دا وخت وزیر اعظم ءِ شیف خلنگ نا اف، اسیجائی حکمت عملی اس سجفنگے، بلاول

کراچی(آن لائن)پاکستان پیپلز پارٹی نا چیئرمین بلاول بھٹو زرداری پارینے کہ پاکستان کرونا وائرس ناجوڑی تون مون تننگ کیک او داڑکن بنجائی حکومت تینا سوچ اٹ مچٹ ءُ بدلی اس اتے، کراچی ٹی پریس کانفرنس اٹی بلاول بھٹو زرداری پارینے کہ اللہ پاک ہراتم امتحان اس ہلیک تو اودے سگنگ نا ہمت ہم ایتک، کرونا وائرس تون مون تننگ کن کوشست کننگ انگ ءِ، ننے دا سخت انگا وخت اٹ راہشونی و پارت آتیا عمل کروئی ءِ۔ خلیس نا سوب اف، پاکستان دا ناجوڑی نا مقابلہ ءِ کننگ کیک، ای چاوہ کہ ننے ٹی وائرس نا مقابلہ ءِ کننگ نا لائخی ارے، بنجائی حکومت تینا سوچ اٹ مچٹ ءُ بدلی اس اتے، بنجاہ و صوبہ غاتے تنقید و پوائنٹ اسکورنگ نا ہچ ءُ گرج اس اف، حکومت نا ذمواری ءِ کہ بندغ آتا جان و زرگزران ءِ بچفے، ننے ہڑتوم آ محاذ آتیٹی جنگ کروئی ءِ، شاری دا سخت انگا وخت اٹ حکومت تون کمک کیر، چیئرمین پیپلز پارٹی پارینے کہ پیشن ملک آتیان بروک آ بندغ آتون رہنگوک آتیان وائرس تالان مس، ایران آن پدی بروک آ بندغ آتا مہشون ءِ ایف آئی اے آن کشفین، نن تفتان کرنٹائن آن بروک آتے کل آن جتا تخان.