پارلیمانی سفارتکاری پاکستان و اٹلی نا نیام اٹ تعلقداری تے سوگو کیک،سید یوسف رضاگیلانی

پارلیمانی رابطہ و السی کہول آ تعلقداری ہڑتوم آ ملک آتا نیام اٹ سنگتی و کمکاری ءِ آخبتی بنداو فراوان کیک

0

Get real time updates directly on you device, subscribe now.

اسلام آباد، چیئرمین سینٹ سید یوسف رضاگیلانی پارینے کہ پارلیمانی سفارتکاری پاکستان و اٹلی نا نیام اٹ تعلقداری تے پین سوگو کننگ اٹ اہم کڑد ادا کننگ کیک وخت اس کہ پارلیمانک الس نا نیام اٹ سنگتی، پت و کمکاری نا آخبتی پول آک ءُ۔ سینٹ نا کنڈآن جاری بیان نارداٹ چیئرمین سینٹ داخیال آتا درشانی ءِ اٹلی نا بڑزکو کہولی ڈل اتون پارلیمنٹ ہاؤس اٹی اوڑدہی ٹی کرے۔ ڈل اٹی اٹلی نا وزارت خارجہ و جہانی کمکاری نا سیکرٹری جنرل سفیر ریکارڈو گوار گلیا، پاکستان اٹی اٹلی نا سفیر اوگوچیئر لاتانی، اٹلی نا وزارت خارجہ و جہانی کمکاری نا ڈائریکٹر جنرل نکو لیٹا بومباردیئر و پاکستان اٹی اٹلی نا سفارت خانہ نا ڈپٹی ہیڈ آف مشن رابر ٹونیچیا اسک اوار ئسر۔ اوڑدہی ٹی پاکستان و اٹلی نا متکن آ سنگتی تعلقداری، پارلیمانی سفارتکاری، علاقائی وجہانی حالیت، واپار، زرکاری و تعلیم تون اوار چندی بشخ آتیٹی کمکاری نا مونی دننگ آ گپ وتران کننگا۔ چیئرمین سینٹ پارے کہ پاکستان اٹلی تون تینا متکن آ تعلقداری تے بھاز اہمیت ایتک۔ پارلیمانی رابطہ و السی کہول آ تعلقداری ہڑتوم آ ملک آتا نیام اٹ سنگتی و کمکاری ءِ آخبتی بنداو فراوان کیک۔ اوپاکستان و اٹلی نا نیام اٹ پارلیمانی ڈل آتا ہن و بر وپارلیمانی فرینڈ شپ گروپ آتے پین فعال جوڑ کننگ آ زور شاغا۔ اوپارے کہ پاکستان و کمبوڈیا ٹی اِرا سرسہب بین الپارلیمانی اسپیکرآتا کانفرنس اڈ ہلکنے وخت اس کہ مسٹمیکو کانفرنس انڈونیشیا ٹی مریک۔ اوجہانی بے چیٹی ٹی کمتی و امریکہ و ایران نا نیام اٹ مذاکرات نا کمکاری کن پاکستان نا سفارتی کوشست آتیا ہم ہیت کرے۔ سید یوسف رضاگیلانی اٹلی آ زور شاغا کہ او پاکستان اٹ توانائی، ٹیکنالوجی، صنعت و بنداوی پنجر نا بشخ آتیٹی زرکاری ءِ ودفے۔ اواٹلی ٹی رہینگوک آ پاکستانی تا کڑد انا ستاءِ کرسا کسبکار پاکستانی تیکن مسہ سال اٹی 10ہزار500 روزگار نا وارخواہی فراوان کننگ نا معاہدہ نا ستاءِ کرے۔ اطالوی ڈل پارے کہ کم و ود 3،500 پاکستانی طالب علم اٹلی نا یونیورسٹی تیٹی خواننگ اٹی ءُ وخت اس کہ کم و ود 30 اطالوی یونیورسٹیک پاکستانی تعلیمی ادارہ غاتتون کمکاری نا معاہدہ کرینو۔

Get real time updates directly on you device, subscribe now.

Leave A Reply

Your email address will not be published.