ڈپٹی کمشنر کوئٹہ مہراللہ بادینی نا کماشی ٹی ڈی پیک نا دیوان

کوئٹہ، ڈپٹی کمشنر کوئٹہ مہراللہ بادینی نا کماشی ٹی 2 نومبر آن بنا مروک آ پولیو تور مہم نا بست و بند آتا بابت ڈی پیک دیوان اڈ ہلک، ہراٹی ڈی ایچ او کوئٹہ، نیشنل ای او سی نا باسک آک، ایڈیشنل ڈپٹی کمشنر (جنرل) تون اوار تعلقدار کمامدار آک بشخ ہلکر۔ دیوان اٹی پولیو تورمہم نا بست و بند، سیکورٹی پلان، ٹیم تا تعیناتی و مہم ءِ بھرمی جوڑ کننگ کن چندی باندات آتا جاچ ءِ ہلنگا۔ دیوان ءِ پاننگا کہ مہم اٹ کوئٹہ ٹی کساس 4 لکھ 30 ہزار چناتے پولیو آن بچفنگ نا پڑی کنفنگک۔ ڈپٹی کمشنر مہراللہ بادینی پارت کرے کہ ہرا یونین کونسل آتیٹی مہم اٹ مشکل مون تروئی تمک ہموڑے خصوصی پولیو ٹیم تعینات کننگے تاکہ اسہ چنا اس ہم ویکسین آن محروم مف۔