بلوچستان اٹی اولیکو انشورنس کمپنی اس جوڑ کننگ نا منظوری تننگا

انشورنس نا گچین آسراتی کن اِرا ارب روپئی نا بنائی خڑچ اٹ بلوچستان اٹی رجسٹرڈ بلوچستان انشورنس کمپنی لمیٹڈ جوڑ کننگک

0

Get real time updates directly on you device, subscribe now.

کوئٹہ، وزیراعلیٰ بلوچستان میر سرفراز بگٹی نا کماشی ٹی پبلک پرائیویٹ پارٹنرشپ بورڈ انا دہمیکو دیوان اٹی صوبہ ٹی زرکاری، مالیاتی خذمت و صنعتی شونداری نا شون تننگ نا رد اٹ اہم فیصلہ کننگا۔ دیوان اٹی پبلک پرائیویٹ پارٹنرشپ نا رد اٹ بلوچستان نا اولیکو انشورنس کمپنی جوڑ کننگ نا منظوری تننگا، وخت اس کہ ضلع ڈیرہ بگٹی نا علاقہ سوئی ٹی لو بی ٹی یو گیس آن فرٹیلائزر کمپلیکس جوڑ کننگ آ ہم امنا کننگا۔ دیوان ءِ بریفنگ ترسا پاننگا کہ اِرا ارب روپئی نا بنائی خڑچ آن بلوچستان اٹی رجسٹرڈ بلوچستان انشورنس کمپنی لمیٹڈ جوڑ کننگک۔ دا کمپنی نا جوڑ مننگ آن صوبہ نا سرکاری ادارہ و ہندی شاری تے انشورنس نا گچین و آب اٹنگا آسراتیک ہندی کہول آ دوئی مریرہ۔ دا گام آن صوبہ ٹی مالیاتی خذمت نا بشخ ءِ ودفنگ و زرکاری نا پوسکن آ گمان تا ودی کننگ اٹی ہم کمک رسینگک۔ وزیراعلیٰ بلوچستان میر سرفراز بگٹی پارے کہ پبلک پرائیویٹ پارٹنرشپ نا رد اٹ انشورنس کمپنی نا جوڑ کننگ صوبہ ٹی مالیاتی خذمت نا شون تنگ و زرکاری نا پوسکن آ وارخواہی تا ودی کننگ نا کنڈ آ اہم ءُ گام اسے۔ حکومت بلوچستان پرائیویٹ بشخ انا اواری اٹ ہمو ڈٹ آتیا کاریم کننگ اٹی ءِ ہرافتیان صوبہ نا زرگزرانی واکداری آن فائدہ ہرفنگ مرے و الس ءِ گچین آسراتی فراوان کننگے۔ او پارے کہ شونداری ڈٹ آتیٹی پرائیویٹ بشخ انا شریداری ءِ شون ترسا زرگزرانی سرجز آتیٹی ودکی و مدامگی شونداری نا بنداو تخنگ مننگ کیک۔ دیوان اٹی ضلع ڈیرہ بگٹی نا علاقہ سوئی ٹی لو بی ٹی یو گیس ءِ کاریم اٹ اتسا فرٹیلائزر کمپلیکس جوڑ کننگ آ ہم امنا کننگا۔ دیوان ءِ پاننگا کہ دا ڈٹ آن ہندی قدرتی وسیلہ غاتا بھرمی کاریم اٹ اتنگ تون اوار صنعتی سرجز آتے شون رسینگک و ہندی آبادی کن روزگار نا بھلو وارخواہی ودی مریک‘ فرٹیلائزر کمپلیکس جوڑ مننگ آن علاقہ ٹی واپاری سرجز آتیٹی ودکی و تعلقدار بشخ آتیٹی زرگزرانی وارخواہی تا ودی مننگ نا ہم گمان ءِ۔ وزیراعلیٰ میر سرفراز بگٹی پارے کہ بلوچستان قدرتی وسیلہ غاتیان شپ ءُ صوبہ اسے و دا وسیلہ غاتے ہندی کہول آ صنعتی شونداری، زرکاری و روزگار نا وارخواہی تا ودی کننگ کن کاریم اٹ اتنگ المی ءِ۔ او پارے کہ حکومت بلوچستان نا کوشست ءِ کہ قدرتی وسیلہ غاتیان دوئی مروک زرگزرانی فائدہ غاتے ٹی ہندی آبادی ءِ ہم بشخ رسینگے و ورنا تیکن روزگار نا پوسکن آ کسرک ملنگر۔ سوئی ٹی فرٹیلائزر کمپلیکس جوڑ کننگ ہندا سوچ انا رد ات اہم ءُ پیشرفت اسے، ہراڑان علاقہ ٹی صنعتی و واپاری سرجز آتے شون رسینگک۔ وزیراعلیٰ پارے کہ صوبہ ٹی زرگزرانی شونداری کن ہمو ڈٹ آ تا است بڈی کننگ انگ ءِ ہرافتے ٹی سرکاری و پرائیویٹ بشخ اسیجائی وڑ اٹ زرکاری کیر۔

Get real time updates directly on you device, subscribe now.

Leave A Reply

Your email address will not be published.