خیبرپختونخوا ٹی سیکورٹی فورس آتا بھلو آپریشن، 22 بھارتی سپورٹڈ دہشت گرد خلنگار،آئی ایس پی آر

پاکستان آن در ملکی کاٹم خواجہی و کمک ہلوک دہشت گردی نا پورو چٹفنگ کن سیکورٹی فورس و کانود نافذ کروک ادارہ غاتا کنڈ آن عزمِ استحکام نا وژن نا رد اٹ دہشت گردی نا برخلاف مہم پبی وڑ اٹ برجا سلک

0

Get real time updates directly on you device, subscribe now.

اسلام آباد، خیبرپختونخوا ٹی دہشت گردی نا برخلاف سیکورٹی فورس آتا کارروائی تیٹی بھلو سرسہبی اس دوئی مسنے، ہراڑے 16 و 17 نومبر آ سویلی وزیرستان، بنوں و ٹانک اٹی جتا جتا انٹیلی جنس بیسڈ آپریشن و جنگ اٹ بھارتی کاٹم خواجہی ٹی کاریم کروک فتنہ الخوارج نا 22 دہشت گرد خلنگار۔ سیکورٹی فورس آک دہشتگرد آتا ہند آتے بھرمی وڑ اٹ شست کریر، وخت اس کہ خلنگوک دہشتگرد آتیان سلہہ و منچر ہم دوئی مس۔ وزیراعظم محمد شہباز شریف و بنجائی وزیر داخلہ محسن نقوی سرسہب کارروائی تیا سیکورٹی فورس آتے خراجِ تحسین پیش کرسا دہشت گردی نا پورو چٹفنگ اسکان کارروائی تے برجا تخنگ نا ارادگی نا درشانی ءِ کریر۔ پاک فوج انا شعبہ تعلقات عامہ (آئی ایس پی آر) نا رِد اٹ سویلی وزیرستان اٹی خوارج آتا ساڑی گری نا حوال آ سیکورٹی فورس آک انٹیلی جنس بیسڈ آپریشن کریر، ہرانا رد اٹ دہشت گرد آتا ہند آتے بھرمی وڑ اٹ شست کننگا۔ ہڑتوم آ کنڈآن سم کاری آن پد فتنہ الخوارج نا 15 باسک خلنگار۔ آئی ایس پی آر نا رِد اٹ ضلع بنوں ٹی اِرا جتاجتا کارروائی ٹی سیکورٹی فورس آک دہشتگرد آتا ہند آتے شست کریر، ہرانا سوب آن پین 6 دہشت گرد خلنگار، وخت اس کہ ضلع ٹانک اٹی کروک اسہ کارروائی اسے ٹی اسہ خارجی اس خلنگا۔ دا وڑ اٹ ہر مسٹ آ ضلع غاتے ٹی جم وڑ اٹ 22 دہشتگرد خلنگار۔ ترجمان پاک فوج انا رِد اٹ خلنگوک دہشتگرد آتیان سلہہ و منچر ہم دوئی مسنے۔ دہشتگرد آک علاقہ ٹی دہشت گردی نا کیہی کارروائی تیٹی اوار ئسر۔ علاقہ ٹی ساڑی ایلو گمانی دہشتگرد آتا چٹفنگ کن سینیٹائزیشن آپریشن آک برجا ءُ۔ آئی ایس پی آر پارینے کہ سیکورٹی فورس و کانود نافذ کروک ادارہ غاتا کنڈ آن عزمِ استحکام نا وژن نا رِد اٹ دہشت گردی نا برخلاف مہم ترندی اٹ برجا سلک تاکہ پاکستان آن درملکی کاٹم خواجہی و کمک دوئی کروک آ دہشت گردی ءِ پورو وڑ اٹ چٹفنگ مرے۔ وزیراعظم محمد شہباز شریف خیبرپختونخوا نا ہرمسٹ آ ضلع غاتے ٹی سرسہب آپریشن تے ٹی 22دہشت گرد آتے خلنگ آ سیکورٹی فورس آتے خراجِ تحسین پیش کرینے۔ وزیراعظم سیکورٹی فورس آتا کسبی لائخی‘ بہادری و جیرت نا ستاءِ کرسا پارے کہ ننا بہادر ورناک تینا چاہنداری و ارادگی آن دہشتگرد آتا ناپاک ارادہ غاتے بے سہب کرینو۔ وزیراعظم پارے کہ ملک آن دہشت گردی نا پورو چٹفنگ اسکان سیکورٹی فورس آتا قربانی و کوشست آک برجا سلرہ، مچ آ قوم دہشت گردی نا برخلاف جنگ اٹی تینا بہادر فوج و سیکورٹی فورس آتتون اوار سلوک ءِ‘ فتنہ الخوارج و اوفتا کمکار آتے پاکستان اٹی بے ایمنی تالان کننگ نا اسُل موکل تننگپک۔

Get real time updates directly on you device, subscribe now.

Leave A Reply

Your email address will not be published.