ملک اٹ پہلی آن پنچ جماعت اسکان نا اسہ وڑ انگا نصاب جوڑ

اسلام آباد( آن لائن ) وزیراعظم عمران خان پارت کرینے کہ تعلیم نا نصاب ءِ اسٹ کرسا دا ہیت ءِ پک کننگے کہ نصاب نا کتاب آتا شینکاری نا بابت اٹ مافیا تا کاریم تے پورو وڑ اٹ چٹفنگے، اسہ وڑ نا نصاب اس مچ آ ملک اٹ اتنگ کن بنجائی حکومت ہر وڑ نا کمک ایتک وخت اس کہ وزیراعظم ءِ پاننگانے کہ پہلی آن پنچ اسکان اسہ وڑ نا نصاب اس جوڑ کننگانے، دوانزدہ میکو جماعت اسکان نصاب اس جوڑ کننگ نا کاریم مارچ 2022ءاسکان پورو کننگک۔ وزارت تعلیم پی ٹی وی نا کمک اٹ ہفت گھنٹہ نا تعلیمی نشریات اس بنا کرینے تانکہ طالبعلم آتا تعلیم زہمی مف۔ تدوک آ دے وزیراعظم آفس نا میڈیا ونگ انا کنڈآن جاری بیان اسے نا رداٹ تعلیم نا بشخ اٹ طبقاتی بشخ و پانٹ ءِ ایسر کننگ نا بابت اٹ ساڑی حکومت تینا وعدہ ءِ پورو کرسا وزیرِاعظم عمران خان نا وژن نا رداٹ مچ آ ملک اٹ اسہ وڑ نا تعلیم اس تننگ نا بابت اٹ اولیکو مرحلہ ءِ پورو کننگانے او پہلی آن پنچ جماعت اسکان تعلیم نا نصاب اس جوڑ کننگانے۔ وزیرِاعظم عمران خان نا کماشی ٹی مچ آ ملک اٹ اسہ وڑ نا تعلیم تننگ نا بابت اٹ دیوان اس اڈ تننگا ہراٹی وزیرِ تعلیم شفقت محمود، سیکرٹری ایجوکیشن و ایلو سینئر افسرک بشخ ہلکر۔ وزیرِاعظم عمران خان نا وژن نا رداٹ مچ آ ملک اٹ اسہ وڑ نا تعلیم نا نصاب اس او ٹریننگ و جاچ ہلنگ نا اسہ نظام اس اتنگ پی ٹی آئی حکومت نا منشور نا اہم ءُ بشخ اس ئس۔ تعلیم نا بشخ اٹ ساڑی طبقاتی و ایلو فرق آک نہ بیرہ تعلیمی ادارہ غاتیٹی، تعلیم نا آب، استاد و طالبعلم آتے بشخ و پانٹ کرینو وخت اس کہ دا فرق اسہ ہندن ءُ نظام اس مون ایسنے ہراڑے مچ آ نظام راجی و معاشی شونداری نا بابت اٹ بیرہ اسہ خاص ءُ تپہ سے نا مفاد آتا رکھ ءِ کننگ اٹی ءِ۔ جتا جتا نظام جتا جتا ذہن (مائنڈ سیٹ) جوڑ کننگ اٹی ءِ، ہراڑان قومی شعور و نفسیات نا بابت اٹ فرق جتا خننگاسُس، دیوان ءِ دا ہم پاننگا کہ ساڑی حکومت اقتدار اٹ بننگ تون قومی نصاب کونسل (نیشنل کریکولم کونسل) اس جوڑ کرے ہراٹی کل صوبائی اکائی و پرائیوٹ بشخ، مدرسہ و پنی آ بندغ آتے اوار کننگا۔ ورکنگ ڈل نا کہول آ پروفیشنل آک و تینا تینا بشخ آتا ماہر تا ٹیم اس جوڑ کننگا۔ نصاب نا جوڑ کننگ نا بابت اٹ کیمبرج، آغا خان و لمز آمبار انگا پنی آ ادارہ غاتیان کمک دوئی کننگانے۔ وزیراعظم پارینے کہ پہلی آن پنچ جماعت اسکان نصاب ءِ اسہ وڑ جوڑ کننگانے۔ جماعت شش آن ہشت اسکان نا نصاب نا اسہ وڑی مارچ 2021ءاسکان جوڑ کننگک۔ وخت اس کہ نو آن دوانزدہ جماعت اسکان نا نصاب نا اسہ وڑی نا کاریم مارچ 2022ءاسکان پورو کننگک۔ دیوان اٹ وزیرِ اعظم ءِ اسہ وڑی نصاب نا جوڑ کننگ نا بابت اٹ ٹائم فریم اس پیش کننگا۔ پہلی آن ہلیس پنچ جماعت اسکان نا اسہ وڑی نصاب مارچ 2021ءاسکان، شش آن ہشت اسکان نا نصاب مارچ 2022ءو خت اس کہ نو آن دوانزدہ اسکان نا نصاب مارچ 2023ءاسکان پورو وڑ اٹ تیار مریک۔