عمران خان ءِ اینک کننگ نا خواست جمہوری ءِ، خواجہ آصف

 اسلام آباد (آن لائن)مسلم لیگ (ن) نا راہشون مسکوہی وزیر خارجہ خواجہ آصف پارینے کہ مائنس عمران خان نا خواست غیر جمہوری اف، حکومت ءِ اینک کننگ کن اسُل غیر آئینی وڑ و ڈول نا مخ تفی ءِ کپنہ، عمران خان نا ساڑی گری ٹی پارلیمنٹ اف آن حساب مسنے۔ اگہ جمہوریت کن گڑاس کننگ خوارے تو عمران خان ءِ مائنس مروئی تمک۔ درملکی ویب سائیٹ ءِ تروک آ انٹرویو ٹی خواجہ آصف پارینے کہ نن سمجھنہ کہ وزیراعظم عمران خان آ اُلس نا بھروسہ سد درسد چٹانے۔ وزیراعظم تینٹ اسہ وعدہ سے ہم پورو کتو ہرافتے او اقتدار اٹ بننگ تون کریسُس۔ عمران خان نا ساڑی گری ٹی پارلیمنٹ ’عضو معطل‘ جوڑ مسنے حکومت نا بدلی نا وڑ و ڈول ءِ حالیت آک تینٹ جوڑ کیرہ، انسان جہد کیک ولے ہرا وڑ مرے او آئینی مرے اسُل غیر آئینی وڑ و ڈول نا مخ تفی ءِ کپنہ نن خوانہ کہ داڑے جمہوریت سرسہب مرے۔ جمہوری وڑ و ڈول اٹ ننا حکومت کاہک تو کاہے، جمہوری وڑ و ڈول اٹ نن حکومت اٹ برینہ تو بسم اللہ، دا گڑاک جمہوری ءُ راج اسے کن بنداوی ءُ ہیت ءُ کہ حکومت نا ہننگ بننگ نا فیصلہ ءِ آئین کے نہ کہ غیر جمہوری آ وڑ و ڈول اٹ مرے۔ او پارینے کہ مائنس عمران خان نا خواست غیر جمہوری ءُ خواست اس اف نن ہچ ءُ پیشن نا طاقت اسے آن عمران خان ءِ اینک کننگ نا خواست کپنہ وخت اس کہ تحریک انصاف ءِ پاننگ اُن کہ جمہوریت نا بالادستی و حالیت آتیٹی جوانی کن عمران خان نا جاگہ غا پین کس اسے تینا لیڈر گچین کبو ای تکوہ کہ اگہ جمہوریت نا سرسہبی و ساڑی حالیت آتیٹی ریکوری اگہ کس اس خواہک تو مائنس ون المی ءِ ، پی ٹی آئی ءِ پین کماش اس اتوئی تمک۔