مچ آ ملک اٹی 2 لکھ آن زیات ناجوڑ کورونا وائرس آن کٹس ادراخ جوڑ

اسلام آباد (اے پی پی) نیشنل کمانڈ اینڈ آپریشن سینٹر (این سی او سی) نا کنڈآن جاری تازہ حساب وکتاب نا رداٹ مچ آ ملک اٹی 2 لکھ 13 ہزار 175 کوروناوائرس ءِ شکست ترسا پورو دراخ جوڑ مسنو وخت اس کہ داوخت آ مچ آ ملک اٹی کوروناوائرس کوویڈ۔ 19 نا 50 ہزار 307 ایکٹیو کیس ءُ، آزاد کشمیر و بلوچستان اٹی اسہ ناجوڑ اس ہم وینٹی لیٹر آاف، تدوک آ 24 گھنٹہ ٹی 22 ہزار 408 ٹیسٹ کننگا ہرافتے ٹی 1763 پوسکن ءُ مثبت کیس رپورٹ مس، وخت اس کہ پین 32 کوروناناجوڑ زوال کرینو، اوکان پد مچ آ ملک اٹی کوروناغان زوال کروک آ بندغ آتا کچ 5 ہزار 709 مس۔ تدوک آ 24 گھنٹہ ٹی مروک آ ٹیسٹ آتیٹی سندھ انا 10108، پنجاب نا 7085، کے پی کے نا 2108، اسلام آباد نا 2355، بلوچستان نا 231، گلگت بلتستان نا 54و آزاد کشمیر نا 467 ٹیسٹ اوار ءُ۔ ملک انا چندی بشخ آتیٹی 1825وینٹی لیٹر کوروناناناجوڑ آتیکن جتا کننگانے، 248 ناجوڑ وینٹی لیٹر آٹی ءُ۔ داتم اسکان مچ آ ملک اٹی کورونا نا جم زہمی تا کچ 2 لکھ 69 ہزار 191ءِ۔ ملک انا 733 ہسپتال آتیٹی 2311 کورونا ناجوڑ درمان مننگ ءُ۔