کوئٹہ ماسٹر پلان، ٹینڈرنگ 30 جولائی اسکان پورو کننگک

کوئٹہ( آن لائن )وزیراعلی بلوچستان جام کمال خان نا کماشی ٹی اڈ ہلوک آ بڑزکو کہولی دیوان اٹ کوئٹہ نا شونداری نا ماسٹر پلان و صوبہ نا 30 ایلو ٹانز آتا ماسٹر پلاننگ نا بابت ویل آتا جاچ ءِ ہلسا بھاز اہم ءُ فیصلہ نا منظوری تننگا، سیکرٹری محکمہ شاری ڈٹ بندی و شونداری نا کنڈآن دیوان ءِ معلومدار کننگا کہ کوئٹہ ماسٹر پلان نا تیاری کن کنسلٹنٹ نا خدمت آتا دوئی کننگ کن برجا انگا ٹینڈرنگ پراسس دا تو انا 30تاریخ اسکان پورو کننگک۔ چیف سیکرٹری بلوچستان فضیل اصغر، سیکریٹری محکمہ شاری ڈٹ بندوی و شونداری خلیق نذرکیانی، سیکریٹری بلدیات صالح ناصر، سیکرٹری حوالکاری شاہ عرفان غرشین،ڈائریکٹر جنرل کیو ڈی اے صلاح الدین نورزئی و ایڈمنسٹریٹر کوئٹہ میٹروپولیٹن کارپوریشن طارق مینگل دیوان اٹ بشخ ہلک، دیوان اٹ کوئٹہ شار اٹ رہنگوک آ علاقہ غاتیٹی واپاری بلڈنگ آتا شونداری آن ودی مروک آ حالیت آ اُست ہسونی نا درشانی ءِ کننگا او دا بابت اٹ میٹروپولیٹن کارپوریشن و کوئٹہ ڈیویلپمنٹ اتھارٹی نا ہمو کانود آتیٹی ترامیم کن کانود سازی نا فیصلہ کننگا وخت اس کہ شار انا تہٹی بلڈنگ آتا واپاری پلاٹ آتیٹی دننگ آ زوت اس پابندی خلنگ نا منظوری تس و دا عمل ءِ کیو ایم سی وکیو ڈی اے نا کانود اٹ ترمیم و ہندا ادارہ غاتا کنڈآن این او سی نا جاری کننگ تون اوار شار انا لینڈ زوننگ نا جوڑ کننگ تون گنڈنگ نا فیصلہ کننگا۔ دیوان اٹ کوئٹہ پیکج نا رداٹ جوڑ مروک آ پُوسکن آ روڈ آتیٹی ہرافتے ٹی سریاب، قمبرانی، نواں کلی، سبزل، ریڈیو پاکستان، نواں کلی بائی پاس، ہنہ، جوائنٹ روڈ، پرنس روڈ و پٹیل روڈ اوار ءُ، دافتا پُوسکن ءُ شونداری کاریم آ زوت اس پابندی خلنگ نا فیصلہ کننگا و کمشنر کوئٹہ ڈویژن ءِ پابندی آ عملدرآمد ءِ پک کننگ نا پارت کننگا، دا بابت اٹ سیکرٹری بلدیات نا کماشی ٹی کمیٹی اس ہم تشکیل تننگا ہرا پُوسکن آ روڈ آتا لینڈ زوننگ کرسا واپاری بلڈنگ آتا جوڑ کننگ کن کانود جوڑ کیک۔ دیوان اٹ کوئٹہ شار اٹ بلڈنگ کوڈ آ عملدرآمد نا خلاف ورزی کرسا واپاری بلڈنگ و پلازہ غاتا جوڑ کننگ نا ہم سختی ٹی نوٹس ءِ ہلسا ہمو ادارہ غاتے دہن انگا بلڈنگ آتا برخلاف کاروائی کننگ نا پارت کننگا۔ دیوان اٹ پرائیویٹ آ بشخ انا ہاوسنگ اسکیم تے این او سی جاری کننگ نا وڑ و ڈول انا جاچ ءِ ہم ہلنگا۔ ڈی جی کیو ڈی اے دیوان ءِ دا بابت اٹ بریفنگ تس، دیوان اٹ ڈی جی کیو ڈی اے ءِ ہاوسنگ اسکیم تے این او سی نا جاری کننگ نا وڑ و ڈول ءِ ریگولیٹ کننگ نا پارت کننگا۔ تانکہ دا اسکیم تا نکاسی آب، گیس، بجلی، دِیر و روڈ آتا وڑ انا بنداوی آ آسراتی تا تننگ آ پابندی خلنگے ہراڑان اُلسی غاو تیا عمل کننگ ممکن مننگ کیک، دیوان اٹ تران کرسا وزیراعلی کوئٹہ ماسٹر پلان نا تیاری ٹی اُرے مننگ آ گڑتی نا درشانی ءِ کرسا پارینے کہ اُرے کننگ آن شونداری ڈٹ آتا افادیت زہمی مریک۔ او پارت کرینے کہ شاری شونداری نا زموار آ ادارہ غاتا حد و اختیار تے اسہ ولدا درست کرسا ایڈہاک ازم نا ایسری ءِ کننگے، ہمو ادارہ و انتظامیہ غیر کانودی شونداری ءِ توننگ کن مُتکن آ کانود اٹ جوانی و ترمیم کن کانود سازی کے تانکہ دا کانود آک واضح مریر او اوفتے ٹی مروک آ ویل آک مُر مریر۔ او پارینے کہ اگہ ریونیو اسٹاف تینا فرض آتے ایمانداری و فرض شناسی ٹی پورو کے تو نہ تجاوز اس مریک او نہ سرکاری ءُ ڈغار اسے آ کوزہ مننگ کے۔