ملک انا ایلو بشخ آتا نیام اٹی جغرافیائی ودکی نا فرق انا وضاحت ءِ کرسا پارے کہ پنجاب آن بروک آ اونا سنگت و کارندہ ہراتم واہگہ بارڈر آن سفر نا بناءِ کرسا راجن پور نا خڑک آ شاہوالی آ سر مریرہ تو پنجاب نا علاقہ چٹک‘ و دا سفر اٹی کم و ود شش آن ہفت گھنٹہ لگک۔ داڑان چَپ بلوچستان نا اسہ ضلع ٹی اسہ ہند آن ایلو ہند اسکان سفر کننگ اٹی ہم دہ گھنٹہ لگنگ کیک۔ دا فرق صوبہ نا جغرافیائی تالانی و انتظامی گرج آتے پہہ مننگ کن بھاز ءِ۔ او پارے کہ بلوچستان اٹی انتظامی اصلاحات نا گرج ءِ ہندادے بایدے ڈغاری راستکی تا رد اٹ ہننگے‘ وزیراعلیٰ پارے کہ دا وڑ انا اصلاحات کن کل آن مست سیاسی امنائی سلاہ المی ءِ۔ قومی شرہ و سیمینارآک دا کنڈ آ اہم کڑد ادا کننگ کیرہ، ولے اوفتا حقی فائدہ ہمو وخت آ مون آ بریک ہراتم دا شرہ پارلیمنٹ اسکان سر مرے و سیاسی جماعت آک اوار تولسا قابلِ عمل ایسری آ امنا کیر۔ او پیدوار لوز آتیٹی پارے کہ بلوچستان ءِ نئے بیرہ پین صوبہ یا انتظامی اکائی تا گرج ءِ بلکہ ساڑی صوبائی انتظامی پنجر ءِ ہم السی گرج آتا رد اٹ گچین جوڑ کننگ المی ءِ۔