بلوچستان اٹ طب چاہندار و پبلک ہیلتھ ایکسپرٹ آتے سرکڑدہ کننگ نا فیصلہ

کوئٹہ ( آن لائن ) وزیراعلی بلوچستان جام کمال خان نا کماشی ٹی کرونا وائرس نا توننگ‘ناجوڑ آتا درمان و ایلو ویل آتا جاچ ہلوک ءُ دیوان اسے ٹی طب انا ماہرک و پبلک ہیلتھ ایکسپرٹ آتا کڑد ادا کننگ و اوفتا سلاہ ٹی کرنٹائن و آئسولیشن نا بابت گام گیج نا فیصلہ کننگا ‘ وخت اس کہ رکھوک گام گیج آتا بابت اٹ اُلس ءِ بیدار کننگ کن علما کرام و سیاسی وقبائلی راہشون تا کمک اٹ فیصلہ کننگانے کہ کل ڈویژنل کمشنرک، ڈپٹی کمشنرک، ڈسٹرکٹ ہیلتھ آفیسرک، اسسٹنٹ کمشنرک، ایس ایس پی و تحصیلدارک تینا تینا علاقہ غاتیٹی مسہ دے اسکان جوان وڑ اٹ اُلسی معلومداری مہم چلیفرہ۔ ہرافتیٹی رکھنگ نا بابت معلومداری کن جوڑ کروک ءُ پمفلٹ بشخ و پانٹ کننگک۔ او پولیو ورکرک و لیڈی ہیلتھ وزیٹیر آتے ہم مہم اٹ اوار کننگک ہرا اُرا اُرا غا ہنسا رکھنگ نا بابت کلہو تے سر کننگک او کوشست کننگک کہ ہر بندغ و خاہوت اسکان دا کلہو ءِ المی سر کننگے، دیوان اٹ بشخندار ڈبلیوایچ او نا حوالکار مچ آ صوبہ ٹی سرویلنس نظام نا جوڑ کننگ ءِ پک کننگ نا پارے ہرانا رداٹ کرونا وائرس آن زہمی آ بندغ آتا پٹنگ اٹ کمک رسینگک، دیوان اٹ زوت اس ایپیڈیمک کنٹرول سینٹر نا جوڑ کننگ و کرونا وائرس آن زہمی بندغ آتا درمان کن آسراتی و آئسولیشن بنجاہ تے ودفسا ہنگامی بنداو آ گام گیج کننگ نا فیصلہ کننگا ہرا طب انا دانا تا سلاہ و راہشونی نا رداٹ مریک، دیوان اٹ پی پی ایچ آئی نا کڑد ءِ پین جوان کننگ و دانا بنداوی آ جون و انسانی وسیلہ غاتے کاریم اٹ اتنگ نا ہم فیصلہ کننگا، دیوان اٹ کرونا وائرس نا بابت گام گیج اکن جوڑ کروک آ کورکمیٹی نا پیش کروک آ رپورٹ نا جاچ ءِ ہلسا فیصلہ کننگا کہ کور کمیٹی نا رداٹ ہم کنٹرول روم نا میکنزم و میڈیا سینٹر جوڑ کننگک ہرانا کمک اٹ وزیرک و طب انا ماہرک کرونا وائرس نا گام گیج آتا بابت اٹ حکومت نا بیان ءِ ہڑدے نا بنداو آ پیش کیرہ ہرا حالیت آتا رداٹ اُلس نا راہشونی ءِ کیک او دا بابت اٹ سوشل میڈیا و ایلو الیکٹرک میڈیا نا کمک اٹ کروک آ سٹی آ پروپیگنڈہ تے توننگے، دیوان اٹ ہر کمیونیٹی تون تعلق تخوک آ رضاکار آتا خدمت ءِ کننگ نا ہم پارت کننگانے ہرا تینا کمیونٹی نا کرونا وائرس آن زہمی و نشانی خنوک آ بندغ آتے تینٹ آئسولیشن کرفنگ آ منفرہ۔ تانکہ اوفتا خاہوت نا ایلو بندغ آک کرونا وائرس آن رکھوک مریر۔