پشین شار انا زیبائی کن ہر وڑ انا گام گیج کننگ انگ ءِ‘ قائم لاشاری

پشےن (خ ن) ڈپٹی کمشنر پشین قائم لاشاری پارینے کہ پشین شونداری نا کسر آ راہی روان مسنے‘ شار انا زیبائی کن ہر وڑ انا گام گیج کننگ انگ ءِ‘ تینا شار ءِ زیبا کننگ ننا کل انا زمواری ءِ۔ داہیت آتے او تینا دفتر اٹ مزدہ، ویگن، منی بس وکراچی کوچز یونین نا اوڑدہی کروک ڈل اتون ہیت وگپ کرسا کرے۔ اوپارے کہ اِرا مسہ تُو اٹ شار آن اڈہ ءِ بائی پاس آ جوڑ کروک پروجیکٹ فیزون آ گدریفنگک۔ بائی پاس آ اڈہ ءِ گدریفنگ نا بابت حکومت ناکنڈآن باقاعدہ این او سی ہم رسینگانے‘ ہندا اڈہ ٹی غٹ ٹرانسپورٹ یونین تیکن جتا جتا ہند پن کننگک‘ پروجیکٹ اٹ نرینہ و نیاڑی تیکن جتا جتا انتظار گاہ تون اوار مسیت‘ ہوٹل و واش رومک اوار ءُ۔ اوپارے کہ کمانڈنٹ سدرن کمانڈ ناکنڈآن دا پروجیکٹ ڈسٹرکٹ پشین کن اسہ ٹیکی اسے‘ پروجیکٹ دا وخت آ پورو مننگ ناگڈیکو مرحلہ ٹی ءِ او پارے کہ پشےن بائی پاس آ ٹرمینل جوڑ کننگ آن شا انا مین شاہراہ تیا ہیوی ٹرانسپورٹ کنٹرول مریک۔