بلوچستان نا ورناتے جہانی آب انا ہیلکاری و تکنیکی کسب آتیان شُپ کینہ،وزیراعلیٰ میر سرفراز بگٹی

تکنیکی و جہانی آب ہیل کروک کسبکار ورناک ریکوڈک ڈٹ، بلوچستان نا زرگزرانی شونداری ٹی اہم کڑد ادا کیرہ

0

Get real time updates directly on you device, subscribe now.

کوئٹہ، ریکوڈک مائننگ کمپنی نا انٹرنیشنل گریجویٹ ڈویلپمنٹ پروگرام نا ارٹمیکو بیچ اٹی اوار بلوچستان نا 18 ورناانجینئر آک ارجنٹائن و زیمبیاٹی جہانی ہیلکاری ءِ پورو کننگ آن پد وطن آ پدی بننگ آ وزیراعلیٰ بلوچستان میر سرفراز بگٹی تون اوڑدہی کریر۔ ورناانجینئر آک بیرک نا جہانی آب انا کانڑ کنی نا تنصیب آتیٹی دوئی مروک آ عملی آزموندہ و کسبی چاہنداری تیان معلومدار کریر و ریکوڈک ڈٹ انا شونداری ٹی تینا کڑد ءِ ادا کننگ نا ارادگی نا درشانی ءِ کریر آرڈی ایم سی نا کنٹری منیجر ضرار جمالی نا کماشی ٹی اوڑدہی کروک آ ڈل ءِ بخیرکرسا وزیراعلیٰ میر سرفراز بگٹی ورناانجینئر آتا سرسہبی نا ستاءِ کرے و اوفتا کسبی لائخی تیا پت انا درشانی ءِ کرے۔ اوپارے کہ بلوچستان نا ورناک صوبہ نا روشنا آخبت و شونداری نا حقی جوڑ کروک آک ءُ۔ جہانی آب انا ہیلکاری و پوسکن آ تکنیکی چاہنداری تیان شُپ مرسا وطن آ پدی بروک آ دا ورناک ریکوڈک ڈٹ اتون اوار بلوچستان نا زرگزرانی شونداری ٹی اہم کڑد ادا کیرہ۔ اوپارے کہ دا ورناتا سرسہبی دا راستکی نا شاہدی ءِ کہ اگہ لائخ آ ورناتے جوان وارخواہی و کمک فراوان کننگے تو او جہانی کہول آ تینا لائخی تے منفنگ کیرہ۔ وزیراعلیٰ ہندی ورناتا کسبی کاریم نا کچ اٹی ودکی و اوفتے جہانی آزموندہ غاتیان روشناس کرفنگ کن آرڈی ایم سی و اونا آپریٹر کمپنی بیرک نا زرکاری و گام گیج آتا ہم ستاءِ کرے۔ اوپارے کہ ہندی ہیومن ریسورس ءِ جہانی آب انا چاہنداری تیان شپ کننگ بلوچستان نا مریس مدی زرگزرانی شونداری، روزگار نا وارخواہی و صنعتی کچ اٹی ودکی کن اہمیت تخک۔ داوخت آ آرڈی ایم سی نا کنٹری منیجر ضرار جمالی پارے کہ کمپنی ریکوڈک ڈٹ انا مدامگی شونداری ءِ ہندی آبادی نا شونداری و ورناتا کسبی کاریم نا کچ اٹی ودکی تون گنڈنگ تکک۔ انٹرنیشنل گریجویٹ ڈیولپمنٹ پروگرام نا کمک اٹ بلوچستان نا ورناانجینئر آتے جہانی آب انا تکنیکی ہیلکاری و جہانی عملی آزموندہ فراوان کننگ انگ ءِ، تانکہ او تینا کسبی کیریئر ءِ مونی دننگ تون اوار صوبہ نا زرگزرانی شونداری و شونہالی ٹی گچین کڑد ادا کننگ کیر کنٹری منیجر نا رداٹ دا 18 ورناانجینئر آتا گچین کاری 2024اٹی مچ آ بلوچستان آن ملوک آ مسہ ہزار آن زیات درخواست آتیان سخت و شفاف میرٹ آ تالان گچین کاری عمل نا کمک اٹ کننگاسس۔ داگروپ اٹی چار زالبول انجینئر آک ہم اوار ءُ، ہراکان کنی نا صنعت اٹی زالبول آتا اواری و کسبی وڑپہ وڑی نا مونی دننگ نا عکاسی ءِ کیک۔ گچین مروک آ ورناتا تعلقداری بلوچستان نا ضلع چاغی، کوئٹہ، گوادر، پنجگور، خضدار، لورالائی، نوشکے، موسیٰ خیل، قلعہ سیف اللہ و ژوب آن ءِ۔

Get real time updates directly on you device, subscribe now.

Leave A Reply

Your email address will not be published.