نوشکے‘ قبائلی راہشون میر جعفرخان بادینی آ جلہو‘ کلہ بچا‘ اسہ بندغ ا س ٹھپی

نوشکے (تلار حوالکار) قبائلی راہشون میر جعفر خان بادینی آ نوشکے بازار اٹ نادرست سلہہ بند بندغ آک سم کاری کریر‘ کلہ بچا‘ سم لگنگ آن اسہ بندغ اس ٹھپی مس‘ سم کاری آن خڑک انا دکان تا شیشہ غاک پنار‘ اسہ سم اس دکاندار اسے نا لخ اٹ چُٹل لگا ہرا معجزہ ئی وڑ اٹ بچا۔ حوال نارد اٹ نوشکے بازار اٹ نجی بنک انا خڑک آ سلہہ بند بندغ آک قبائلی راہشون میر جعفر خان بادینی آ سم کاری کریر‘ ہرانا سوب آن اسہ سم اس میر جعفر خان بادینی نا دو اٹ لگا و او معجزہ ئی وڑ اٹ بچا‘ سم کاری آن اسہ بندغ نبی بخش ولد مہراللہ مینگل ساکن قاضی آباد ٹھپی مس ہرانا نت اٹ سم اس لگا‘ ٹھپی ءِ سول ہسپتال نوشکے آ گدریفنگا‘ سم کاری آن شار اٹ بندغ آک دانگ اینگ نرار‘ دوبہ دار آک بڑزائی سم کاری کرسا نرنگ اٹ سرسہب مسر‘ سم کاری آن ایب کیب انا دکان تے ٹی سمک لگار ہرانا سوب آن دکان تا شیشہ غاک پنار‘ اسہ دکاندار اسے نا لخ اٹ سم اس چٹل لگا و او ٹھپی مس۔ واقعہ غان گڈ ایس ایچ او پولیس پارٹی تون اواردوبہ دار آتے تُد تما‘ سم کاری نا واقعہ نا مستی جاست پاست ءِ کننگ انگ ءِ۔