حکومت نا کنڈ آن مالیاتی نسخان اٹی کمتی کن چندی گام گیج کننگ انگ ءِ،بنجائی وزیرخزانہ سینیٹر محمد اورنگزیب
پرائیویٹائزیشن آن حکومتی خڑچ آتے کچ اٹ کننگ و زرگزرانی کارکڑد ءِ گچین جوڑ کننگ اٹ کمک رسینگک
سنگاپور، بنجائی وزیرخزانہ و بنگکاری سینیٹر محمد اورنگزیب پارینے کہ حکومت مالیاتی نظم وضبط، زرگزرانی اصلاحات و زرکاری کن گچین چاگڑد نا فراوانی نا ارادگی آ سلوک ءِ، زرگزران نا سوگوی و مالیاتی نسخان اٹی کمتی کن چندی گام گیج کننگ انگ ءِ۔ اوداخیال آتا درشانی ءِ سنگاپور اٹی پاکستان ہاؤس اٹی پاکستانی ہائی کمشنر رابعہ شفیق نا کنڈآن تروک سُوارہ نا وخت آ پاکستانی پردیسی و کاروباری برادری نا باسک آتتون اوڑدہی ٹی کرے۔ وزیر خزانہ بشخ ہلوک آتے پاکستان اٹ گچین مروک آ زرگزرانی سوگوی، زرگران ءِ سوگو جوڑ کننگ و مالیاتی نسخان اٹی کمتی کن حکومت نا کنڈآن کروک آ گام گیج آتیان معلومدار کرے۔ او مالیاتی نظم و ضبط، اقتصادی اصلاحات و زرکاری کن گچین چاگڑد نا فراوانی نا حکومتی ارادگی نا درشانی ءِ کرے۔ محمد اورنگزیب سنگاپور اٹی تینا اڈکننگ نا آزموندہ غاتا حوالہ ءِ ترسا پاکستانی پردیسی تے ملک انا نہادی میرات و قومی اقتصادی شونداری ٹی اہم شریدار گوندا۔ اوپیشن ملک رہینگوک آ پاکستانی، خاص وڑ اٹ کر کاروباری برادری آ زور شاغا کہ او پاکستان ءِ زرکاری نا اسہ است چکوک ءُ ہند اسینا وڑاٹ درستی راستی کرفنگ و پاکستان و سنگاپور نا زرکارآتا نیام اٹ رابطہ و کمکاری ءِ ودفنگ اٹ فعال کڑد ادا کیر۔ وزیرخزانہ بشخ ہلوک آتے پاکستان اٹ چندی بشخ آتیٹی دوئی زرکاری نا وارخواہی تیان ہم معلومدار کرے۔ اوحکومت نا پرائیویٹائزیشن پروگرام نا ذکر ءِ کرسا پارے کہ سرکاری ادارہ غاتا پرائیویٹائزیشن آن قومی خزانہ غا مالی باریم ءِ کم کننگ، حکومتی خڑچ آتے کچ اٹ کننگ و زرگزرانی کارکڑد ءِ گچین جوڑ کننگ اٹ کمک رسینگک۔ داوخت آ پاکستانی کاروباری برادری نا باسک آک پاکستان اٹ زرکاری کن سازگار چاگڑد ءِ پین گچین جوڑ کننگ و درملکی زرکارآتے اتنگ نا بابت تینا سلاہ تے پیش کریر۔ بشخ ہلوک آک کاروباری ادارہ غاتا نیام اٹ دراست رابطہ و کمکاری ءِ ودفنگ نا وارخواہی تیا ہم گپ وتران کریر و زرکاری نا مونی دننگ و اقتصادی کمکاری ٹی ودکی کن چندی سلاہ تے تسر۔